Yeésu Krísto-dɛ́ɛ Laabáárʊ Kífeńgi
Maatéwu
waaŋmáa kɩ nɛ́
Yeésu ɩjaájaanáa
(Ɩbɛ́ɛ́ŋ Lúk 3.23-38 ɖʊɖɔ)
1
1 Yeésu Krísto caájaanáa yɩrá nɖɔ́:
Ɖáwʊɖa gɛ Yeésu Krísto ɩjaájaanáa ɩjaa,
bɩka Ibrahím gɛ Ɖáwʊɖa ɩjaájaanáa ɩjaa.
2 Ibrahím waalʊ́rʊ Ɩsaáka,
Ɩsaáka ɩlʊ́rʊ Yaakúbu,
Yaakúbu ɩlʊ́rʊ Yudáa na igoobíya.
3 Yudáa ɩlɛ́ waalʊ́rʊ Farɛ́ɛsɩ na Zaará (bɛlɛ́ bɔgɔɔ gɛ Tamáarɩ),
Farɛ́ɛsɩ waalʊ́rʊ Ɛsɩrɔ́ɔnɩ,
Ɛsɩrɔ́ɔnɩ ɩlʊ́rʊ Aráamɩ.
4 Aráamɩ waalʊ́rʊ Aminadáabɩ,
Aminadáabɩ ɩlʊ́rʊ Nasɔ́ɔnɩ,
Nasɔ́ɔnɩ ɩlɛ́ waalʊ́rʊ Salɩmɔ́ɔnɩ;
5 Salɩmɔ́ɔnɩ waalʊ́rʊ Bóozɩ,
ɩlɛ́ ɩgɔɔ gɛ Ráábí.
Bóozɩ waalʊ́rʊ Obɛ́ɛdɩ,
ɩlɛ́ ɩgɔɔ gɛ Ruwétu.
Obɛ́ɛdɩ waalʊ́rʊ Yesée.
6 Yesée waalʊrʊ ná wúro Ɖáwʊɖa.
Ɖáwʊɖa waalʊ́rʊ Sulemáana (ɩlɛ́ ɩgɔɔ fʊngɛ́ɛ na Uríi ɖɛɛlʊ́).
7 Sulemáana waalʊ́rʊ Robowáamɩ,
Robowáamɩ ɩlʊ́rʊ Abiyáa,
Abiyáa ɩlʊ́rʊ Azáa.
8 Azáa waalʊ́rʊ Yosafáatɩ,
Yosafáatɩ ɩlʊ́rʊ Yoráamɩ,
Yoráamɩ ɩlʊ́rʊ Oziyáasɩ.
9 Oziyáasɩ waalʊ́rʊ Yowatáanɩ,
Yowatáanɩ ɩlʊ́rʊ Akáazɩ,
Akáazɩ ɩlʊ́rʊ Ezekíyáasɩ.
10 Ezekíyáasɩ waalʊ́rʊ Manasée,
Manasée ɩlʊ́rʊ Amɔ́ɔnɩ,
Amɔ́ɔnɩ ɩlʊ́rʊ Yoziyáasɩ.
11 Yoziyáasɩ waalʊ́rʊ Yokoniyáasɩ na igoobíya.
Bɩdɛ́ɛ sáátɩ gɛ baagba Israyɛ́ɛlɩ bíya bɛɖɛɛná Babilɔ́ɔnɩ laadɔ́ɔ-daá.
12 Bɛɛɖɛɛná Israyɛ́ɛlɩ bíya Babilɔ́ɔnɩ wɔ́rɔ́ nɛ́,
Yokoniyáasɩ waalʊ́rʊ Salatɩyɛ́ɛlɩ,
Salatɩyɛ́ɛlɩ ɩlɛ́ ɩlʊ́rʊ Zorobabɛ́ɛlɩ.
13 Zorobabɛ́ɛlɩ waalʊ́rʊ Abiwúudi,
Abiwúudi ɩlʊ́rʊ Eliyakíimi,
Eliyakíimi ɩlʊ́rʊ Azɔ́ɔrɩ.
14 Azɔ́ɔrɩ waalʊ́rʊ Sadɔ́ɔkɩ,
Sadɔ́ɔkɩ ɩlʊ́rʊ Akíimi,
Akíimi ɩlʊ́rʊ Eliwúudi.
15 Eliwúudi waalʊ́rʊ Eleyazáarɩ,
Eleyazáarɩ ɩlʊ́rʊ Matáanɩ,
Matáanɩ ɩlʊ́rʊ Yaakúbu.
16 Yaakúbu waalʊ́rʊ Ísifu,
Marɩyáma weení waalʊ́rʊ Yeésu weení bánÿaá yɩ sɩsɩ Lɛɛrʊ́ nɛ́,
ɩwaalʊ́.
17 Kɔgbɔɔ Ibrahím ngɔ́nɩ Ɖáwʊɖa,
caájaanáa waalɩ́ɩ gɛ ákɩzaalʊʊ́ naárʊ fɛ́yɩ́;
bɩka kɔgbɔɔ Ɖáwʊɖa ngɔ́nɩ sáátɩ bɛɛɖɛɛná Israyɛ́ɛlɩ bíya Babilɔ́ɔnɩ nɛ́,
caájaanáa waadálɩɩ ɖʊɖɔ ákɩzaalʊʊ́ naárʊ fɛ́yɩ́ gɛ.
Kɔgbɔɔ sáátɩ kɩḿ ngɔ́nɩ baalʊ́rʊ Yeésu Krísto nɛ́,
caájaanáa waalɩ́ɩ gɛ ákɩzaalʊʊ́ naárʊ fɛ́yɩ́.
Nŋɩ́nɩ́ bɩɩlá gɛ baalʊ́rʊ Yeésu nɛ́
(Ɩbɛ́ɛ́ŋ Lúk 2.1-7 ɖʊɖɔ)
18 Ɩbɛ́ɛ nŋɩ́nɩ́táá baalʊrʊ ná Yeésu Krísto nɛ́.
Báńváa ɩgɔɔ Marɩyáma Ísifu sɩ ɩkpɔ́ɔ.
Ɩ́na yɩ bodoyoozi tá bɔcɔ́ɔ gɛ Marɩyáma wɛɛyɛ́ɛ fuwá na Kezeŋa Ɖacɩrɩ‑cɩrɩ ńga-dɛ́ɛ ɖóni-daá.
19 Ísifu weení baava yɩ nɛ́,
kɛ́ɛ ɩrʊ́ weení ɩzɩɩzɛ́ɛ nɛ́,
ɩdɔsɔ́ɔ́lɩ sɩsɩ ɩŋmátɩ tɩ ɩráa zamɔ́ɔ ɩnɩ́ɩ bɩka bɩfɔrɔ́sɩ Marɩyáma yɩ́ɖɛ.
Biiyéle wɔɔzɔ́ɔ́lɩ sɩsɩ ɩ́na yɩ batára súmúú-daá.
20 Ɩwɛ wánmaazɩ́ bɩlɛ́ nɛ́,
ngɛ Ɖádʊ́ʊ Ɩsɔ́ɔ-dɛ́ɛ malááyɩ́ka naárʊ waaɖʊ ɩlɩ́ɩ ɩrɔ ɖoozire-daá ɩtɔ́ yɩ sɩsɩ:
«Ísifu,
Ɖáwʊɖa kutoluú-dɛ bú,
nkanɩ́ɩ nɩdáárɛ sɩ ngbɔ́ɔ Marɩyáma nɛ́,
káma,
na Kezeŋa Ɖacɩrɩ‑cɩrɩ ńga-dɛ́ɛ yíko-daá gɛ wɛɛyɛɛ ná fuwá kana.
21 Wánlʊrʊ́ʊ bú abaalʊ́ na nva yɩ yɩ́ɖɛ sɩsɩ Yeésu,
káma,
ɩmʊ́ sɩ ɩlɛɛ ná ɩdɛ́ɛ zamɔ́ɔ kɩdɛ́ɛ alaháácɩ́wá-daá.»
22 Bɩrɩ́ŋa bɩɩlá bɩlɛ́ gɛ na wentí Ɖádʊ́ʊ Ɩsɔ́ɔ waaŋmátɩ na anɖébi nɔɔ́ nɛ́ ikóódi;
waaŋmátɩ gɛ sɩsɩ:
23 «Aléeré waasɩ abaalʊ́ nɛ́ wɛ́nÿɛɛ́ fuwá ɩlʊ́rʊ bú abaalʊ́
na bafa yɩ yɩ́ɖɛ sɩsɩ Emanʊwɛ́ɛlɩ.»
Yɩ́ɖɛ ɖɩḿ ɖugutoluú gɛ sɩsɩ «Ɩsɔ́ɔ wɛ ɖɔ́jɔ́.»