Róóma ńba i

Wasɩ́ɩ́ka Pɔ́ɔlɩ waaŋmáa kɛ

Róóma

ńba nɛ́

Naanɩ́ na ɖɩbáázɩ nɛ́

Yeésu Krísto waayáa Pɔ́ɔlɩ nɛ́,

waaɖʊ yɩ gɛ sɩsɩ íbo wenbá bɛdɛkɛ́ɛ Yahúúɖuwá nɛ́ bɔjɔ́ ifééri wɛ ɩdɛ́ɛ Laabáárʊ Kífeńgi.

Pɔ́ɔlɩ waabáázɩ tɩmɛ́rɛ ɖɩḿ lám nɛ́,

báa lé gɛ woobó gɛ waalá waázu,

ngɛ ɩráa waalá túúbá bofu Yeésu,

ɩráa bɛḿ baajáŋ babɩ́sɩ Krísto-dɛ́ɛ Koduuziya fáráńdɩ́ kɩḿ kɩdaá nbɩlɛ́.

Tákaraɖá kɩna nɛ́,

Krísto ńba bɔwɛ Róóma tɛ́ɛ́dɩ-daá nɛ́ gɛ Pɔ́ɔlɩ waaŋmáa kɩ.

Bɩdɛkɛ́ɛ ɩdɩtɩŋa woozuu ná Koduuziya kɛḿ.

Amá,

ńŋɩnáa bɩgɛ́ɛ yɩ ɖóóle sɩsɩ íbo ɖúúlínya rɩ́ŋa-daá wenbá bɛdɛkɛ́ɛ Yahúúɖuwá nɛ́ bɔjɔ́ ifééri wɛ Yeésu Krísto-dɛ́ɛ Laabáárʊ Kífeńgi nɛ́,

waaɖʊ sɩsɩ wɛ́nɖɛɛ́ Ɛsɩpáanyɩ laadɔ́ɔ-daá;

amá,

ɖɛɛ́-daá nɛ́,

ɩmʊ́ wánzɩŋ́ Róóma tɛ́ɛ́dɩ-daá ɩkpáázɩ Krísto ńba bɔwɛ ńna nɛ́ ɖóni bɛdɛ́ɛ toovonúm baava Yeésu Krísto nɛ́ kɩnɩ́bááwʊ-daá.

Bɩlɛ́ bʊrɔ gɛ waaŋmáa wɛ wasɩ́ɩ́ka kana,

na bɛlɛ́ bakpɩ́ɩ́rɩ ɩdɛ́ɛ kɔnɩ́.

Wasɩ́ɩ́ka kɛḿ kadaá,

wentí Pɔ́ɔlɩ wánwɩlɩ́ɩ wɛ nɛ́ gɛ sɩsɩ:

Laabáárʊ Kífeńgi feerím-dɛ́ɛ tɩmɛ́rɛ kɛ́ɛ na kʊ ɖóni weení Ɩsɔ́ɔ wánlanáa yɩ tɩmɛ́rɛ wɛ́nlɛɛ́ wenbá barɩ́ŋa baava Yeésu Krísto toovonúm nɛ́.

Kaɖaa-dɛ́ɛ nɛ́,

Yahúúɖuwá gɛ;

bɛlɛ́ bɔwɔ́rɔ́ gɛ wenbá bɛdɛkɛ́ɛ Yahúúɖuwá nɛ́.

Pɔ́ɔlɩ wánwɩlɩ́ɩ sɩsɩ Ɩsɔ́ɔ tɛ́nbɛɛŋná sɩsɩ ɩrʊ́ kɛ́ɛ Yahúúɖu,

yáá ɩdɛkɛ́ɛ na iɖéézi yɩ sɩsɩ ɩzɩɩzɛ́ɛ.

Ɩ́dɛ́nbɛɛŋná sɩsɩ ɩrʊ́ fóo Múúsá-dɛ́ɛ Mará,

yáá ɩraavóo yɛ,

na ɩlɛ́ɛ yɩ.

Bɩlɛ́ ɖʊɖɔ gɛ bɩdɛkɛ́ɛ lakásɩ kazɔ́ɔ ɩrʊ́ wánlám nɛ́-rɔɔzɩ́ gɛ Ɩsɔ́ɔ wénɖeezí yɩ sɩsɩ ɩzɩɩzɛ́ɛ.

Amá,

toovonúm ɩrʊ́ wánváa Yeésu Krísto nɛ́ riké kóŋ́ gɛ Ɩsɔ́ɔ wɛ́nbɛɛŋnáa na iɖéézi yɩ sɩsɩ ɩzɩɩzɛ́ɛ ɩmʊ́ Ɩsɔ́ɔ waazá-daá.

Pɔ́ɔlɩ sɩ ɩkʊ́ʊ́rɩ wentí wánwɩlɩ́ɩ nɛ́,

wɔɔdɔ́ Róóma Krísto ńba sɩsɩ na bɩrɩ́ŋa badaá nɛbɛ́rɛ kɛ́ɛ Yahúúɖuwá bɩka nɛbɛ́rɛ tɛkɛ́ɛ nɛ́,

Ɩsɔ́ɔ woodúúzi wɛ babɩ́sɩ ɩdɛ́ɛ zamɔ́ɔ,

káma,

bána Yeésu Krísto baalá kʊ́ɖʊḿ.

Bʊrɔɔzɩ́ nɛ́,

bɛḿ ɖʊɖɔ bála nɔɔ́ kʊ́ɖʊmɔ́ɔ,

bɔ́sɔɔlɩ ɖamá,

bɩka bɛ́kɛkpɛɛná ɖamá,

ngʊ́ bákafʊʊná ɖamá.

Sɩ ɩkʊ́ʊ́rɩ nɛ́,

Pɔ́ɔlɩ wɛɛzɛ́ɛ barɩ́ŋa;

wɛɛzɛ́ɛ ɩyáa badaá ɖabata wenbá ɩbá ɩnyɩ wɛ yáá waanɩ́ɩ bɛdɛ́nɩ nɛ́ bɛdɛ́ɛ yɩrá.