4
Bowos ngaworam bǝlayero leje na lamar dioyen napkeno.
Sadǝman towo kǝrami karǝnne Yelimalakke Bowos Rutto jandenju cǝddǝnadǝ kodu cǝdi.
Bowos tia bowoje:
«Kǝramini,
are na adǝn namme!»
Kamdǝ ise napkenniya,
2 Bowos amwurawa bǝlaye mewu bowoje tayiro nanjulan napca cǝne napkera.
3 Daji kǝrami Yelimalakkedǝro:
«Nonǝmma gǝna Naumi lardu Mowabbelan walde isǝnaro?
To,
fane!
Naumi kulo kǝraminde Yelimalakkedǝa ladoro cijǝna.
4 Wu ye lawar adǝa niro wulnjǝgǝkke,
koro nia galanjǝkke tia fuwu amwurawa bǝlayen koro fuwu cammo adǝyen yiwumi yekko.
Njuwonju raammaa,
yiwe tia!
Amma yiwumbawoa,
wuro wulsǝgǝne,
kǝrmaman nokko!
Dalilnjudǝ niro kajia,
kam gadero njuwonju wajipcǝgǝnni.
Ngawo niyen awo adǝa njuwoma sai wu.»
«Wuma tia yiwukki.»
5 «None ngǝlaro,
yim duwon kulo adǝ mukko Naumiyen fandǝmmadǝn,
dole Rut lardu Mowabbe kuren kamu Malonnedǝa kamuro ngonǝme,
kǝraminde bawojǝnaro kaduwu magǝme kulo adǝa warasaro kolgǝmi.»
6 «A'a,
rangǝkke kulodǝa yiwukkiwawo,
bare warasa kaduwuniye basarnǝkkǝni nangaro.
Kulodǝ njuwonju wajimsǝgǝna yaye,
wu rangǝkkiwawo.
Ni yiwe kǝlanǝmbo!»
7 Kure lardu Israyilayen lamar cidi luwaye yaye,
kǝnjoye yaye tǝdiya,
sunonǝm fal tuluwume kamdǝro yimi,
dalil lamardǝa kibburo tabbattuwuro.
Suno adǝ naptu shedaye cǝdi.
8 Adǝ nangaro kam kulodǝa njuwo wajipcǝgǝnadǝ:
«Bowos,
kǝlanǝmbo yikkuwe!»
Daji kamdǝ sunonju fal cuttuluwe Bowosso keno.
9 Bowos amwurawa bǝlaye-a jama nga-aro:
«Ku nayi samma sheda,
mukko Naumiyen awowa Yelimalakke-a koro tadawanju Malon-a Kiliyon-aye-a sammaa fandǝkkǝna,
10 koro Rut lardu Mowabbe kuren kamu Malonnedǝa kamuro ngokkǝna.
Ngaima Malon kaduwu warasanju boma cuwandi ye,
koro cunju curo kǝramiyanjuyen-a curo lamar bǝlayen-a facciyiwawo.
Ku nayi samma sheda!»
11 «Andi samma sheda!
Kǝmande kamu niyanǝmidǝa kǝndambimaro cǝdo,
jiɍi Rahila-a Leha-a kamuwa Nawi Yakubayedǝ gairo!
Tayi yindima ya jama Israyilawu sammaye wo.
Ni ye Ifǝratarin kam jaumaro darajaaro walle!
Cunǝm bǝla Baitalamiyen culuwo!
12 Kǝmande ni-a kamu adǝ-aro yalla ngǝwu njado!
Kaduwunǝm jaumaro ngǝwu ye,
darajaa yero waljo,
alama kaduwu kaarinde Feres tada Yahuda-a Tamar-aye gairo!
Tamardǝ kwanju bawojǝnaro kaduwu majuworo Feressa kembo.»
13 Daji Bowos Rutta kamuro ngoyeno.
Ti-a bojane,
barga Kǝmandeyen curo ngoje tada kongwa kembo.
14 Kamuwa Baitalamiye Naumiro:
«Wuse,
Ala!
Kǝmande nia kǝrami kistuwuma baworo kolnjǝnni.
Ku diwunǝm tambǝna.
Lardu Israyilayelan cunju culuwo!
15 Karwunǝm kǝjijiye curo nankǝmurjonǝmben nia bananjiyi,
awoa kǝsainǝm kǝrawomanǝm tia cambo.
Kǝsainǝm Rutdǝ nanǝmnin tada tulurro ti ngalwo!»
16 Daji Naumi tadadǝa ngoje tǝgam ce tia isawurayeyeno.
17 Kǝmaskiyanju kamuwaye:
«Naumi tada cuwandǝna!»
Daji tiro cu Wobed kedo.
Ti adǝma Yisaiye bawanjuro walyeno.
Yisaidǝ bawanju Nawi Dauda mai Israyilaye.