Lawar Ala Israyilawua mukko sojiya Fira'aunayen mowoye
10
17 Fira'auna Israyilawu lejaro kolyenniya,
Ala tayia jawal lardu Filisitiwuyero cǝkko lejiyen njado waje,
bare am tayiro kǝriwu cakkudǝne wajane kǝla ngawonna waldanniro jawal gadero tayia kekko.
18 Ngainin tayia cakke kanji bǝrǝm Maliayen dirijane jawal karaa de sulle ngoyera.
Masarnin Israyilawu curo kǝwunja kǝriwuyen keluwo.
19 Caman Isuwu kawu bawojiro Israyilawuro:
«Ala kat banandoro isi.
Kaminni Masarnin tuluwuwiro kansi sǝbbuiwo!»
Daji Israyilawu tiro kansi jabbuna nangaro,
kaminnjudǝa Musa ngoje sapkadara.
20 Israyilawu bǝla Sukkotnin cijane lejane ci karaa de sullen bǝla Yetam caniyen napkera.
21 Kǝmande fuwunjaro koje kausu curo fofou cǝk dajǝnayen tayiro jawal fǝlejiyi ye,
bune curo kannu cǝk dajǝnayen jawaldǝa ral wassi ye.
Ngainin bune-a kausu-a rakcane bǝlawurojai.
22 Kausu fofou fuwunjan nanju koljǝnni,
bune ye kannu fuwunjan nanju koljǝnni.
31 Kǝmandeye:
32 «Musa,
Israyilawuro wulle,
walda isa karǝn bǝla tiro Fi-Hayiro caniro ci bǝrǝm Maliayen napca.
33 Fira'auna nayi curo kalangasa luworam bawoayen kǝlando gedǝna gairo fofommuwiro tǝmaji.
34 Tia kǝla kibbuaro dikke nayia kadunjai.
Awo Fira'auna-a sojiyanju-aro yiddǝkkidǝn darajani fǝlegǝkki.
Daji Masarwu wuma Kǝma jama Israyilawuyero nosai.»
Israyilawu awo tayiro Kǝmande wuljǝgǝnaa kedo.
35 Fira'aunaro Israyilawu ngǝrǝmjana yeranniya,
ti-a kowonawanju-a nianja cayedǝa faljane:
«Awiro attǝa kidiye?
Israyilawua kolliye lejana,
kaɍeawande fuddiyena.»
36 Daji Fira'auna cakke amalenkenju kǝriwuye kassane ti-a sojiyanju-a leyera.
37 Amalenkeya ngalwo ngalwo yer arakku-a,
amalenkeya Masarre gapcana-a curo fiye yayen kam yakku yakkua leyera.
38 Kǝmande Fira'aunaa kǝla kibbuaro cǝde Israyilawua kaduyeno.
Israyilawu nankam kǝlaye cawandǝna cane lardudǝn caluwuna duwon,
39 sojiya Masarre samma kǝla amalenke-a fǝr-ayen tayia kadujane ci bǝrǝm Maliayen napcanaa nayeyera.
40 Fira'auna tayia karǝngenniya,
Israyilawu kǝla sapkeranniya,
akko Masarwu ngawonjan.
Jauro rijane kowo sapcane Kǝmandea bananjaro isoro keworo.
41 Koro:
«Musa,
Masarnin kauri bawo wa duwon,
andia karaa de sul adǝro nuiyoro sewudǝm?
Attǝ awi andia Masarnin tuluwonǝm wo?
42 Masarnin dǝgaiyenadǝ,
niro:
"Andia gǝm kolsane!
Kolsane kidande nankaɍeaye Masarwuro yiddiyo!"
yiyena,
gǝna?
Karaan karmodǝro Masarwuro nankaɍea njǝddodǝma ngalwo!»
43 «Bare rinuwwi!
Karwuaro wallowo!
Ku bana Kǝmande nayiro njakkudidǝa ruiwo!
Masarwu ku ruwi ania gadero ruwwawo.
Gǝm nammowo,
44 Kǝmande ti kǝlanjuma cujundoro tayia lawalaji.»
45 Kǝmandeye:
«Musa,
awiro wua banaro suworǝmidǝ?
Israyilawuro cija fuwuro leja wulle.
46 Ni ye kanǝm ngone mukkonǝm bǝrǝm Maliayedǝro sagǝne yindiro redo,
Israyilawu cidi ngamdun reja koja!
47 Wu ye Masarwua kǝla kibbuaro dikke nayia kadunjai.
Daji awo Fira'auna-a sojiyanju-a amalenkeyanju-a fǝrwunju-aro yiddǝkkidǝn darajani fǝlegǝkki.
48 Darajanidǝa ngainin fǝlegǝkkiya,
am Masarre wuma Kǝmandoro nosai.»
49 Malaiya Alayedǝ fuwu Israyilawuyen ledu cǝdidǝ ngawonjaro wallada.
Fofou fuwunjayedǝ ngawonjaro walde katte kǝwu Masarwuye-a Israyilawuye-ayen ise dayeno.
50 Fofoudǝ kanji falnin cǝlǝm fǝdǝk,
fal yen bunea wassi.
Ngainin bune farai kǝwuwa yindidǝ kamanjaa karǝnjanni.
51 Musa bǝrǝmbo mukkonju sayeyenniya,
Kǝmande bune farai cakke karuwa adinnambe dunoa laa fuje ingi bǝrǝmbedǝa karje nadǝa cidi ngamduro kido.
Bǝrǝm yindiro rede,
52 Israyilawu dawunju ngamjǝnadǝro kasargawo.
Ingidǝ kǝmboramnja-a wailanja-alan garu gai cije dayeno.
53 Masarwu tayia kaduyera.
Fǝrra-a amalenkeya-a fǝrwu-a Fira'aunaye samma har dawu bǝrǝmdǝyero kasargawo.
54 Dunia wadu cǝdi duwon,
Kǝmande dawu fofou-a kannu-ayen sojiya Masarwua cure tayia cawulǝkkeno.
55 Si amalenkeyanjayea roje kiaddin lejairo kido.
Daji Masarwuye:
«Kasiyo,
Israyilawuyen kuruwuniyo,
Kǝmanja bananjaro isǝna andia lawalansaidǝro!»
56 Kǝmandeye:
«Musa,
mukkonǝm bǝrǝmbo sagǝne,
ingidǝ waldo iso amalenkeya-a fǝrwu-a Masarwuyea cundo!»
57 Musa mukkonju sayeyeno.
Suwa lǝp bǝrǝm nanju cayero wallada.
Masarwu ngǝrǝmjaidǝ-a ingi waldu cǝdi-a kǝla kǝljane,
Kǝmande Masarwua dawu bǝrǝmdǝyero yiryeyeno.
58 Ingi walde ise amalenkeya-a fǝrwu-a lǝpkeno.
Sojiya Fira'aunaye Israyilawua kadujane dawu bǝrǝmbero ngasaana samman falma culuwuna bawo.
59 Amma Israyilawudǝ,
tayi bǝrǝmdǝa sinin cidi ngamdulan rejane koyera,
ingidǝ garu gai kǝmboramnja-a wailanja-alan daada nangaro.