Bɩgabaazɩya 49

Yaakúbu wánɖʊ́ʊ ibiyaalɩnáa fuú na nɔɔ́lɛ alɩbáráka

1 Bɩjɔɔ́ɔ nɛ́,

ngɛ Yaakúbu waayáa ibiyaalɩnáa ɩtɔ́ wɛ sɩsɩ:

«Idúúzi ɖamá,

na mevééri mɩ́ɩ

wenbí sɩ bɩkɔ́nɩ bʊkɔ́mɔ́ɔ́ná mɩ́ɩ ceré wɔ́rɔ́ nɛ́.»

2 Bɔɔgɔ́nɩ nɛ́,

ngɛ sɩsɩ:

«Mébíya,

idúúzi ɖamá iwélesi ɩnɩ́ɩ

mɔ́ɔ́ mɩ́jaa Israyɛ́ɛlɩ sɩ maŋmátɩ mɩ́ɩ wentí nɛ́:

3 Nyɔ́ɔ́ Rʊ́bɛ́ɛnɩ,

nyánáábɩ́lɛ́ móbú kʊ́bɔnɩ́

mááɖáa yɩ lʊrʊ́ʊ mɛ́dɛ́ɛ afobire-daá nɛ́.

Nyáágɩ́lɩ nyénewáa rɩ́ŋa

ɖóni na kʊ́bɔńdɩ.

4 Amá,

nyáágɩ́lɩ kiri-kiri nyazɩ lɩ́m ɖóni ńbɩ.

Bɩlɛ́ nɛ́,

ńdóndoyuú kʊ́bɔńdɩ,

káma,

nyáávɩ́nɩ́ná mɛ́dɛ́ɛ aláa-daá naárʊ máɖaavɩnɩɖɛ́.

5 Mɩ́nyɔ́ɔ́ Simeyɔ́ɔnɩ na Léévi;

mɩ́gɔɔ kʊ́ɖʊḿ gɛ,

lakásɩ tɩtɛ ńzɩ gɛ mɩ́ɩ́lá ná mɩ́zɛ́ɛ́zɩ.

6 Módónvúu mɩ́lakásɩ ngʊ́ bɩlɛ́ gɛ

mádánzʊʊ mɩ́dɛ́ɛ nɔɔdaka-daá;

káma,

mɩ́dɛ́ɛ baaná-daá,

mɩ́ɩ́gʊ́ ɩráa,

ɩlá tɩtɛ lakásɩ ɩcɛ́ náánɩ abaaláa fɩ́ya ńdɩ nʊvɔdolá.

7 Máálá mɩ́dɛ́ɛ baaná tɩtɛ ńgɩ láálɩ́;

malá mɩ́dɛ́ɛ ɩzɩ́sɛɛmɩ́rɛ láálɩ́.

Mánÿaazɩ́ míbíya-bíya málaadɔ́ɔ rɩ́ŋa-daá.

Báyá ɖamá Israyɛ́ɛlɩ laadɔ́ɔ rɩ́ŋa-daá.

8 Nyɔ́ɔ́ Yudáa,

ngoobíya sɩ bɔkɔ́nɩ gɛ betée yéńdi baɖára nya.

Sɩ ngɔ́nɩ gɛ njáárɩ nyábáɖaanáa bolúúzi badɩ nyáázá-daá;

bɩka njaa-dɛ́ɛ bíya ɩkɔ́nɩ bosóm nyáázá-daá ɖʊɖɔ.

9 Mebiyaalʊ́ Yudáa,

nyɔ́jɔɔ́ɔ gɛ nyazɩ guunivalʊ́

wángbáa fanaḿ kɩtɔ́ɔ na kɩbɩ́sɩ kɩraazʊʊɖɛ́ nɛ́.

Gúúní wángám kɩɖʊná-rɔ gɛ na kɩfɩ́nɩ.

A kɩɩvɩ́nɩ,

awéní wánbɩɩzɩ kʊ ɩkʊ́sɩ kɩ.

10 Kowuro-ɖooriká wɔ́nlɔwʊ́ʊ nyɔ́ɔ́ Yudáa nyóɖúgoré-daá;

ngɛ nyébíya‑bíya ndɛ́ gɛ kowuro-ɖɛ́nɩ sɩ ɩwalɩ́

hálɩ bɩtála wɩ́rɛ wenɖé ɩdʊ́ʊ^a sɩ ɩtála nɛ́.

Ɩlɛ́ ɩmʊ́ ɩdɛɛzɩ́ gɛ ɖúúlínya ɩráa rɩ́ŋa sɩ bɔkɔ́nɩ bosóm.

11 Sɩ bɩkɔ́nɩ gɛ bɩlá nyánɖɩnáa nyágbangbɔ́ɔ víinyi fɔɖásɩ

bɩka nɖɩná kpangbɔ́ɔ-bú víinyi wɩlɛnísi.

Víinyi sʊlʊ́m-daá gɛ sɩ ngɔ́nɩ ngbéézi nyágbɩná kúsuuyé;

bɩka ngbéézi nyɛ́dɛ́ɛ kosúu katɩ́nɩ kɩdɛ́ɛ bíya lɩ́m-daá.

12 Nyáázá-bíya-ɖée kazɔ́ɔ wángɩlɩ́ɩ víinyi sʊlʊ́m-dɛ́ɛ ńbɩ,

bɩka nyágálá ɩfʊ́lʊ bɩkɩ́lɩ naalɩ́m fʊlʊmɩ́nɩ.

13 Nyɔ́ɔ́ Zabulɔ́ɔnɩ,

tenkú kidiríni-jɔ́ gɛ sɩ ngɔ́nɩ njɔ́ɔ,

ńna gɛ mɛ́ɛ́lɛwá sɩ tɩkɔ́nɩ tɩ́nzɩŋ́;

bɩka nyɛ́dɛ́ɛ́dɩ ɩfɔ bɩlɛ́ hálɩ Sidɔ́ɔnɩ.

14 Isakáarɩ,

nyɔ́ɔ́ nyɛ́gɛ́ɛ na kpangbɔ́ɔ fɩ́ya ńga

kónɖóm kárɔɔ́wá nasɩ́lɛ lɔwʊtáá nɛ́.

15 Nyááná sɩsɩ ɖɩdáarɛ sɩ njɔ́ɔ ɖɩdaá nɛ́ ɖɩjɔɔ́ɔ kazɔ́ɔ,

ngɛ tɛ́ɛ́dɩ tɩḿ ɖʊɖɔ tɩjɔɔ́ɔ yáásɩ́.

Nyáámʊ́ sʊʊ́tɩ ndɩ́nɩ nyáváámʊ́ʊ-rɔ;

ngɛ nyéédísi nlá yomáa tɩmɛ́rɛ.

16 Nyɔ́ɔ́ Dáanɩ,

sɩ ngɔnɩ ná nvʊʊná nyɛ́dɛ́ɛ ɩráa tɔ́m

ńŋɩnáa Israyɛ́ɛlɩ agó aaganáa sɩ alá bɩ nɛ́.

17 Nyɔ́ngɔnɩ́ nbɩ́sɩ gɛ nyazɩ nɩ́bááwʊ-daá ɖoḿ;

bɔɔzɩ́rɛ ɖilewáa nɩ́bááwʊ kpɔ́mɔ́ɔ́ nɛ́.

Bɔɔzɩ́rɛ ɖɩḿ ɖɩ́nnyasɩ́ ɖeére nʊvɔdóle

na ɖɩdʊ́ʊ ɩkɔrɩ́ ɩsála lééléé.

18 Ówu Mádʊ́ʊ Ɩsɔ́ɔ,

nyánáábɩ́lɛ́ mɔ́jɔɔ́ɔna tamɔ́ɔ sɩsɩ nyɛ́nlɛɛ́ ɖáa.

19 Nyɔ́ɔ́ Gaádɩ,

yooráa wánlɩɩ́ nyɔ́rɔ́,

amá,

nyɔ́nɖɔwʊ́ʊ wɛ.

20 Nyɔ́ɔ́ Asɛ́ɛrɩ,

nyálaadɔ́ɔ sɩ kabá gɛ kalá kíɖíím kazɔ́ɔ ńbɩ;

wúrowá kíɖíím gɛ sɩ kalá.

21 Nyɔ́ɔ́ Nɛfɩtalíi,

nyɛ́gɛ́ɛ koluú kʊwɛ kɩdɩ kɩrɔ

kɩ́nɖʊ́ʊ bíya kazɔ́ɔ ńba nɛ́ gɛ

22 Nyɔ́ɔ́ Ísifu,

nyɔ́jɔɔ́ɔ gɛ nyazɩ tiyɔ́ɔ kánzɩŋ́ buwá kʊjʊʊ́-rɔ nɛ́.

Kɛdɛ́ɛ wʊláázɩ wángbáa bɩfɛ́lɛ koláázɩ.

23 Tɔ́ɔ́nɩ-dɩnáa woojóódi nya

hálɩ bɔtɔ nya nyɩmɛ́,

boyóo nya;

24 amá,

Yaakúbu-dɛ́ɛ Ɩsɔ́ɔ ɖóni-dʊ́ʊ,

ɩgɛ́ɛ Israyɛ́ɛlɩ ńba-dɛ́ɛ ketirú

na bɛdɛ́ɛ bʊ́tangbalʊʊ́ nɛ́ ɩdɛ́ɛ yíko-daá,

bɔdɔ́ɔ́nɩ waawɩ́ɩ koodí,

banára hálɩ bovolá ɩbáázɩ selíi.

25 Njaa-dɛ́ɛ Ɩsɔ́ɔ sɩ ɩsɩná na nya;

Ɩsɔ́ɔ ɖóni-dʊ́ʊ ɩmʊ́ sɩ ɩɖʊ ná nya alɩbáráka;

adɛ-dɛɛzɩ́-dɛ́ɛ alɩbáráka ɩ́kpá nyɔ́rɔ́,

bɩka ɩsɔ́ɔ́dáá ńgɩ ití nyɔ́rɔ́.

Ɩsɔ́ɔ ɩ́ɖʊ́ nya lʊrʊ́ʊ-dɛ́ɛ alɩbáráka,

bɩka ɩɖʊ nyávʊ́ńdɩ kpɩná ɖʊ́ʊ-dɛ́ɛ alɩbáráka.

26 Njaa-dɛ́ɛ alɩbáráka waagɩ́lɩ caanawʊ́ bʊ́ʊ́nɩ

na wenbí bɩrɩ́ŋa booyuú tɩdaá nɛ́.

Nyɔ́ɔ́ Ísifu weení nyénɖíi kʊ́bɔńdɩ ngoobíya-rɔ nɛ́,

alɩbárákawá tɩḿ títi nyágʊjʊʊ́-daá.

27 Bɛ́ɛnɩ-Yáámíínu,

nyɛ́gɛ́ɛ káwʊkáwʊ fɩ́ya ńgɩ gɛ;

tɛ́ɛrɛ́ gɛ nyéngbím fanáńdɩ ndɔ́ɔ,

na ɖaanɩ́ŋa nɛ́,

ndára nyóóyúú bɩ nɛ́.»

28 Tɔ́ɔ,

wenbá booyóózi bama Israyɛ́ɛlɩ agó fuú na náálɛ nɛ́ nbɩlɛ́,

bɩka alɩbáráka bajaa waaɖʊ badaá báa weení nɛ́ nbɩlɛ́.

Yaakúbu-dɛ́ɛ sɩ́m-dɛ́ɛ tɔ́m

29 Bʊwɔ́rɔ́ nɛ́,

ngɛ Yaakúbu waazɩ́ɩ́zɩ ibíya tɔ́mwá tɩna ɖɔ́ sɩsɩ:

«Méngbém mɔgɔ́mɔ́ɔ́ná kʊ́bɔnáa,

a máázɩ́,

iboná ma ikébi majaájaanáa-dɛ́ɛ bʊ́tangbalʊʊ́ bɔɔlááwʊ-daá.

Bɔɔlááwʊ kɩḿ kʊgɔwɛ Efɩrɔ́ɔnɩ Hitíi ńnɩ́-dɛ́ɛ fɔɔ́

30 bánÿaá kɛ Makpéela nɛ́ kadaá gɛ;

kadɩláána Mamɩrée gɛ Kanáanɩ laadɔ́ɔ-daá.

Fɔɔ́ kɛḿ nɛ́,

Ibrahím waamʊ ná kɛ Efɩrɔ́ɔnɩ ńnɩ́ ɩmʊ́ ɩjɔ́ kabɩ́sɩ ɩdɛ́ɛ ɩráa ɖaabimɖé.

31 Waazɩ́ nɛ́,

ńna gɛ beebí yɩ ɩ́na ɩɖɛɛlʊ́ Saráa.

Ńna ɖʊɖɔ gɛ beedébiḿ ibiyaalʊ́ Ɩsaáka na ɩɖɛɛlʊ́ Rebééka;

ńna ɖʊɖɔ gɛ mádɩtɩŋa méébí mɛɖɛɛlʊ́ Léya.

32 Fɔɔ́ kɛḿ na kɛdɛ́ɛ bʊ́tangbalʊʊ́ bɔɔwʊ́ nɛ́,

Hitíi bíya-jɔ́ gɛ baamʊ kɛ.»

33 Yaakúbu waajáŋ ɩwɩ́lɩ ibiyaalɩnáa bɩlɛ́ bɩtɛ́ nɛ́,

ngɛ waabɩ́sɩ ití ɩfɩ́nɩ,

ɩcáŋ itísi weezuú,

ibó ɩkɔ́mɔ́ɔ́ná kʊ́bɔnáa.