3
Daji Naumiye kǝsainjuro:
«Rut,
feroni,
niro kwa manjǝgǝkki,
kwa duwon fannjulan sǝɍiwo-a nanlewa-a fandǝmi.
2 Fane,
Bowos adǝ nia kolnje ferowanju ngimba gammadǝ kǝraminde,
gǝna?
Asarjiya,
ti kǝlanju leje na wasturamben laladu sayirre curui.
3 Daji kasaldǝne kawudi cindǝgǝne kajǝmuwanǝm shawa yakke,
lene na wasturambedǝro.
Amma lenǝmiya,
bare tiro fǝledǝgǝmmi,
sai kǝmbo juwe diben caiya duwon.
4 Sa leje bojiya,
na bojǝnadǝa ngǝlaro rui.
Daji kǝnǝm ngojiya,
nanjuro lene,
jakturamdǝa kanji sinjuyen sǝɍingǝgǝne nadǝlan bone.
Ngawo adǝyen ti niro awo dioyedǝa wulnjiyi.»
5 «Awo wulsǝgǝmma sammaa dikki.»
6 Rut nadǝro leje awo kǝsainju wuljǝnadǝa kalkallo kido.
7 Bowos kǝmbo juwe diben kianniya,
karwunju kǝji cije leje na juwu sayirre tǝrǝm capkadayen boyeno.
Bowos kǝnǝm cǝdi duwon,
Rut hangallayen nanjuro leje jakturamdǝa sǝɍinjiye kanji sinjuyen boyeno.
8 Daji dawu buneyen Bowos njǝrakce ciyeno.
Fuwunju kirunniya,
kamu kanji sinjuyen bowada.
9 «Wundu ni attǝ?»
«Wuma Rut.
Ni kǝramini karǝnne,
kǝrami duwon kurwowuni ngoduma.
Marne,
niyasǝne!»
10 «Kǝmande niro barga dǝmnjuwo.
Kǝngayi kǝrmaye jama kwanǝmbero fǝlegǝmmadǝ cayea kojǝna.
Dalilnjudǝ jairo bi ngudi,
bi gaɍiwu niyaro manǝmmi.
11 Ngǝla,
bare karwungai falma dimmi!
Jamande samma nia kamu darajaaro nonjanadǝro,
awo wulsǝgǝmma sammaa dikki.
12 Jire wu kǝraminǝm karǝnne rangǝkke nankurwowunǝm ngokki,
amma kam laa kǝraminǝm wumaa nankarǝnnin kosǝna mbeji.
13 Bone na adǝlan bune kojo duwon,
baɍi suwa nankurwowunǝm ngojia,
ruiyo.
Kasaccǝna yenoa,
to,
nankurwowunǝm ngojo.
Wayenoa,
Kǝmande mbejidǝ jiredǝ gai,
kansi njǝbbukkǝna wu kurwowunǝm ngokki.
Kǝrma bone har suwaro!»
14 Rut kanji sinjuyelan boyeno.
Bowos bare kamu adǝ nanjuro isǝnaro nojanni cǝne Rutta suwa lǝp sa wunduma kamanjua asujiwawolan kisango.
15 Bowosse:
«Rut,
acca gawaranǝm tuluwe tia ngǝlaro tai!»
Acca gawaranju tiro sajiye ngal arakku sayirre alama tiya findi gai fijiye kǝlanjuro ngoyeyeno.
Daji Bowos tia kolje bǝlaro wallada.