Aiya Alaa njungoroye Nawi Musaye
11
Musa-a Israyilawu-a aiya adǝa Kǝmandero yedu badiyera.
Nawi Miriyamatu yaana Harunaye ganga faranti gai mukkon ngoyenniya,
kamuwa Israyilawu samma Kǝmande nangaro bikke carandi-a ganga faranti gai jajai-aro tia jaane kallo aiya ke kumowo:
«Kǝmandea yungorǝkko,
darajanju fǝlejiyi,
fǝrwu fǝrnjaa bǝrǝmbo fijiyi.
2 Kǝmandema dunoni wo,
bananiro ise wua sǝmoyi,
aiyani ngaa tiro yiddǝkko.
Tima Alani wo,
tia yungorǝkko,
tima Ala bawaniye wo,
tiro daraja yikko.
3 Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
Kǝmandedǝ,
kǝrmainǝm kura diye tima Ala dawu jamanjuyen dǝganadǝ wo,
adǝma cunju wo.
4 Amalenkeya Fira'aunaye-a ndaran tayi?
Sojiyanju samma,
ndaran tayi?
Bawo curo bǝrǝmbero fijiyi,
wurawa sojiyanjuye ngalwo ngalwodǝ ndaran tayi?
Bawo bǝrǝm Maliaye tayia juwui.
5 Ingi tayia lǝpci,
kau ingiro kolyeyem gai
bawo cidiya bǝrǝmbero lejai.
Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
6 Kǝmande,
kǝrmainǝm duno koji,
kǝrmainǝm fǝlegǝmiya,
waduwunǝmso roa dasayi?
7 Darajanǝm naa koji,
am nia lawalaro manjaiya,
kǝnnasar cawandi?
Gǝrgagǝmiya,
kannu kajim ngamdu juwui gai.
8 Curo gǝrgadunǝmben karuwa dunoa juwagǝmi,
ingidǝa yindiro kamji,
tǝmbaɍi laa garu gai cijane dajai,
laanja ye cidiya bǝrǝmben bojai.
Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
9 Waduwundeye:
"Tayia kaduniyo nagǝiyo,"
cani,
"Arsiyinja moyiyo mǝradunde galliyo,"
cani,
"Kashagar fiddiyo tayia taiyo!"
cani.
10 Ni ye karuwa dunoa juwagǝmi,
bawo bǝrǝm tayia lǝpci.
Cidiya bǝrǝmdǝyero su cǝlǝmbe gai casukkuri,
bawo kaiwa tayia mǝt cadi.
Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
11 Kǝmande,
amso sǝnǝmbaa Alanjaro ngojai,
ni gai cǝdǝna mbeji?
Nima darajaa wo,
nima riduye wo,
nima yungoroye wo,
nima awo ajabba ajabbaso dioma wo.
Sǝnǝmbanjan ni gai mbeji?
Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
12 Kǝrmainǝm fǝlegǝmi,
cidi waduwundea cundi.
13 Jamanǝmbo kǝrawonǝm fǝlegǝmi,
nankaɍean tuluwumi,
kǝrmainǝm fǝlegǝmi,
lardu yikkǝraammaye jawalnjuro yakkǝmi.
14 Kǝmaskiyanju lawarnde fanjai,
kar kar lolojai.
Filisitiwu jauro rijai,
15 maiya Yedombuye karwunja kamdi,
fuwuwu Mowabbuye tǝma koljai,
Kan'anawu ngaye tiyi samji.
Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
16 Tayi sammaye hangal caa ciji.
Kǝmande,
awo ajabba dimma adǝ karwunja pǝt kamji,
gǝm dajana duwon,
koniyo,
andi jama merusammadǝ salairo koniyo.
17 Kǝmande,
kau kuruwu kǝlanǝmbo kǝrenǝmi,
tia kǝndǝgairamnǝm darajaaro dimi.
Nadǝro saadǝne nammiyo.
Kǝmandea yungoriyo darajanju fǝlejiyi,
fǝrwu fǝrnjaa bǝrǝmbo fijiyi.
18 Kǝmande,
kǝrmainǝm har abadaro ceriwawo,
diye!»
19 Sa fǝrra-a amalenkeya-a fǝrwu-a Fira'aunaye curo bǝrǝmbero na kattiaro ngasaanadǝn,
Kǝmande cakke ingi walde ise tayia lǝpce,
amma Israyilawu cidi guwaccane si ngamdua koyera.