Lawar ingi tufanaye
3
Daji Kǝmandeye:
«Nuhu,
curo am jaman adǝyen ni runǝm jiremaro njurukkǝnadǝ,
ni-a am fannǝmbe samma-a dǝɍyidǝro ngawowo.
2 Koro lǝman halal jiɍi nguson bi-a karwudi-a tulur tulur ngone,
curodǝro yakke.
Harambe yen yindi yindi bi-a karwudi-a ngone.
3 Ngudo ye jiɍi nguson bi-a karwudi-a tulur tulur ngone,
curodǝro yakke,
fuwun dunian kasuniaro waljaro.
4 Adǝn fuwun kawu tulur cǝdiya,
duniaro bune-a kausu-aro kawu fidewuro ingi yiddurǝkke alau roa alangǝkkǝna sammaa sigǝkki.»
5 Nuhu ye awo Kǝmande tiro manajǝgǝna sammaa kido.
6 Jaman ingi tufanaye isǝnadǝn,
Nuhu dunian kǝrwunju yer arakku.
7 Daji ingi tufanayedǝro kaduro Nuhu-a tadawanju-a kamunju-a kamuwa tadawanjuye-a dǝɍyidǝro kasargawo.
8-9 Lǝman kuran ganan halal so,
haram so,
ngudo so yindi yindi bin karwudin na Nuhuyero isane Nuhu wada Alaye jǝgane tayia curo dǝɍyidǝyero kekko.
10 Ngaima ngawo kawu tulurredǝn ingi tufanaye duniaro kadio.
11 Nuhuye kǝrwunju yer arakku kǝndawu yindiye kawu mewu tuluriadǝ,
cidi fǝrǝmde ingi cidiyaye culuwe dama baworo fiyada.
Ingi toɍiye ye cinju samma kadǝne
12 bune-a kausu-aro kawu fidewuro ingi duniaro kiduro.
13 Yim adǝa waidǝ,
Nuhu-a tadawanju Samu-a Hamu-a Yafisu-a kamunju-a kamuwa tadawanju yakkuye-a dǝɍyidǝro kasargawo.
14 Lǝmanna fadoye-a karaaye-a kuran ganan jiɍi nguson-a ngudo jiɍi nguson-a awo fewedoa samma-a nanjan mbeji.
15-16 Alau roa jiɍi nguson yindi yindi bin karwudin na Nuhuyero isane Ala tiro manajǝgǝnadǝ gairo dǝɍyidǝro kasargawo.
Daji Kǝmande cinna dǝɍyiyedǝa kǝrǝp jakkeyeno.
17 Kawu fidewuro ingi tufanaye duniaro kadio.
Ngaima ingidǝ ngǝwuje dǝɍyidǝa kǝla samenna cǝsange kǝla ingiyen lejiro walyeno.
18-20 Ingi ngǝwuje tardi ngǝwuje tardi duwon,
har toɍi kau dadu kuruwuaye sammaa lǝpkeno.
Koro ingi duno cǝde kauwadǝa alama ja mewu wurimaa kojǝnaro lǝpkeno.
21-22 Awowa roa cidilan lejai samma siyera,
ngudo yen kal,
lǝman fadoye-a karaaye-a kuran ganan yen kal,
kam yen kal,
alau duwon tiro Ala ro cina samma kasuno.
23 Awo roa-a dunia-a faidana.
Kam so,
lǝman kuran ganan so,
ngudo so sammanja dunian sijana,
sai Nuhu-a alauwa nanjun curo dǝɍyidǝyen dasaana-a gapca.
24 Ingidǝ kǝla duniayen kawu mian fiwunno boyeno.
31 Ala Nuhu-a lǝmanna fadoye-a karaaye-a kallo curo dǝɍyidǝyen dasaanadǝa koljǝnnidǝ,
curo kawu aniyen karuwa duniaro cunode ingidǝ fuludu badiyeno.
32 Luworam ingi cidiyayesodǝa lunje,
ingi toɍiye ye cinju sammaa jakce,
ingi sameye royeno.
33 Ingidǝ fuludi fuludi adǝgai,
kawu mian fiwundǝ kidǝnniya,
daji fuluwada.
34 Kǝndawu tulurre kawu mewu tuluriadǝ dǝɍyidǝ curo lardu laa tiro Ararat caniyen kǝla kau kuruwu laayen napkeno.
35 Ingidǝ fuludi adǝgai duwon,
kǝndawu mewuye kido.
Kǝndawu mewuye kawu falladǝ,
kǝri kauwayeso turuiro walyera.
36-37 Ngawo kawu fidewuyen Nuhu taga dǝɍyidǝro cǝddǝnadǝa fǝrǝmgenniya,
ngawu kolje kiluwo.
Amma ngawudǝ waldǝnni,
na adǝro farji na todǝro farji duwon,
har ingidǝ fulude dayeno.
38 Ngawo adǝyen ingidǝ dajǝna la dajǝnniro kuroro Nuhu bullam cunode leyeno.
39 Kuamison dunian jauro ingia nangaro cidin na jǝptuye cuwandǝnnidǝ,
na Nuhuyero walde dǝɍyidǝro kadio.
Nuhu mukkonju sajiye tia cǝdane dǝɍyidǝro kalakkeyeno.
40 Koro kolje kawu tulurro napkenniya,
walde bullamdǝa cunode leyeno.
41 Kajirinjua bullamdǝ nanjuro walladanniya,
cinjun kalu jaitunne bǝɍinno fǝkcǝnaa kadio.
Adǝn ingidǝ fulude dajǝnaro Nuhu asuyeno.
42 Kawu tulurro koro napce walde bullamdǝa kinodǝnniya,
kuadǝ nanjuro waldǝnni.
43 Nuhuye kǝrwunju yer arakkun lukko tilonne kǝndawu burwoye kawu falladǝ,
bawo ingidǝa cidi cana.
Daji Nuhu kǝla dǝɍyidǝyea kayenniya,
cididǝ ngamdu cǝdiro kiro.
44 Kǝndawu yindiye kawu findi tuluriadǝ cidi samma nyau ngamjǝna.
45 Daji Alaye:
46 «Nuhu,
ni-a kamunǝm-a tadawanǝm-a kamuwa tadawanǝmbe-a arowo,
dǝɍyidǝn luwowo.
47 Awowa roa nanǝmnin dasaanadǝ ngudo so,
lǝman kuran ganan so sammaa tuluwe duniaro tardaa,
kasuniaro walja ngǝwuja!»