Lawar aman katte Ala-a Nawi Nuhu-ayen tabbattuwuye
4
20 Daji Nuhu kau capce Kǝmandero na laya duwaduram kidandǝnniya,
curo lǝman-a ngudo-aye halal jiɍi nguson fal fal layaro ngoje,
kǝla layaramdǝyero gǝnajiye duwaje,
kannun tǝgǝmbo warje buwuro kido.
21 Kange cije Kǝmande kǝjinju fangenniya,
fasse:
«Adǝ fuwun kam nangaro cididǝa baskukkiwawo.
Tǝn gananjun awo karwunju cǝraana sawiso niadiwi yaye,
gadero cididǝa baskukkiwawo.
Alauwa roa sigǝkkǝnadǝ gai,
gadero sigǝkkiwawo.
22 Kawu dunia ciji ngaro,
tǝmmaro nangǝɍi-a biyila-a,
kaku-a kausu-a,
binǝm-a be-a,
bune-a kausu-a kamdiwawo.»
31 Daji Ala Nuhu-a tadawanju-aro barga dǝpciye:
«Kaduwuaro wallowo,
ngǝwunowo,
dunia ngaro tatardǝgǝnowo,
nammowo!
32 Lǝmanna kura yaye,
tǝngǝɍi yaye,
ngudo yaye,
buni yaye,
sammaa mukkondoro yakkǝkkǝna,
nayia rinjanaro dasayi.
33 Awowa roa lejai sammaa kǝmboro nayiro njadǝkkǝna.
Calan nayiro awo kǝɍiso kǝmboro njadǝkkǝna,
kuan fuwun awi yaye amarnjagakkǝna.
34 Amma bare da bunju fidǝnnia ngǝruwwi,
budǝ naptu roye cǝdidǝro.
35 «Awo bu kambe fije cejǝnamadǝ,
ti yero shara roye yiddǝkki.
Lǝman fadoye yen kal,
karaaye yen kal,
kam yen kal,
awo fi yaye kamba roro cejǝnamadǝro wowomnju yiddǝkki.
36 Kam duwon kamanjua roro cejǝnamadǝ kollowo,
tiye ye ronju cattuluwo,
dalilnjudǝ wu Ala kamba kǝlani gairo alakkekko.
37 Nandidǝ yalla yambowo,
kaduwuaro wallowo,
ngǝwunowo,
dunia ngaro tatardǝgǝnowo,
nammowo!
39 «Kǝrma nandi-a kaduwundo-aro aman njadǝkkǝna,
40 koro alauwa roa mukkondon dasaane dǝɍyidǝn caluwuna sammanja yero aman yikkǝna.
41 Wudǝ wadu ngokkǝna,
gadero ingi tufanaye nodǝkke awo roa sammaa sulat baworo cǝdiwawo.
Gadero ingi tufanaye dunia juwuiwawo.
42 «Aman nandi-a awowa mukkondon dasaana samma-aro njadǝkkǝnadǝ,
diwun diwurinno kollǝkkiwawo har abada.
Amandǝye tabbattuwuramnju mbeji.
43 Kabbini curo keyerayen gǝnakki.
Adǝma tabbattuwuram aman katte wu-a dunia-aye wo.
44 Sa fi duwon keyera sangǝkke curonjun marama fǝlediya,
45 wadu nandi-a awowa roa jiɍi nguson-aro ngonjagakkǝnadǝa tangǝkki.
Gadero ingi tufanaye awowa roa sammaa sijiyiwawo.
46 Sa fi duwon keyera ngojiye curonjun marama fǝlede rukkiya,
aman katte wu-a alauwa roa jiɍi nguson-aye har abadaro namdiwawodǝa tangǝkki.
47 «Maramadǝma tabbattuwuram aman awowa roa duniaye sammaro yikkǝnaye wo.»