Yeésu Krísto-dɛ́ɛ Laabáárʊ Kífeńgi
Maatéwu
waaŋmáa kɩ nɛ́
Naanɩ́ na ɖɩbáázɩ nɛ́
Wenbá baaŋmáa Ɖádʊ́ʊ Yeésu Krísto-dɛ́ɛ Laabáárʊ Kífeńgi nɛ́,
bɛgɛ́ɛ nɔɔ́náázá gɛ:
bɛɛ Maatéwu,
Maárɩkɩ,
Lúka na Yʊháánɩ.
Banaazáánɩ́ badaá,
Maatéwu na Maárɩkɩ na Lúka bɛɛgɛ́ɛ́zɩ tɔ́mwá wentí nɛ́ waabá gɛ tɩlɩ́ɩ ɖamá.
Maatéwu-dɛ́ɛ tákaraɖá gɛ kaɖaa ńgɩ Njííla-dɛ́ɛ tákaraɖáwá-daá.
Tákaraɖá kɩna,
Laabáárʊ Kífeńgi kɩ́nŋmatɩ́ Ɖádʊ́ʊ Yeésu Krísto-dɛ́ɛ tɔ́m nɛ́-dɛ́ɛ tákaraɖá gɛ kɩgɛ́ɛ.
Maatéwu waaŋmaa ná kɩ.
Maatéwu ɩmʊ́ ɩvʊngɛ́ɛ Yeésu Krísto-dɛ́ɛ tɩndʊ́ʊ gɛ.
Yahúúɖuwá baabɩ́sɩ Krísto ńba nɛ́ gɛ waaŋmáa kɩ.
Sɩ ɩbáázɩ nɛ́,
waalɩzɩ́ Yeésu Krísto ɩwɩ́lɩ:
kɔgbɔɔ ɖoo ɩjaájaanáa hálɩ bɩkɔ́nɩ ɩdɛ́ɛ lʊrʊ́ʊ na ɩdɛ́ɛ bijáádɩ na wenbí bɩrɩ́ŋa waalá nɛ́.
Maatéwu wánwɩlɩ́ɩ ɩdɛ́ɛ tákaraɖá kɩna kɩdaá sɩsɩ Yeésu Krísto kɛ́ɛ na Wúro-Lɛɛrʊ́ weení Ɩsɔ́ɔ waabaná anɖébiwá Keɖiyá Kɩ́bɩńga-daá iɖúu sɩsɩ wéngediríi yɩ ɖúúlínya nɛ́.
Sɩsɩ Yeésu ɩmʊ́ gɛ Ɩsɔ́ɔ sɩ ɩbaná na iyéle wentí tɩrɩ́ŋa waavʊ́ńɖúu sɩ wánlám nɛ́ ikóódi.
Maatéwu sɩ ɩtɛ́ɛ́zɩ ɩdɛ́ɛ tákaraɖá kɩna nɛ́,
waaŋmátɩ Yeésu Krísto-dɛ́ɛ sɩ́m,
na ɩdɛ́ɛ ɩsɩɖáa-daá fém,
na wentíwá waazɩ́ɩ́zɩ tɩ ɩdɛ́ɛ tɩndɩnáa naanɩ́ ɩbɩ́sɩ ɩkpa Ɩsɔ́ɔ-jɔ́ nɛ́ bɩdɛ́ɛ tɔ́m.