Lawar Masarnin luwo Israyilawuye
8
29 Yimdǝ kidǝnniya,
dǝrdu buneyen Kǝmande cidi Masarren tadawa karuye sammaa kejo.
Karu Fira'auna mai larduye-a karu kam koson jakkadaye-a tadawa burwoye lǝmannaye-a finjama koljǝnniro roro kejo.
30 Bune adǝ Fira'auna-a kowonawanju-a Masarwu samma-a cijane so dama baworo kedo.
Curo Masar sammayen so gǝrji,
fado duwon karmo tǝdǝnnidǝ bawo nangaro.
31 Daji dawu buneyen Fira'auna Musa-a Haruna-aa bowoje:
«Cinowo curo jamaniyen luwowo!
Nayi-a Israyilawu-a lenowo,
suworuwwadǝ gai,
Kǝmandoro ambǝtkǝgǝnowo!
32 Dimiyando-a feyando-adǝmaa,
wulsuwuwwadǝ gai,
gaddowo saptǝnowo!
Koro wuro barga dǝmsǝgǝnowo!»
33 Masarwu tayi samma sanui cane Israyilawua jǝkcagane gangadaro lardunja kolyera.
34 Adǝ nangaro Israyilawu fǝlawanja kamatkada burodiye cijǝnni duwon ngojane sapkadara.
Burodi kamatturamnjaa kalwun kǝlejane ngawananjaro gǝnayeyera.
35 Musa tayiro wuljǝgǝnadǝ gai,
Masarwua kare ɍiwullaye-a dinarre-a kajǝmu-aro keworo.
36 Kǝmande cakke Masarwu tayia ngurnojane tayiro awowa caworǝnadǝa kedo.
Ngainin arsiyi Masarwuye sammaa kewando.
37 Israyilawu bǝla Ramasassea koljane jawal bǝla Sukkotte keda.
Kamuwa-a tadawa-a dawun baworo tayi kongwawadǝ alama am dǝwu yer arakku gai.
Am jiɍi gadegadea tǝrǝm tayia jaane leyera.
Koro dimiya-a kaniya-a feya-a kada mbeji.
Masarnin gangadaro tayia dujanadǝro,
Israyilawu dama kansi ngodaye cawandǝnni,
fǝlawanja kamatkada cijǝnni duwon ngojane lejane kǝla jawallen fankasu fetetel kedo.