Lawar aman ndǝpta katte Ala-a Nawi Nuhu-ayen
2
9 Akko lawar Nawi Nuhuye.
Ti Nuhudǝ jirema,
curo am jamannjuyen tima taldu bawoaro Alaa jǝgana wo.
Ti-a Ala-a kattenja kǝlewa salai.
10 Tadawanju yakku,
tandima Samu-a Hamu-a Yafisu-a wo.
11-12 Kuro Alayedǝn dunia bannadǝna,
ndarason lawala mbeji.
Am duniaye samma yessane jawal koljana.
13 Adǝ nangaro Alaye:
«Nuhu,
am duniaye sammaa siduwuro niakkǝna,
tayiramnin dunia ngaso nankǝladon cǝmbǝɍǝna.
Fagatto tayi-a duniadǝ-a baworo dikki.
14 Nidǝ kǝska calle,
dǝɍyi ingiye alama sanduwu mafǝndi gai kǝlanǝmbo tǝkkare,
curonju-a ngawonju-aso koltalan lunne cinne,
curon ngimso tǝmme!
15 «Akko dǝlwu dǝɍyidǝa karoye:
Nankuruwunju ja yer yakku,
nanfaraknju ja fiwu,
dadunju ye ja fiakkuro de.
16 Sǝgǝrinju falnin cinna gǝnane,
koro soro cidiyaye-a dawuye-a sameye-a yakku tande.
Daji dǝɍyidǝye kǝla jange,
yindikatte kǝladǝ-a sǝgǝridǝ-ayen ja fal kolle.
17 «Wudǝ ingi tufanaye duniaro kudǝkke awo roa cidilan dǝgana sammaa sigǝkki.
Alau fi yaye lardulan bawoji.
18 Amma niro aman njikke dǝɍyidǝro ngaami.
Tadawanǝm-a kamunǝm-a kamuwa tadawanǝmbe-an kundenno ngawuwi.
19-20 Ngudo so,
lǝman kuran ganan so,
jiɍinja ngasoye yindi yindi nanǝmbo isai,
ronja caɍiworo.
Awo roa sammaye bi-a karwudi-a ngone,
curo dǝɍyidǝyero yakke,
nanǝmnin roa dasaaro.
21 Koro awo tuwui jiɍi jiɍi yea ngone,
dǝɍyidǝro yakke gǝnane,
ni-a alauwadǝ-a awo kǝmboye fandoworo.»
22 Nuhu awo Ala tiro wuljǝgǝna sammaa kalkallo kido.