Bɩgabaazɩya 46

Yaakúbu waagbɩ́ɩ́rɩ ɩkpɔ́ɔ Mɩ́sɩra nɩ́bááwʊ

1 Ngɛ Israyɛ́ɛlɩ waagbɩ́ɩ́rɩ ɩ́na ɩdɛ́ɛ zamɔ́ɔ na wenbí bɩrɩ́ŋa ɩwɛná bɩ nɛ́ bakʊrʊ́ bɔkpɔ́ɔ Mɩ́sɩra nɩ́bááwʊ.

Boobó batála Bɛrɩsebáa nɛ́,

ngɛ waagʊ fʊ́ńdɩ kpɩná ɩlá ɩjaa Ɩsaáka-dɛ́ɛ Ɩsɔ́ɔ sarásɩ.

2 Kiiyu nuvoowú nɛ́,

ngɛ Ɩsɔ́ɔ waaɖʊ ɩlɩ́ɩ ɩrɔɔzɩ́ ɩtɔ́ yɩ sɩsɩ:

«Yaakúbu,

Yaakúbu!»

Ngɛ Yaakúbu weedísi sɩsɩ:

«Mánááɖɔ́ Mádʊ́ʊ.»

3 Ngɛ sɩsɩ:

«Mɔ́ɔ́ gɛ njaa-dɛ́ɛ Ɩsɔ́ɔ.

Mɩ́sɩra boɖé ɩ́kalá nya nɩdáárɛ.

Káma,

nyándalɩ́ɩ ńna nɛ́,

sɩ meyéle gɛ yíri kʊ́bɔńgɩ ɩbá kɩlɩ́ɩ nyálʊrʊ́ʊ-daá.

4 Mádɩtɩŋa sɩ malaazɩ ná nya moboná.

Bɩlɛ́ ɖʊɖɔ gɛ a nyáagádala,

sɩ malaazɩ ná nyébíya magábɩ́sɩ́ná.

Nyánzɩ́m nɛ́,

Ísifu sɩ ifu ná nyáázá.»

5-6 Ngɛ Yaakúbu na ɩdɛ́ɛ ńba baadákpɩɩrɩ bakʊrʊ́ Bɛrɩsebáa babamáa hálɩ Mɩ́sɩra.

Sɩ bakʊrʊ́ nɛ́,

ngɛ ibiyaalɩnáa wɛɛzɛlɩ́ ɩ́na iwoolináa na bebíya baɖʊ tuuríni wentí Mɩ́sɩra wúro weegéjéle wɛ tɩ nɛ́.

Bɛ́nɖɛɛ́ nɛ́,

bɛɛgbɛdɩ́na bɛdɛ́ɛ fʊ́ńdɩ kpɩná na wenbí bɩrɩ́ŋa bavʊngɔwɛná bɩ Kanáanɩ laadɔ́ɔ-daá nɛ́.

7 Wenbí-daá Yaakúbu wɛɛɖɛɛná bɩ Mɩ́sɩra nɛ́ nbɩlɛ́;

ɩ́na ibiyaalɩnáa na bɛlɛ́ bebíya na ɩwɛɛlɩnáa na bebíya.

Ɩbá ɩ́na igutoluú-dɛ bíya rɩ́ŋa páyɩ́ bɛɛɖɛɛná Mɩ́sɩra.

Yaakúbu-dɛ́ɛ koobíre ɖɩɩdála Mɩ́sɩra nɛ́

8 Yaakúbu kutoluú-dɛ bíya wenbá bɛɛɖɛ́ɛ Mɩ́sɩra nɛ́,

Israyɛ́ɛlɩ bíya nbɩlɛ́;

bayɩrá nɖɔ́:

Yaakúbu-dɛ́ɛ kaɖaa bú gɛ Rʊ́bɛ́ɛnɩ.

9 Rʊ́bɛ́ɛnɩ ɩlɛ́ ibiyaalɩnáa nɖɔ́:

Enɔ́ɔkɩ,

Palúu,

Ɛsɩrɔ́ɔnɩ,

na Karɩmíi.

10 Simeyɔ́ɔnɩ ɩlɛ́ ibiyaalɩnáa nɖɔ́:

Yemuwɛ́ɛlɩ,

Yamíini,

Oháádɩ,

Yakíini,

Sowáarɩ;

Kanáanɩ alʊ́ biyaalʊ́ Sawúuli.

11 Léévi ɩlɛ́ ibiyaalɩnáa nɖɔ́:

Gɛrɩsɔ́ɔnɩ,

Keháatɩ na Meraríi.

12 Yudáa ɩlɛ́ ibiyaalɩnáa nɖɔ́:

Ɛ́ɛrɩ,

Onáanɩ,

Séla,

Perɛ́ɛsɩ na Zeráa;

amá,

Ɛ́ɛrɩ na Onáanɩ bɛlɛ́ baazɩ́ Kanáanɩ laadɔ́ɔ-daá.

Perɛ́ɛsɩ bíya gɛ Ɛsɩrɔ́ɔnɩ na Hamúuli.

13 Isakáarɩ ɩlɛ́ ibiyaalɩnáa nɖɔ́:

Toláa,

Púúva,

Yasúubɩ na Simirɔ́ɔnɩ.

14 Zabulɔ́ɔnɩ ɩlɛ́ ibiyaalɩnáa nɖɔ́:

Serɛ́ɛdɩ,

Elɔ́ɔnɩ na Yaleyɛ́ɛlɩ.

15 Léya biyaalɩnáa waalʊrʊná wɛ Yaakúbu Padan-Aráamɩ nɛ́ nbɩlɛ́,

bána ɩwɛɛlɛ́ɛ alʊ́ Dína.

Ɩdɛ́ɛ aléewá bɛḿ na ɩdɛ́ɛ afobíya na bebíya wooyóózi gɛ balɩ́ɩ ɩráa ákoosaaláa na noódoozo (33).

16 Gaádɩ biyaalɩnáa nɖɔ́:

Sifiyɔ́ɔnɩ,

Hagíi,

Súuni,

Ɛsɩbɔ́ɔnɩ,

Eríi,

Arodíi,

na Arelíi.

17 Asɛ́ɛrɩ biyaalɩnáa nɖɔ́:

Yimináa,

Yisiváa,

Yisivíi,

na Beriyáa;

bána benewú alʊ́ Seráa.

Beriyáa biyaalɩnáa nɖɔ́:

Éburu na Malikiyɛ́ɛlɩ.

18 Aléeré wenɖé Labáanɩ wɔɔgbɔ́ɔ ɖɛ icéle ɩwɛɛlɛ́ɛ Léya bánÿaá yɩ sɩsɩ Zílipa nɛ́ waalʊrʊná Yaakúbu bíya afobíya wenbá na bebíya nɛ́ nbɩlɛ́.

Barɩ́ŋa booyóózi gɛ balɩ́ɩ ɩráa ákɩzaalʊʊ́ na naárʊ (16).

19 Yaakúbu ɖɛɛlʊ́ Rasɩ́ɩ́la biyaalɩnáa nɖɔ́:

Ísifu na Bɛ́ɛnɩ-Yáámíínu.

20 Ísifu biyaalɩnáa Manasée na Efɩrayíim nɛ́,

Mɩ́sɩra gɛ baalʊ́rʊ wɛ.

Bíya bɛḿ nɛ́,

ɩɖɛɛlʊ́ Asɩnáatɩ,

Óoni tɛ́ɛ́dɩ sarásɩ lanɖʊ́ Poti‑Feráa waava yɩ weení nɛ́ waalʊrʊná yɩ wenbá nɛ́ nbɩlɛ́.

21 Bɛ́ɛnɩ-Yáámíínu biyaalɩnáa nɖɔ́:

Béla,

Bekɛ́ɛrɩ,

Asɩbɛ́ɛlɩ,

Géra,

Namáanɩ;

Ehíi,

Rɔ́ɔsɩ,

Mupíim,

Hupíim,

na Áarɩdɩ.

22 Rasɩ́ɩ́la-dɛ́ɛ bíya rɩ́ŋa waalʊrʊná wɛ Yaakúbu nɛ́ na bebíya nbɩlɛ́.

Barɩ́ŋa baalɩ́ɩ gɛ ɩráa ákɩzaalʊʊ́ naárʊ fɛ́yɩ́ (14).

23 Dáanɩ ɩlɛ́ ibiyaalʊ́ gɛ Husíim.

24 Nɛfɩtalíi biyaalɩnáa nɖɔ́:

Yatɩséyɛ́ɛlɩ,

Guníi,

Yetisɛ́ɛrɩ,

na Silɛ́ɛm.

25 Bíla Labáanɩ wɔɔgbɔ́ɔ yɩ icéle ɩwɛɛlɛ́ɛ Rasɩ́ɩ́la nɛ́ ibiyaalɩnáa waalʊrʊná wɛ Yaakúbu nɛ́ na bebíya nbɩlɛ́.

Ɩráa kʊjʊ́nɩ lʊbɛ (7) gɛ barɩ́ŋa baalɩ́ɩ.

26 Ɩráa wenbá barɩ́ŋa boogóvú Yaakúbu bɔkɔ́nɩ Mɩ́sɩra nɛ́,

wenbá baabá bɛgɛ́ɛ ɩmʊ́ Yaakúbu ɩdɛ́ɛ azimá nɛ́ bɛgɛ́ɛ gɛ ɩráa niídoozo na loɖo (66);

bodoyooziná ibiyaalɩnáa-dɛ́ɛ aláa.

27 A bɔɔgbɔ́ɔ Ísifu-dɛ́ɛ bíya lɛ́ɛ́nɩ́ waalʊ́rʊ wɛ Mɩ́sɩra nɛ́ boyóózi,

barɩ́ŋa wenbá bɔɔgɔ́nɩ Mɩ́sɩra nɛ́ baalɩ́ɩ gɛ ɩráa niídoozo na saaláa (70).

Wenbí bɩɩlá Yaakúbu waadála Mɩ́sɩra nɛ́

28 Sáátɩ wenkí bɔɔgɔ́nɩ bakájʊ́ʊ́ná Mɩ́sɩra nɛ́,

ngɛ Yaakúbu waalɩzɩ́ ibiyaalʊ́ Yudáa itíri Ísifu-jɔ́ sɩsɩ bákpɩɩrɩ baɖáŋ ɩmʊ́ ɩdɛ́ɛ talɩ́ɩ Goséníi fáráńdɩ́.

Sáátɩ wenkí Yaakúbu na ɩdɛ́ɛ ńba baadála Goséníi nɛ́,

bɩdɛ́ɛ sáátɩ ɖʊɖɔ gɛ

29 Ísifu weeyéle bɔfɔ́kɩ ɩdɛ́ɛ awéńja túúruú ɩkágʊ́rʊ́ ɩkɔ́nɩ ɩsɩ́ŋ ɩjaa.

Sáátɩ wenkí waadála ɩjaa Israyɛ́ɛlɩ ɩzá-daá nɛ́,

ngɛ waanyáa ikpí yɩ iwíi bilééri.

30 Ńna gɛ ɩlɛ́ wɔɔdɔ́ yɩ sɩsɩ:

«Mááná nya nyɔ́wɛ weezuú-daá ɖɔ́ nɛ́,

báa lɛlɛɛɖɔ́,

mánbɩɩzɩ́ mazɩ́.»

31 Ngɛ Ísifu wɔɔdɔ́ igoobíya na ɩjaa-dɛ́ɛ koobíre ɖɩrɩ́ŋa ɖiigóvú yɩ nɛ́ sɩsɩ:

«Tɔ́ɔ,

lɛlɛɛɖɔ́ mɩ́ɩ́dála ɖɔ́ nɛ́,

mónboɖé megéveeri wúro Farawʊ́na sɩsɩ mogoobíya na majaa-dɛ́ɛ zamɔ́ɔ bavʊngɔwɛ Kanáanɩ nɛ́ bɔɔgɔ́nɩ bɔmɔɔná ma.»

32 Ménveerím yɩ ɖʊɖɔ sɩsɩ mɩ́ɩ́gɔ́nɩ nɛ́,

mɩ́gɛ́ɛ fʊ́ńdɩ kpɩná ketiráa gɛ;

ngɛ sɩ ɩkɛ́ɖɛɛ nɛ́,

mɩ́ɩgɛ́gbɛ́dɩ́na mívééni,

mínémísi;

mɩ́náánɩ na wenbí bɩrɩ́ŋa mɩ́gɔwɛná bɩ nɛ́.

33 A weedíri bayáa mɩ́ɩ gɛ wɔɔbɔ́ɔ́zɩ mɩ́ɩ sɩsɩ mɩ́dɩmɛ́rɛ gɛ wenɖé,

34 ibúsi yɩ sɩsɩ:

«Kʊ́bɔnɩ́,

ɖoo ɖébijáádɩ hálɩ na sinje,

fʊ́ńdɩ kpɩná gɛ ɖéngetí ńŋɩnáa ɖájaájaanáa waavʊ́ńlaḿ bɩ nɛ́.»

A mɩ́ɩ́dɔ́ yɩ bɩlɛ́,

wɔ́ndɔ́m mɩ́ɩ ɩwalɩ́ Goséníi fáráńdɩ́.

Káma,

Mɩ́sɩra ńba na fééni na nemísi ketiráa bódónÿoozi bɔcɔ́ɔ.