2
Curo bǝladǝyen kǝrami Naumiye laa kanji kwanju Yelimalak bawojǝnayen mbeji.
Kam adǝ kam kura ye,
arsiyima ye,
cunju Bowos.
2 Yim laa Rut kusotto lardu Mowabbe Naumiro:
«Kolsǝne kulo laaro lekko kuloma laa nagǝkko kasacco kalakala dikke!»
«Lene,
feroni.»
3 Daji kuloro leje ngawo kalawuye jǝgane kǝla sayirre tilo tilo doro ngǝskeno.
Ase,
kulo adǝ kulo Bowosse,
kǝrami Yelimalakke.
4 Sa laa Bowos ti kǝlanju bǝlalan kadio.
Kalawudǝa lewaje:
«Kǝmande nayia bananjaa!»
«Kǝmande niro barga dǝmnjuwo!»
5 Daji kidamanju kǝla kalawuye kuromaaro:
«Amida adǝ wundu?»
6 «Amida lardu Mowabbe kamu Naumi-a Mowabnin kallo isanadǝ.
7 Wua suwore tia kollǝkko kalawudǝa jǝga,
kǝla sayirre na kalajanadǝn cudoro yeno.
Tǝn suwayen kadio kalakala cǝdi.
Gana laaro gǝnia,
fǝrdu ngǝrwoyen tussǝnni.»
8 Daji Bowos Rutta bowoje:
«Feroni,
ngǝlaro fane!
Bare kulo gaden lenǝme dorǝmmi,
namme na adǝn!
Ferowani ngimbaro kǝldǝgǝne,
hangalnǝm kanji kulo kidawuni kalajaidǝyero ye!
9 Ferowani ngimba ngǝlajiya capcaiya,
ngawonja gai!
Fane,
jairowaro bare nia lenjanni nǝkkǝna.
Ngudu fanǝmiya,
lene gǝmdowa casǝmbǝɍǝnadǝlan yai!»
10 Rut fuwunjulan tungurumje ngumnju cidin gǝnaje:
«Awiro ngai ngaaro wua ngǝlaro sǝdami?
Awiro wu lardu gaden isǝkkǝnaro suwoldǝmi?»
11 «Wuro awowa ngawo kwanǝm bawojǝnayen kǝsainǝmbo yiddǝmma sammaa mǝnamǝnasaana.
Nokkǝna yanǝm-a bawanǝm-a lardunǝm tambǝmma-a kollǝme dawu jama kure nonǝmmiyen napturo kadim.
12 Ala barga njo!
Ala Kǝma Israyilawuye nia njǝɍiworo nanjuro isǝmmadǝ,
Kǝmande nia ngǝlaro bananjuwo!»
13 «Ala kawu njo,
wuro ser ngǝwu sǝddǝmma.
Wuro mana kǝji kǝji wulsǝgǝme roni bojǝna,
wu duwon feronǝm ngimba falle gaima tikkǝnidǝ!»
14 Sa masǝna dioyen,
Bowos Rutto:
«Feroma,
are andi-a ni-a kǝmbo kallo buiyo!
Burodi ngone curo ingi inabbero yakke ngǝre!»
Gǝre kalawuyen napkenniya,
Bowos tiro njaimu ce,
cǝminde tǝn jǝgǝre har gapkeno.
15 Cije leje kalakala badiyenniya,
Bowosse kidawunjuro:
«Kollowo tia katte dameyadǝyeman cudoro,
bare tiro dapkǝgǝwwi!
16 Curo dameyadǝyeman laa fiddowo cidiro kollowo.
Cudoriya,
bare tiro lawala yidduwwi!»
17 Rut kulolan ngǝlajiya cudori ngai duwon,
dunia lǝmdu badiyeno.
Ngǝlajiya ania kǝskan bakce juwuro kido.
Ngailan sayir jowo fal kiwando.
18 Jowonju ngoje bǝlaro leje kǝsainjuro sayir cuwandǝnaa fǝleyeyeno,
koro gapto kǝmbonjuye gǝnajǝnadǝ yea cuttuluwe tiro keno.
19 Naumiye:
«Wai,
ku kǝjinde!
Ndaran ani ngaa kiwandǝm?
Kulo wunduyen kida kidǝm?
Kǝmande kam niro ngisnjǝgǝna adǝro barga dǝpcuwo!»
«Kam nanjun ku kida dikkǝnadǝ cunju Bowos.»
20 «Kǝmande amannju kanji andi rondea-a kwawande sanuna-a koljǝnni.
Kǝmande tiro barga dǝpcuwo!
Ti adǝ amnde sanunaye kǝraminja karǝnne,
kǝramiya andiro kistuwumayen falnja.»
21 «Koro wuro kidawunjuro kǝldǝgǝkko har kaladǝa cesero yeno.»
22 «Jaumaro ngǝla ferowanju ngimba game kidanǝmidǝ.
Kango kulo kam gadeyero leyemba,
nia basarnjai.»
23 Rut ferowa ngimba Bowossero kǝldiye lejane ngǝlajiya cadori duwon,
har kala sayirre-a algamaye-a kero.
Daji na kǝsainjuyen napkeno.