Lawar Ala ajawu mewu ajabba ajabba Masarwuro gǝnaduwuye
6
13 Ajawu burwoye:
ingiye buro waldu
14 Kǝmandeye:
«Musa,
Fira'auna kǝlakibbu cǝde jamaniro ledu dapcǝgǝna.
15 Suwa lǝp ingi Niluyero leduro culuwiya,
tia nagǝne.
Ci ingidǝyen dane,
tia gurene.
Ka burwon kadiro waljǝnadǝa mukkon ngone.
16 Fira'aunaro wulle:
"Ala Kǝma Israyilawuye wua nanǝmbo juwasiye niro jamanju kolle leja curo karaayen tiro ambǝccaaro nǝkkǝnama,
ni koro yaye fanǝmmi.
17 Adǝ nangaro Kǝmandeye yeno:
Ngainin wu Kǝma Israyilawuye dawunjan dǝgakkǝnaro nosǝmi.
Ka mukkon takkǝnadǝn ingi Niluyea bangǝkke ingidǝ buro walji.
18 Buni samma curo Niluyen sanune,
ingidǝ kinaje Masarwuro nja tiyeri."»
19 «Haruna yero wulle,
kanju ngojo kanji ingi Masarnin dǝgana sammayero mukkonju sajuwo,
ingidǝ buro waljo!
Bǝrǝm yen kal,
falwu yen kal,
jawal ingiye yen kal,
na duwon ingi menna sammaro mukkonju sajuwo ingidǝ buro waljo.
Lardudǝn bu ndarason mennaro walji,
har curo kalwowa kǝskaye-a kauye-ayen.»
20 Musa-a Haruna-a awo Kǝmande tayiro wuljǝgǝnaa kedo.
Fuwu Fira'auna-a kowonawanju-ayen Musa kanju sapce ingi Niluyea bakkenniya,
ingidǝ buro walyeno.
21 Buni samma curo bǝrǝmbedǝ sanune bǝrǝmdǝ kinaje inginjudǝ taiwaworo walyeno.
Lardu Masarre ngan bua.
22 Amma sowowunjan bokawa Masarre tayi ye awo Haruna cǝdǝnadǝ gai kedo.
Daji Kǝmande wuljǝnadǝ gai,
Fira'auna kǝlakibbu cǝde Musa-a Haruna-aa kǝrǝndu wayeno.
23 Mananjaa awimaro kalakcǝnni,
tayiro ngawo ce fannjuro wallada.
24 Masarwu nga ingi Niluyea rakcane casaiwawodǝ,
ingi kǝji njaye fandoro ci Niluyen bǝlaa lalayera.
25 Ajawu yindiye:
koko
26 Kǝmande Nilua bakcǝnaye kawu tulurra:
«Musa,
Fira'aunaro lene tiro:
"Kǝmandeye yeno:
Jamanjua kolle leja tiro ambǝccaa.
32 Koro wayemba,
lardunǝm ngaro koko fijiyi.
33 Curo Niluyen koko ngǝwujane dama baworo waljane inginin caluwune curo fannǝmbero isane bǝnaramnǝmbo ngasaane kǝla dǝgǝlnǝmbero taccai.
Koro fadowa kowonawanǝmbe-a jamanǝmbe-aro,
har fado burodiyenǝm-a awo burodi kamatturamnǝm-aro ngasayi.
34 Na duwon rakcane ngasayiwawo bawo,
har kǝlanǝm-a kǝla kowonawanǝm-a jamanǝm ye-ayero jawai."»
35 «Harunaro wulle kanju ngojo kanji bǝrǝm-a falwu-a jawal ingiye-ayero mukkonju sajuwo,
kokowa caluwo Masar ngaro tardaa!»
36 Haruna mukkonjua kanji ingi Masarnin dǝgana sammayero sajiye,
kokowa caluwune lardu ngaa jakkera.
37 Amma bokawa sowowunja cade,
tayi ye Masar ngaro kokowa fiyeyera.
38 Fira'auna Musa-a Haruna-a bowoje:
«Kǝmandoa korowo,
kokowa nani-a jamani-an sapta,
wu ye Israyilawua kollǝkke lejane Kǝmando nangaro bu fijai.»
39 Musaye:
«Nima wuro sa Kǝmandea ni-a kowonawanǝm-a jamanǝm-a nangaro korǝkke kokowa nandon baworo cǝdidǝa wulsǝgǝne.
Curo Niluyen gǝnia,
ndaraman baworo waljai.»
40 «Baɍi.»
«Raammadǝ gai tǝdi,
Kǝmande Alaa gaskaduma baworo none nangaro.
41 Kokowa nanǝm-a fannǝm-a kowonawanǝm-a jamanǝm-an saptai.
Curo Niluyero kajia,
ndaraman baworo waljai.»
42 Musa-a Haruna-a Fira'aunayen keluwunniya,
Musa Kǝmandea kǝla kokowa juwajiye hangal Fira'aunaye casangǝnayen lowoyeno.
43 Kǝmande awo Musa tia cuworǝnadǝa kido.
Kokowa fado-a balballa-a jǝrwu-alan dasaana samma sanura.
44 Kokowa sanune Masarwu tayia cacapkeranniya,
njǝpcane lardu nga kina njǝnno walyeno.
45 Daji Fira'auna kasam cuwandǝnaro kirunniya,
Kǝmande wuljǝnadǝ gai koro kǝlakibbu cǝde Musa-a Haruna-aa kǝrǝndu wayeno.
46 Ajawu yakkuye:
kandana
Kǝmandeye:
«Musa,
Harunaro wulle kanju ngojo cidi bǝrbǝrra bakco,
bǝrbǝrdǝ Masar ngalan kandanaro waljo!»
47 Ngai kedo.
Haruna mukko kanjuaa saje bǝrbǝr cidiyea bakkenniya,
kandanaro walje tiyi am-a lǝmanna-aye sammaa jakkeno.
Lardu ngan bǝrbǝr kandanaro walyeno.
48 Bokawa sowowunjan kandanadǝa dudu mayeranniya,
tayiro katkero.
Kam-a lǝman-a sammaa kandanaye jakkeno.
49 Daji bokawadǝ Fira'aunaro:
«Barganǝmnin,
adǝ kǝrmai Alaye,
diye!»
Amma Kǝmande wuljǝnadǝ gai,
Fira'auna kǝlakibbu cǝde Musa-a Haruna-aa kǝrǝndu wayeno.
50 Ajawu dewuye:
kiyi am ngǝrowu
Kǝmandeye:
«Musa,
suwa lǝpnin cine Fira'aunayero lene,
bǝrǝmbo leduro culuwiya,
tiro:
"Kǝmandeye yeno:
Jamanjua kolle lardu adǝn caluwo tiro ambǝccaa!
51 Wayemba,
kiyi am ngǝrowu niro juwanjiyi.
Ni-a kowonawanǝm-a jamanǝm-a fadowanǝm-a sammaa kiyi ye jannjai.
Fadowa Masarwuyea casǝmbǝɍe har na napcanadǝ yea jakcai.
52 Yim adǝ lardu Goshenne na jamanju dasaanaa cǝkkayi.
Ti Kǝmandedǝ dawu lardunǝmben woro none nangaro,
lardu Goshennero kiyi falma juwajiyiwawo.
53 Ajawu jamanǝmba cǝdaidǝro jamanju kajai.
Kǝrmainju adǝa baɍi fǝlejiyi."»
54 Kǝmande ngai kido.
Curo fado Fira'aunaye-a kowonawanjuye-a fadowa larduye samma-aro kiyi tǝrǝm ngasaane lardudǝn banna kedo.
55 Daji Fira'auna Musa-a Haruna-aa bowoje:
«Lenowo,
lardu adǝn Alando nangaro bu finowo!»
56 Musaye:
«Adǝ kalkal gǝni.
Lǝman bunju Kǝmande Ala nangaro finiye adǝ adin Masarwuyero haram.
Bu fida adinndoro haramdǝa diye seroa,
andia kaunin gǝmsane seyesi.
57 Adǝ nangaro dolendero karaan na ledu kawu yakkuayero leniye,
nadǝn Ala Kǝmande nangaro bu fida jiɍi wulsagaidǝro diye.»
58 «Kolnjakke karaaro lenuwe Ala Kǝmando nangaro bu finuwi.
Amma bare kuruwuro lenuwwi!
Kǝrma wuro Alandoa sukkorowo!»
59 «Nanǝmnin saptǝkkiyama,
Kǝmandea korǝkki.
Baɍi kiyiya ni-a kowonawanǝm-a jamanǝm-a sammaa kolnjai.
Amma bare andia jambasame bu fida Kǝmande nangaro karaaro ledu damsagammi!»
60 Daji Musa fado Fira'aunayen culuwe Kǝmandea kiworo.
61 Kǝmande awo Musa tia cuworǝnaa cǝde,
kiyiya Fira'auna-a kowonawanju-a jamanju-aa kolyera.
Lardudǝn kiyi falma baworo waljǝnama,
62 koro yaye Fira'auna kǝlakibbu cǝde Israyilawuro ledu dapkeyeno.
63 Ajawu uwuye:
simkǝm
71 Kǝmandeye:
«Musa,
Fira'aunayero ngaye tiro wulle:
"Kǝmande Ala Israyilawuye yeno:
Jamanju kolle leja tiro ambǝccaa!
72 Koro wayemba,
tayia rodu kollǝmmia,
73 kǝrmainju fǝlejiye lǝmannanǝm karaan nansǝni cadia bakci.
Fǝr so,
koro so,
kaɍimo so,
fe so,
dimi so sammaa simkǝm jau laa cǝdai.
74 Kasuwa adǝro lǝmanna Israyilawuyedǝa cǝkkayi,
lǝman falma Israyilawuye nuiwawo."
75 Kǝmande sardu kamje:
«Baɍi lardu Masarren awo adǝ wakkaji.»
76 Wayenniya,
Kǝmande awo wuljǝnadǝa wakkayeyeno.
Lǝmanna Masarwuye samma kasuno,
Israyilawuye falma nunni.
77 Fira'auna am juwajiye kerunniya,
jire,
lǝman falma Israyilawuye nunni.
Amma Fira'auna kǝlakibbu cǝde Israyilawuro ledu dapkeyeno.
Ajawu arakkuye:
kudu kaɍia
78 Kǝmande Musa-a Haruna-aro:
«Kawukko na jalap wardarambe japtu yindi mukkoye ngonowo,
Musa fuwu Fira'aunayen samero yirjuwo!
79 Bǝrbǝrro walje lardu Masarre sammaa kǝlje tiyi kam-a lǝman-ayen kudu kaɍia cuttuluwi.»
80 Musa-a Haruna-a kawukko ngojane Fira'aunayero leyera.
Musa kawukkodǝa samero yiryeyenniya,
tiyi kam-a lǝman-ayen kudu kaɍia kiluwo.
81 Bokawa Masarrero na Musayero kǝnde tiyero,
tayi ye Masarwu gade gai tiyinja ngan kudua nangaro.
Adǝ ngama,
Kǝmande Musaro wuljǝgǝnadǝ gai,
82 Fira'aunaa kǝla kibbuaro cǝde Musa-a Haruna-aa kǝrǝndu wayeno.
Ajawu tulurre:
mafi
83 Kǝmandeye:
«Musa,
baɍi suwa lǝpnin cine Fira'aunayero lene tiro:
"Kǝmande Ala Israyilawuye yeno:
Kolle jamanjua leja tiro ambǝccaa!
84 Adǝ gǝnia,
dunia ngan kǝlamanju baworo nonero ajawu jiɍi jiɍi ni-a kowonawanǝm-a jamanǝm-aro gǝnanjagai.
85 Kango raktunju fǝlenjǝgǝnaa,
kua ngai wowa ni-a jamanǝm-a njadane dunian baworo walluwwa.
86 Amma nia roa kolngeno,
niro martawanju fǝlenjuworo koro cunju dunia ngan culuworo.
87 «"Ni ledu jamanjuyero takkal yakkǝmidǝ,
88 baɍi sa adǝgai cakke mafi kura kura cuduri.
Sa Masarra garjanadǝn tai kuro kude,
ngaltema mafi kura jiɍi adǝ gai lardudǝn cudurǝnni.
89 Adǝ nangaro kǝrma yakke lǝmannanǝm-a awo karaanin tamma samma-a fadoro kude!
Kam bi lǝman fadoro isǝnni karaan napcǝnadǝ,
mafi kura kura kǝlanjuro casukkure nui."»
90 Curo kowonawa Fira'aunayen am mana Kǝmandeye adǝa kibburo ngojanadǝ jǝkcagane kaɍeanja-a lǝmannanja-a fadoro kewudo.
91 Am manadǝa ngojannidǝ kaɍeanja-a lǝmannanja-a karaanin kolyera.
92 Kǝmandeye:
«Musa,
mukkonǝm samero sagǝne,
mafi Masar ngan kǝla ambe-a lǝmannaye-a awo kulolan ɍijǝna-asoro cukkuro!»
93 Musa kanju samero sayeyenniya,
Kǝmande cakke keyera gǝrje radu cididǝro kikkuro,
mafi kura kura ye Masar ngan kiduro.
94 Mafi-a radu tiro kǝldǝgǝna-a ani jauro jau,
kawu Masar napkenoman awo adǝ gai ngaltema turunni.
95 Cidi Masarre ngan am so,
lǝmanna so karaan dasaana sammaa mafiye kowoyeno.
Awo kulolan ɍijǝnaso falma koljǝnniro kowoje,
har dǝlam kǝska karaaye yea nanamgeno.
96 Cidi Goshennen na Israyilawu dasaana runjuman mafi adǝ cudurǝnni wo.
97 Fira'auna Musa-a Haruna-aa bowoje:
«Ku jireni bawo.
Kǝmandodǝma jirenjua wo.
Wu-a jamani-a jirende bawo.
98 Keyera gǝrdu adǝ-a mafi-a kǝlanden caluwuna.
Kǝmandoa korowo daja!
Kua adǝn fuwun ronjakkiwawo,
kolnjakke lenuwi.»
99 Musaye:
«Bǝlan luwukkiyama,
mukko sammǝkke Kǝmandea korǝkki.
Keyera gǝrdu kolji,
koro mafi ye baworo walji,
duniadǝ Kǝmandeyero nonero.
100 Amma nokkǝna,
koro yaye ni-a kowonawanǝm-a Kǝmande Alaa rinuwwiro.»
101 Sayir-a kǝska faidaa lin cani-a mafiye jauro kowoje bannajǝna,
sayir kǝla ficcǝna koro lindǝ ye fǝɍe ngǝssǝna nangaro.
102 Algama jiɍi gadegade yindidǝ bannadǝnni,
tayi koro yaye ɍijanni nangaro.
103 Daji Musa Fira'aunayen culuwe ngawo bǝlayero leyeno.
Mukko sapce Kǝmandea lowoyenniya,
keyera gǝrdu kolje mafi-a ingi-a ye cididǝn duro dayera.
104 Fira'auna ingi-a gǝrdu keyeraye-a mafi-a samma baworo kirunniya,
biwu cayedǝ gai ngoje ti-a kowonawanju-a kǝlakibbu kedo.
105 Kǝmande Musaro wuljǝgǝnadǝ gai,
Fira'auna kǝlakibbu cǝde Israyilawuro ledu dapkeyeno.
Ajawu wuskuye:
kawi
111 Kǝmandeye:
«Musa,
Fira'aunayero lene.
Wuma ti-a kowonawanju-a kǝla kibbuaro dikko,
tayiro awo ajabba ajabbaso fǝlegǝkke wu dawunjanno nojaro.
112 Ngainin tadawanǝm-a diwuwanǝm-aro jiɍi Masarwuro kǝrmaini ajabba ajabba fǝlegǝkke awo jau jau tayiro yiddǝkkǝnaa wulgǝne.
Daji ngainin nayi samma wu Kǝmandoro nonuwi.»
113 Musa-a Haruna-a Fira'aunayero lejane:
«Kǝmande Ala Israyilawuye yeno:
"Har sawiro tia ga wanǝmi?
Jamanjua kolle leja tiro ambǝccaa!
114 Koro yaye wayemba,
baɍi kawi lardunǝmbo juwajiye cididǝa tǝgǝmbo jakcane,
115 har turuiwaworo walji.
Awo mafi tǝgǝmbo cejǝnni koljǝnadǝ-a kǝskawa karaaye samma-aa jawui.
116 Fado kaanǝm-a kowonawanǝmbe-a Masarwu sammaye-a casǝmbǝɍi.
Jaman kaariyanǝmso Masarlan napcanadǝn tai har kuro kudeman awo ngaltema wakkajǝnni wakkaji."»
Daji Musa Fira'aunaro ngawo ce kiluwo.
117 Kowonawanjuye Fira'aunaro:
«Barganǝmnin,
har sawiro kam adǝ andiro masiwa sakkudi?
Israyilawu kongwawadǝa kolle,
nda leja Kǝmanja Alaro ambǝccaa!
Nonǝmmi wa Masar landu cǝdidǝa?»
118 Musa-a Haruna-aa koro bowojane Fira'aunayero isane tiye:
«Lenowo Kǝmando Alaro ambǝtkǝgǝnowo.
Wai,
wunduso lejaidǝ wo?»
119 Musaye:
«Ngǝmǝri Kǝmandero yiddiyedǝ,
yallande so,
kiariyande so,
dimiyande so,
feyande so wundumaa kolliyendero leniye.»
120 «Nayi-a yallando-a kolnjakkema leyewwa,
Kǝmando ye nayia njaɍiwo.
Niadiwi dio manuwi.
121 Ǝn!
Ǝn!
Ngainin tǝdiwawo.
Nayi kongwawadǝ lenowo Kǝmandoro ambǝtkǝgǝnowo,
adǝma awo manuwidǝ wo!»
Daji tayia nanjun duyeno.
122 Kǝmandeye:
«Musa,
mukkonǝm kanji Masar ngayero sagǝne,
kawiya lardudǝro isa kajim-a kǝska-a mafi cejǝnni gapcǝnadǝa jawo!»
123 Musa kanju kanji Masar ngayero sayeyenniya,
yim adǝ Kǝmande karuwa adinnambe juwajiye kausu koljǝnni bune ye koljǝnniro fuyeno.
Wayenniya,
ase karuwadǝ kawi cuwudǝna.
124 Isane lardu Masarre ngan napkera.
Masarwu kawi tǝrǝm ani gai ngaltema carunni,
koro fuwu yen caruiwawo.
Kawiyadǝye nanngǝwunjaro cidi samma cǝlǝm pǝt turuiwawo.
125 Kajim-a tadawa kǝskaye-a mafi cejǝnni gapcǝna sammaa gewo.
Lardudǝn curo jǝrwuyen bi karaalan awo kǝɍi falma koljanniro gewo.
126 Fira'auna jǝktiye Musa-a Haruna-aa bowoje:
«Nayi-a Kǝmando Ala-aro biwu njaddǝkkǝna.
127 Koro yaye wua gawursǝnowo,
Kǝmando Alaa korowo,
karmo adǝro wua sǝkkawo!»
128 Musa Fira'aunayen culuwe Kǝmandea kiworo.
129 Kǝmande karuwa adǝa karuwa dunoa fǝdeyero kalakce kawi sammaa curo bǝrǝm Maliayero fiyeyeno.
Cidi Masarre ngan kawi falma baworo walyeno.
130 Adǝ ngama,
Kǝmande Fira'aunaa kǝla kibbuaro cǝde Israyilawuro ledu dapkeyeno.
Ajawu lǝgarre:
duwu
131 Kǝmandeye:
«Musa,
mukkonǝm samero sagǝne,
duwu cǝlǝm fǝdǝk Masar ngaa jakco!»
132 Musa mukkonju samero sayeyenniya,
cidi Masarre ngaa kawu yakkuro duwu cǝlǝm fǝt jakkeno.
133 Kawu yakkuro wunduma kamanjua curunni,
koro wunduma sǝnaktǝnni.
Amma na Israyilawu dasaana ngan nurra.
134 Fira'auna Musaa bowoje:
«Lenowo Kǝmandoro ambǝtkǝgǝnowo,
yallando ye nayia njaa!
Amma dimiyando-a kaniyando-a feyando-a napca!»
135 «Ha!
Ni wa andiro lǝmanna Kǝmande Ala nangaro duwaniyedǝa sadǝmi?
136 Kaiya!
Lǝmannande yadiye falma kolliyewawo,
curonjan Kǝmande nangaro duwayedǝa karniye bu finiye.
Kawu nadǝro leniyero,
lǝmanna Kǝmande nangaro duwaniyedǝa noniyewawo.»
137 Kǝmande Fira'aunaa kǝla kibbuaro cǝde Israyilawuro ledu dapkeyeno.
138 Fira'aunaye:
«Musa,
saptǝne!
Bare kua adǝn fuwun nanin njurukkǝni!
Yim naniro isǝmmadǝn,
ronǝm fuddǝmi!»
139 «Wullǝmmadǝ gai,
wua surumbawo.»
Ajawu daryeye:
karmo tadawa karuye
141 Caman Kǝmande Musaro adǝa wuljǝgǝna:
«Fira'auna-a Masarwu-aro ajawu daryeye gǝnagǝkki.
Ngawo adǝyen Fira'auna nayia kolnjane saptuwi.
Nayia kolnjane saptu kasacciya,
cidi adǝn tǝgǝmbo dunjai.
142 Israyilawuro wulle,
kongwan kal,
kamun kal,
wundunja yaye lejo kǝmaskinju Masarmaa cuworo,
tiro kare ɍiwullaye-a dinarre-a co!»
143 Kǝmande cakke Masarwu Israyilawua ngurnojana.
Koro kowonawa Fira'aunaye-a jama Masarre-a Musaa kam darajaaro ngojana.
144 Daji Musa Fira'aunaro:
«Kǝmandeye yeno:
"Yim laa cǝde dunia dǝrsajiya,
Masar ngaa jǝgai.
145 Lardudǝn tadawa karuye samma sanui,
tadanǝm ni mai larduyen tai,
har kir algama nedumasoyero yade,
samma sanui.
Tadawa burwoye lǝmanne ye sanui.
146 Masar nganin so ngaltema tǝdǝnni koro fuwun tǝmmaro tǝdiwawo tǝdi.
Amma Israyilawu sammayen kǝlewa salai,
kǝrima kamba bi lǝmanna nanjan cambudiwawo.
147 Ngainin ti Kǝma Israyilawuyedǝ Masarwu-a Israyilawu-a karjǝnaro nonuwi,"
yeno Kǝmandeye.
148 Daji kowonawanǝm ani samma naniro isane fuwunin tungurumjane:
"Lenowo,
ni-a jama ngawonǝm jagai-a!"
cani.
Ngawo adǝn lardudǝn luwiye.»
Daji fum gǝrgajǝna na Fira'aunayen kiluwo.