Lawar Ala Israyilawua rijaptuye
12
22 Musa Israyilawua cakke bǝrǝm Malialan cijane kanji karaa Shur caniyedǝa keda.
Karaa adǝn ledu kawu yakkuye ingi cawandǝnnin kedo.
23 Na laa Mara canidǝro kadiranniya,
ingi nadǝyedǝ cǝm nangaro rakcane casanni.
Adǝ nangaro nadǝa Maranin bowoyera,
maana Marayedǝ cǝm.
24 Daji jama Musan cesirǝne:
«Awi yaiye?»
25 Musa Kǝmandea cuwore,
Kǝmande tiro kǝska laa fǝleyeyeno.
Musa kǝska adǝa ingidǝro kolyeyenniya,
kǝnjaro kǝjiro walyeno.
Nadǝman Kǝmande jamaro wada so,
ada so ce tayia rijapce:
26 «Wu Kǝmando Alaa kǝla hangallen kǝrsuwia,
awo jire nǝkkǝnaa diwia,
wadawani sammaa gawia,
nayiro kasuwa Masarwuro juwagǝkkǝnadǝye falma juwanjagakkiwawo.
Wu Kǝmando curondon dǝgakkǝnadǝ,
wuma nayia isanganjagakki.»
27 Daji Israyilawu na laa Yelim cani nadǝn sim ingiye mewun yindin-a ya diwinoye fitulur-aro isane karǝn ingidǝyen napkera.
31 Jama Israyilawuye samma Yelimnin cijane kǝndawu yindiyeye kawu wuria Masarnin caluwunayen karaa bowu Sin caniro kadira.
Karaa adǝ katte Yelim-a kau kuruwu Sinai cani-ayen kǝrga.
32 Curo karaa adǝyen jama Israyilawuye samma Musa-a Haruna-an cesirǝne tayiro:
33 «Ca Kǝmandedǝ andia Masarnin na kulowande kaluye danin cap casǝmbǝɍǝna koro na burodinde rayiyenaro buiyen seyesǝnama gǝna ngǝla wo!
Nayi andi sammaa karaa adǝro kǝnaye seyesoro wa sewuduw?»
34 Kǝmandeye:
«Musa,
ngo nayiro samen burodi finjagakki.
Yim fi yaye jama caluwo,
kǝmbonja yimdǝye cadoro.
Tayia manani ngojana ra ngojanniro rijammǝkki.
35 Yimbe arakkua kǝmbonja cadorǝnadǝa dejaiya,
yindiro yim gadeyedǝa kawakci.»
36 Musa-a Haruna-a Israyilawu sammaro:
«Kǝmande tin yiruwi fanjǝna.
Adǝ nangaro ku kajiri nayiro da njadǝne ngǝruwe,
tima nayia Masarnin njattuluworo nonuwi.
37 Koro baɍi suwa ye nayiro kǝrmainju fǝlenjagane burodi njadǝne tǝn kulluwi.
38 Andi awi duwon har andin yiruwi?
Andin gǝni Kǝmanden diye yiruwi.»
39 Musaye:
«Haruna,
jama Israyilawuye sammaro wulgǝne,
Kǝmandea karǝnja,
sonja fanjǝna nangaro.»
40 Haruna jama Israyilawuyero jandejiyi duwon,
kanji karaayero meyeranniya,
ngo kǝrmai Kǝmandeye curo fofou cǝk daadayen tayiro fǝleduwo.
41 Kǝmandeye:
42 «Musa,
so Israyilawuyea fakkǝna.
Tayiro wulgǝne,
dunia lǝmjiya,
da jagari,
baɍi suwa ye burodin kuljai.
Ngainin wu Kǝmando Alaro nosai.»
43 Kajiridǝma fǝrfǝr kada farjane isane na tayi dasaanaro fidagane na baworo walyenniya,
Israyilawu tayia cadane gegǝro.
Koro wayenniya,
suwa karaa na dasaanadǝa kǝlangu jǝpce dirije kǝljǝna.
44 Kǝlangu baworo walyenniya,
kǝla cididǝyen awo laa tǝngǝɍi tǝngǝɍi sim argǝmbemaa cǝdǝnni kollada.
45 Israyilawu tia kerunniyama,
awimaro nojannidǝ,
kattenjan:
«Attǝ awi?»
Musaye:
«Burodi Kǝmande andiro kǝmboro sadǝnamadǝ.
46 Kǝmandeye:
"Wundu yaye awo tia cǝdi ngojo,
kam nguson ngal dewu.
Wundu yaye am leimanjuyeye ngojo!"
yeno.»
47 Awo Musa tayiro wuljǝgǝnadǝa Israyilawu kedo.
Am laa ngǝwu ngoja,
laa ye gana ngoja.
48 Amma awo ngojanaa ngalyeranniya,
kam ngǝwu ngojǝnadǝ tiro ngǝwujǝgǝnni,
koro gana ngojǝnamadǝ ye tia maujǝnni.
Wundu ye awo kǝmbonjuro kalkal ngojo.
49 Musaye:
«Bare wunduma baɍi suwaro gǝnajǝnni!»
50 Am laa mananjua fanduro wajane suwaro gǝnayeranniya,
kǝmbonjaro kanji ngaye kinajiro walyeno.
Daji Musa tayiro gǝrgayeyeno.
51 Suwa nguson Israyilama fi yaye awo kǝmbonjuye kalkal cudori.
Kǝngal kaje jaujiya,
awo kǝla cidiyen gapcǝnadǝ siji.
52 Yimbe arakkua wundu yaye kǝmbo yim gadeyedǝa yindiro kawakcǝna ngojo.
Ngainin kam fi yaye ngal wusku cuwando.
Fuwuwu jama sammaye isane awo jama cadǝnadǝa Musaro wulyeyera.
53 Musaye:
«Jiremaro adǝma awo Kǝmande wuljǝnadǝ wo.
Baɍidǝ yim tustuye,
yim Kǝmandeye.
Awo doruwwaa fulan kadu kirawuwwa,
tilan kanowo,
inginin dedu kirawuwwa,
tin denowo!
Awo gapcǝnadǝa baɍi suwaro gǝnanowo!»
54 Musa wuljǝnadǝ gai gaptowodǝa suwaro gǝnayeranniya,
kanji ngaanni ye,
njipce kinajǝnni ye.
55 Daji Musaye:
«Ku yim tustuye,
yim Kǝmandeye nangaro,
kudǝma adǝa buiwo.
Ku awima cidi karaayelan fanduwwawo.
56 Kawu arakkuro lenuwe kǝmbo adǝa doruwi,
amma yimbe tulurra,
yim tustuyedǝ,
awima fanduwwawo.»
57 Adǝ ngama yimbe tulurradǝ am laa kǝmbo madaro keluwunniya,
awima cawandǝnni.
58 Kǝmande Musaro:
«Yimbi gǝle manani ngonuwi?
59 Nonowo,
nayiro yim tustuye njadǝkkǝna nangadǝro,
yimbe arakkua kǝmbo kawu yindiye njadǝkki.
Wundu ye curo leimanjuyen napco!
Bare wunduma yimbe tulurradǝ culuwunni!»
60 Ngainin jama Israyilawuye yimbe tulurra tuskera.
61 Israyilawu kǝmbo adǝa mannin bowoyera,
maana mannedǝ "Attǝ awi?"
Kǝmbo adǝ kasuni kajim laayea camun wo.
Bul,
koro nankǝjinju fankasu kǝmagǝnna gai.
62 Musa Israyilawuro:
«Fannowo,
Kǝmandeye:
"Man adǝn ngal dewu ngonowo.
Ngǝlaro ajanowo,
kaduwuwando caroro!
Burodi,
sa nayia Masarnin njattuluwukke karaaro njawudǝkkǝnadǝn,
tilan nayia ambanjakkǝnadǝa caro!"»
63 Daji Musaye:
«Haruna,
kalwo ngone,
curodǝro man ngal dewu figǝne,
fuwu Kǝmandeyen gǝnane,
kaduwuwande caroro!»
64 Tussǝna ngawon,
Kǝmande Musaro wuljǝgǝnadǝ gai,
Haruna kalwo manne naptu taktuwurambe cǝdidǝa fuwu bam aman Ala-a jamanju-ayen gǝnayeno.
65 Israyilawu kǝrwu fidewuro man jawui duwon,
har lardu jamaaro kadira.
Man jawui duwon,
kaɍangi lardu Kan'anayero leyera.
71 Jama Israyilawuye samma wada Kǝmandeye jaane karaa Sinnea koljane,
lejai napcai cijai duwon,
har Refidimbo lejane napkera.
Nadǝn ingi cawandǝnni.
72 Daji Musaa lawalaro majane:
«Andiro ingi sadǝne yaiye!»
«Awiro wua lawalaro masuwidǝ?
Awiro Kǝmandea rijammuwidǝ?»
73 Ngudu tayia jaumaro cǝdanadǝ,
jama Musan cesirǝne tiro:
«Awiro andia Masarnin sattuluwum?
Andi-a yallande-a lǝmannande-aa ngudu seyesoro wa na adǝro sewudǝm?»
74 Musa Alaa lowoje:
«Kǝmande,
awi jama adǝro yiddǝkki?
Karwunja kuttaje,
har wua njejoro kaunin gǝpturo masai.»
75 «Curo Israyilawuyen amwurawa laa ngone fuwu jamayero konowo.
Ka tilan bǝrǝm Niluyea bangǝmmadǝa mukkon tai lene.
76 Wu ye kǝla kau kuruwu Foreb canidǝyen kǝla kaunju laayen fuwunǝmnin dakki.
Kau adǝa bange,
ingi culuwo jama casa!»