3 «Ala Israyilawuye andiro fǝledǝgǝna.

Kolsane karaaro na ledu kawu yakkuayero leniyo,

ti nangaro bu finiyo,

bare andiro wowa laa bi kǝriwu laa sakkudǝnni nangaro!»

4 «Musa-a Haruna-a,

awiro Israyilawuro kidanja dapkǝgǝwidǝ?

Kidanjaro walda!

5 Kǝrma kidawuni ngǝwujanadǝ wo wa,

tayiro kidanja daptuwu manuwi?»

6 Yim adǝma Fira'auna Masarwu kǝla kidaye kurowu-a Israyilawuye fuwuwu-a sammaa bowoje:

7 «Adǝn fuwun Israyilawuro kajim tulo didaye njo kollowo,

leja tayima kajimdǝa maja!

8 Koro yakkowo jalap cayedǝ gai kamja!

Bare nanngǝwu jalapdǝyea ganama gǝrduwwi!

Am ani lusurra,

adǝ nangamaro:

"Leniyo Alande nangaro bu finiyo!"

canidǝ.

9 Yakkowo nankaɍeaye tayia dama baworo cǝda kidanja cado!

Ngainin mana bowuyero ngissagaiwawo.»

10 Masarwu kǝla kidaye kurowu-a fuwuwu Israyilawuye-a caluwune Israyilawuro:

«Fira'aunaye yeno:

"Nayiro kajim njadǝkkiwawo.

11 Lenowo nayi kǝlandoma manowo kudowo,

koro nanngǝwu jalap kammuwidǝye tǝrgǝrdiwawo!"»

12 Israyilawu lardu Masarre ngaro kajim madaro kasargawo.

13 Masarwu kǝla kidaye kurowu tayia jǝkcagane:

«Kidando yerowo!

Sa kajim nayiro njadidǝ gai,

yimbi ye jalap manjaanadǝa kammowo!»

14 Fuwuwu Israyilawuye kǝrejanadǝ yea babakcane:

«Awiro bikka-a ku-adǝ jalap kure gairo kammuwwidǝ?»

15 Fuwuwu Israyilawuyedǝ sonja Fira'aunaro cakkude:

«Barganǝmnin,

awiro andiro ngai saddǝmi?

16 Kajim andiro njo koljanama,

koro yaye "Jalap caye gairo kammowo!"

andiro wulsagai.

Daji andia babansai,

amma amnǝmdǝma diye jire bawoa wo.»

17 «Nayi lusurra!

Adǝma nangaro:

"Leniyo Kǝmande nangaro bu finiyo!"

nuwidǝ.

18 Waldǝnowo lenowo kidando dewo!

Kajim njadiwawo,

koro jalap caye gairo kammuwi.»

19 Fuwuwu Israyilawuye tayi curo kuttuyen dasaanaro kero.

Dalilnjudǝ Fira'aunaye tayiro:

«Nanngǝwu jalap yim yimbe kammuwidǝ tǝgǝrdiwawo.»

20 Fira'aunayen keluwǝranniyama,

Musa-a Haruna-a tayia gurejaidǝ-a nayeyera.

21 Fuwuwuye:

«Kǝmande awo diwwaa curo!

Nayiro biwu gǝnanjaa!

Yakkuwe Fira'auna-a kowonawanju-a andia wul wasana.

Awo diwwa adǝ kashagar mukkonjaro yakkuwe andia seyeso nuwwa-a kal.»

22 Musa Kǝmandeyero walde:

«Kǝmande,

awiro kuttu adǝa jamanǝmbo kiddǝm?

Awiro wua juwaseyem?

23 Kawu Fira'aunayero isǝkke kawuɍinǝm wulgǝkkǝnaman,

kuttu jamanǝmbo njǝddo koljǝnni,

ni ye tayia mukkonjun moworo awima dimmi!»

31 «Kua awo Fira'aunaro yiddǝkkidǝa rumi.

Tiro dunoni fǝlegǝkke hangalnjun gǝni Israyilawua kolje,

har lardudǝn duji.

32 «Wuma Kǝmando wo.

33 Ibrahim-a Isaku-a Yakuba-aro fǝledǝgǝkke wua Ala Martawamaro nosera,

amma Ala dawu jamanjuyen dǝganaro wua nosanni.

34 Wu-a tayi-a aman ndǝmmiyena,

tayiro lardu Kan'anaye lardu nankusotto cadi adǝa yikki nǝkkǝna.

35 Koro Israyilawu kida nankaɍeaye Masarwu tayia casakke cadi nangaro njǝmjaidǝa fakkǝna.

Aman kattendeye nangaro bananjaro kadikko.

36 Adǝ nangaro Israyilawuro wulle:

"Wuma Kǝmando dawundon dǝgakkǝnadǝ wo,

nayia kida Masarwu njasakkǝna diwi adǝn njattuluwukki.

Nankaɍea adǝn merunjakki.

Kǝrmaini fǝlegǝkke tayiro ajawu kurwowuso gǝnagǝkke nayia mukkonjan njattuluwukki.

37 Nayia jamaniro dikki,

koro wu Alandoro wallǝkki.

Wuma Kǝmando dawundon dǝgakkǝna nayia mukko Masarwuyen mowomaro nosuwi.

38 Nayia lardu Ibrahim-a Isaku-a Yakuba-aro kansi yibbukke yikki nǝkkǝnadǝro njaadǝkke tia tǝgǝmbo njadǝkki.

Wuma Kǝmando dawundon dǝgakkǝnadǝ wo.»

39 Israyilawuye tiyi samje koro kidanja nankaɍeaye jaujǝnadǝro,

Musa mana adǝa tayiro wulyeyenniya,

tia kǝrǝndu wayera.

40 Daji Kǝmandeye:

41 «Musa,

Fira'auna mai Masarrero lene,

Israyilawua koljo lardunjun caluwo!»

42 «Akko Israyilawu wua kǝrǝnsanni.

Ndayinin Fira'auna wu ci kurwowuaa kǝrǝnsi?»

51 «Fane!

Nia Ala Fira'aunayero dikki.

Koro Haruna yeiyanǝm ye nawinǝmbo walji.

52 Ni mana wulnjǝgǝkki sammaa Harunaro wulgǝmiya,

ti ye Fira'aunaro manajiye Israyilawua koljo lardudǝn caluworo.

53 Wu Fira'aunaa kǝla kibbuaro dikki.

Masarnin kǝrmaini ajabba ajabbaso kada dikkima,

Fira'auna manando ngojiwawo.

54 Daji lardudǝn kǝrmaini dikke Masarwuro ajawu jau jau gǝnagǝkke jamani Israyilawua sojiya gai kǝwu kǝwulan Masarnin tuluwukki.

55 Yim Masarwuro kǝrmaini fǝlegǝkke Israyilawua lardunjan tuluwukkiya,

Masarwu wuma Kǝma Israyilawuyero nosai.»

56 Musa-a Haruna-a awo Kǝmande tayiro wuljǝgǝnadǝa kalkallo kedo.

57 Sa Fira'aunaro jandejaanadǝn,

Musaye kǝrwunju fisku,

Harunaye fiskun yakkun.

58 Kǝmande Musa-a Haruna-aro:

59 «Fira'auna nayiro:

"Awo ajabba dewo!"

cǝniya,

Musa ni Harunaro wulgǝne,

kanjudǝa ngojo fuwu Fira'aunayen gǝpco!

Kadǝ daji kadi mafǝndiro walji.»

60 Musa-a Haruna-a lejane Fira'aunayen awo Kǝmande tayiro wuljǝgǝnadǝa kedo.

Haruna fuwu Fira'auna-a kowonawanju-ayen kanju gǝpkenniya,

kadi mafǝndiro walyeno.

61 Daji Fira'auna ilmuwu-a bokawa-a Masarre sammaa bowoyeno.

Tayi ye sowowunjan awo Haruna cǝdǝnadǝ gai kedo.

62 Wundunja yaye kanju gǝpce kadi mafǝndiro walyeno.

Amma kadi Harunaye kaanjadǝa kindo.

63 Kǝmande wuljǝnadǝ gai,

Fira'auna kǝlakibbu cǝde Musa-a Haruna-aa kǝrǝndu wayeno.