Wada ngǝmǝri burodi yis bawoaye
9
Kǝmande:
«Musa,
ngǝmǝri burodi yis bawoa saa saan har abadaro dewo!
Kǝndawu burwoye kawunju mewu derin tai har findin tilonno yade,
burodi yis bawoa buiwo.
Curo kawu tulur aniyen bare fanndon yis tuwandǝnni.
Yim burwoyen tai har tulurrero kude,
kam laa burodi yissa giwoa,
tia curo jama Israyilawuyen tuluwowo.
Yim burwoye-a tulurre-a captǝnowo wuro ambǝnsǝgǝnowo.
Yim ani,
bǝri dedaro kajia,
bare kida falma diwwi.
Ngǝmǝri burodi yis bawoa adǝa dewo,
yim adǝman nayia sojiya gai kǝwu kǝwulan lardu Masarren njattuluwukkǝna nangaro.»
Daji Musaye:
«Jama Israyilwu,
yim adǝa tangowo!
Kǝmande kǝrmainju fǝlejiye Masarnin na nankaɍea diwilan njattuluwuna.
Sa Kǝmande nayia lardu amwurawando cayesoro kansi jǝbbuye nayiro njadi cǝnnaro njaadiya,
saa nguson lamar adǝa ngǝmǝriro dewo!
Kawu tulurro burodi yis bawoa buiwo,
yimbe tulurra ngǝmǝri Kǝmande nangaro dewo.
Yim ngǝmǝriyea yallandoro maana adǝa wulgǝnowo:
"Ibadande adǝa diye,
ser Kǝmande andiro sa Masarnin luwiyena saddǝnadǝ nangaro."»
2 Koro Kǝmandeye:
«Musa,
curo Israyilawuyen karu fi yayea kakkero dewo!
Tada karuye yen kal,
tada burwoye lǝmanne bi yen kal,
samma kakke.»
11 Daji Musaye:
«Jama Israyilawu,
sa Kǝmande awo nayi-a amwurawando caye-aro kansi njabbunadǝa cǝde nayia lardu Kan'anayero njaade tia tǝgǝmbo njadiya,
12 tiro tada karuye fi yayea yowo!
Curo lǝmannandoyen tadawa burwoye bidǝ ye kaanju.
Tidǝ koroyero walyenoa,
cujunjuro Kǝmande nangaro ngǝlaro bi dal duwanowo.
13 Lǝmandǝa duwaduro wayewwa,
korodǝye daunju nammowo.
Tadawa karuye kaduwundoyedǝa wuɍinin merunowo!
14 «Fuwun yaye yallando nayiro:
"Awiro adǝa diwi?"
caniya,
tayiro:
"Kǝmande kǝrmainju fǝlejiye Masarnin andi kaɍea duwon samoye settuluwo.
15 Sa Fira'auna kǝlakibbu cǝde andiro luwo damsaanadǝ,
Kǝmande Masarnin tadawa burwoye sammaa kamben kal,
lǝmannen kal,
kejo.
Adǝ nangaro tada burwoye lǝmanne bisoa Kǝmande nangaro duwaniye,
16 amma tadawande karuye fi yayea wuɍinin meruniye,"
wulgǝnowo.»