Yaakúbu wánɖʊ́ʊ Ísifu biyaalɩnáa alɩbáráka
48
1 Bɩlɛ́ bʊwɔ́rɔ́ gɛ bɔɔgɔ́nɩ befééri Ísifu sɩsɩ ɩjaa wánnyaadɩ́.
Ngɛ wɔɔgbɔ́ɔ ibiyaalɩnáa Manasée na Efɩrayíim bɛɖɛ́ɛ ɩjaa-jɔ́.
2 Beevééri Yaakúbu sɩsɩ ibiyaalʊ́ Ísifu kɛgɛrɛŋɛ sɩ ɩsɛ́ɛ yɩ nɛ́,
ngɛ waajáárɩ ɩdɩ ɩkʊrʊ́ ɩdɛ́ɛ gáɖó-rɔ ɩcɔ́ɔ igutoluú-rɔ.
3 Ísifu waadála nɛ́,
ngɛ ɩjaa wɔɔdɔ́ yɩ sɩsɩ:
«Ɩsɔ́ɔ yíko-dʊ́ʊ waaɖʊ ɩlɩ́ɩ mɔ́rɔ́ Lúuzi,
Kanáanɩ laadɔ́ɔ-daá ɩɖʊ ma alɩbáráka.
4 Wɔɔdɔ́ ma sɩsɩ ɩmʊ́ wánváa ma lʊrʊ́ʊ bɩɖɔ́ɔ,
bɩka iyéle mabɩ́sɩ ɩráa zamɔ́ɔ-dʊ́ʊ.
Mébíya-bíya gɛ ɩmʊ́ sɩ ɩfa laadɔ́ɔ kana sinje hálɩ ceré.»
5 Ngɛ Yaakúbu waadásɩ ɩtɔ́ Ísifu sɩsɩ:
«Nyááná nyébíya nɔɔ́lɛ bana nyáálʊ́rʊ wɛ Mɩ́sɩra naanɩ́ mɔgɔ́nɩ mɔmɔɔná nya nɛ́,
bɛlɛ́,
mebiyaalɩnáa nbɩlɛ́.
Efɩrayíim na Manasée,
mɔ́ɔ́ mádɩɩná bɛlɛ́ ńŋɩnáa mádɩɩná Rʊ́bɛ́ɛnɩ na Simeyɔ́ɔnɩ nɛ́.
6 Amá,
bíya sɩ ngɔ́nɩ nlʊ́rʊ wɛ bʊwɔ́rɔ́ nɛ́ gɛ nyɛ́dɛ́ɛ ńba.
Baɖawaalɩnáa-dɛ́ɛ laadɔ́ɔ-daá gɛ bɛḿ ɖʊɖɔ bɛdɛ́ɛ tííbí wɛ.
7 Máagágʊrʊ́ Padan-Aráamɩ mɛ́ngɛɖɛɛ́ nɛ́,
bɩ́ńgáa cʊ́kɔ na madála Efɩráatɩ tɛ́ɛ́dɩ Kanáanɩ laadɔ́ɔ-daá gɛ ngɔɔ Rasɩ́ɩ́la waazɩ́ mánʊ́ʊ́zɩ-daá.
Ńna gɛ méébí yɩ nɩ́bááwʊ kpɔ́mɔ́ɔ́.»
Efɩráatɩ gɛ bánÿaá lɛlɛɛɖɔ́ sɩsɩ Bɛtɩlɛhɛ́ɛm.
8 Ńna gɛ Yaakúbu Israyɛ́ɛlɩ waagʊ́sɩ ɩna Ísifu biyaalɩnáa,
ngɛ wɔɔbɔ́ɔ́zɩ sɩsɩ:
«Wenbá gɛ bana.»
9 Ngɛ Ísifu woobúsi yɩ sɩsɩ:
«Bíya wenbá Ɩsɔ́ɔ waava ma wɛ Mɩ́sɩra cénjé nɛ́ nbɩlɛ́.»
Ngɛ sɩsɩ:
«Koduuzi wɛ mɔ́jɔ́ mogóóri mava wɛ.»
10 Israyɛ́ɛlɩ waabá ɩbɩ́ɩ ábɔ́nɩ́ páá,
biiyéle waazá tɛfɛ́yɩ́ fɩ́ya ɖʊɖɔ;
ɩ́dándanáa kazɔ́ɔ.
Ngɛ Ísifu woogóduuzi ibiyaalɩnáa ɩjaa-jɔ́.
Ngɛ ɩlɛ́ waaɖʊ wɛ ndɛ́,
ikpíriki wɛ.
11 Ngɛ wɔɔdɔ́ Ísifu sɩsɩ:
«Ɖoo mádafʊ́ńɖʊʊ tamɔ́ɔ ɖʊɖɔ sɩsɩ wɩ́rɛ mánnáa nyáázɩ́rɛ-daá.
Amá,
Ɩsɔ́ɔ weeyéle mana nya,
hálɩ mana nyébíya.»
12 Ngɛ Ísifu waagʊ́sɩ ibiyaalɩnáa ɩjaa nʊvɔ́-rɔ.
Ngɛ weedí ɩwááwʊ ɩjaa ɩzá-daá adɛ.
13 Ngɛ wɔɔɖɔ́kɩ Efɩrayíim na ɩnʊ́ʊ́nɩ kíɖiiwú,
ɩbɩsɩná ɩjaa-dɛ́ɛ nʊ́ʊ́nɩ nɩbɩɩwʊ́-rɔ;
bɩka ɩɖɔ́kɩ Manasée na ɩnʊ́ʊ́nɩ nɩbɩɩwʊ́ ɩbɩsɩná ɩlɛ́ ɩjaa-dɛ́ɛ nʊ́ʊ́nɩ kíɖiiwú-rɔ.
Ngɛ woogóduuzi wɛ batɩlɩná bajaa kʊ́bɔnɩ́ Israyɛ́ɛlɩ.
14 Ngɛ ɩlɛ́ wɛɛgɛ́ɛ́zɩ ɩnʊ́ʊ́zɩ,
ɩkpɔ́ɔ nʊ́ʊ́nɩ kíɖiiwú ɩtɩ́nɩ Efɩrayíim-rɔ,
ngʊ́ ɩlɛ́ gɛ bú;
ngɛ waadɩ́nɩ ɩnʊ́ʊ́nɩ nɩbɩɩwʊ́ Manasée-rɔ.
Bɩka ɩlɛ́ gɛ kʊ́bɔnɩ́.
15 Nʊ́ʊ́zɩ wɛ sɩjɔɔ́ɔ bɩlɛ́ gɛ woogóóri ɩfa Ísifu sɩsɩ:
«Bíya bana,
mánzʊlʊ́ʊ Ɩsɔ́ɔ majaájaa Ibrahím na majaa Ɩsaáka boovu ɩnɩ́bááwʊ nɛ́;
Ɩsɔ́ɔ weení weegéti ma ɖoo bɩrɩ́ŋa nɛ́;
16 malááyɩ́ka weení woovu ma ásíírí nɔwɛ́yawá rɩ́ŋa-daá nɛ́,
mánzʊlʊ́ʊ sɩsɩ ɩ́ɖʊ́ wɛ alɩbáráka.
Bɔ́ɖɔkɩ máyɩ́ɖɛ,
bɔɖɔ́kɩ majaa Ɩsaáka na majaájaa Ibrahím bayɩrá.
Bálʊrʊ bɩlʊ́rʊ bɩɖɔ́ɔ laadɔ́ɔ rɩ́ŋa-rɔ.»
17 Israyɛ́ɛlɩ-dɛ́ɛ wɔɔgbɔ́ɔ ɩnʊ́ʊ́nɩ kíɖiiwú ɩtɩ́nɩ Efɩrayíim kʊjʊʊ́-rɔ nɛ́ waajáárɩ Ísifu páá.
Waana waadɩ́nɩ ɩnʊ́ʊ́zɩ bɩlɛ́ nɛ́ gɛ wɛɛgbɛdɩ́ ɩkʊ́sɩ ɩjaa nʊ́ʊ́nɩ kíɖiiwú ɩmʊ́ sɩsɩ:
18 «Aayɩ́,
bɩdɛkɛ́ɛ bɩlɛ́ baabá,
ceení gɛ kʊ́bɔnɩ́,
tɩnɩ nyánʊ́ʊ́nɩ kíɖiiwú ɩlɛ́ ɩgʊjʊʊ́-rɔ.»
19 Amá,
ɩjaa weegízi sɩsɩ:
«Móbú,
mányɩ.
Manasée ɖʊɖɔ-dɛ́ɛ bíya sɩ bɔkɔ́nɩ babɩ́sɩ zamɔ́ɔ gɛ;
iɖi kʊ́bɔńdɩ,
na bɩrɩ́ŋa,
inewú wángɩlɩ́ɩ yɩ kʊ́bɔńdɩ,
bɩka newúu ɩmʊ́ ɩdɛ́ɛ lʊrʊ́ʊ-daá ɩráa ɩkɔ́nɩ babɩ́sɩ yíriwá ɖabata.»
20 Bɩdɛ́ɛ wɩ́rɛ nɛ́,
wenbí waaŋmátɩ ɩɖʊ wɛ alɩbáráka nɛ́ nɖɔ́ sɩsɩ:
«Mɩ́yɩ́rá gɛ Israyɛ́ɛlɩ bíya sɩ baɖʊná ɖamá alɩbáráka.
Bángʊrʊ́ʊ sɩ baŋmátɩ nɛ́,
bɔ́ndɔ́m gɛ sɩsɩ:
“Ɩsɔ́ɔ ɩ́la bɩlɩɩná Efɩrayíim na Manasée bɛdɛ́ɛ alɩbáráka-daá.”»
Bɩlɛ́ gɛ waaŋmátɩ ɩkpɔ́ɔ Efɩrayíim ɩtɛ́ɛ́zɩ Manasée nɩ́bááwʊ.