31 Yim laa Musa dimiya-a kaniya-a kǝsainju Shi'ituye cǝneyi duwon,

yokce karaa de sul koje kau kuruwu Alaye Foreb canidǝro kadio.

32 Nadǝn Malaiya Kǝmandeyedǝ curo kannu dawu kǝska kǝɍiyen cambilan tiro fǝleyaadan.

Musa kirunniya,

akko kǝska kǝɍi dawunjun kannu cambi,

amma kannudǝ kǝskadǝa juwuiwawodǝ:

33 «Ajap!

Awiro kannudǝ kǝskadǝa juwuiwawodǝ?

Nda lekke awo adǝa rukke!»

34 Kǝmande dawu kǝskadǝyen duwon Musa kǝnde cǝdiro kirunniya,

tia bowoje:

«Musa!

Musa!»

«Naam.»

35 «Dane,

bare karǝnsǝmmi!

Sunonǝm tuluwe,

na danǝmma adǝ darajaa!

36 Wuma Ala bawanǝmbe wo,

Ala Ibrahimbe-a Isakuye-a Yakubaye-a.»

Adǝa fangenniya,

Musa Alaa kuroro rije fǝkkanju jakkeno.

37 Kǝmandeye:

«Musa,

ajawu jamani Masarnin fanjaidǝa fagat rukkǝna.

Masarwu kǝlanja kuromaso tayiro bone fǝlejagaidǝro cesiri fakkǝna,

kuttunja nokkǝna.

38 Adǝ nangaro tayia mukko Masarwuyen moworo jǝpkekko.

Lardu Masarredǝn tayia tuluwukke,

lardu kura ye,

bargaa ye,

na jaumaro larasuaro tayia yadǝkki.

Lardu adǝ lardu am jiɍi gadegade arakkuye.

39 So Israyilawuye naniro isǝna,

koro fudu Masarwu tayia basarjaidǝ yea rukkǝna.

40 Adǝ nangaro na Fira'aunayero njunodǝkki.

Lene ammi Israyilawua Masarnin tuluwe!»

41 «Wundu wu wo duwon na Fira'aunayero lekke,

har Israyilawua Masarnin tuluwukkidǝ?»

42 «Wu ngawonǝmnin.

Koro wuma nia njunodǝkkodǝro,

akko awo shedanǝmbo waljidǝ:

Sa ammidǝa Masarnin tuluwumiya,

kǝla kau adǝyen wuro ambǝttǝgǝwi.

43 «Kǝrma na Israyilawuyero lekke:

"Ala amwurawandesoye nandoro wua sunodo!"

yikkiya,

"Ti wundu?"

cane wua saworiya,

awi wullǝkki?»

44 «WUMA WU WO,

WU MBEJI.

Adǝma awo Israyilawuro wulgǝmidǝ:

"WUMA WU WO cǝnimadǝ wua nandoro sunodo!

45 Kǝmande Ala amwurawande cayesoye,

Ala Ibrahimbe-a Isakuye-a Yakubaye-a nandoro wua sunodo,"

wulle.

Adǝma cuni abada abadanne wo.

Cu adǝlan am jaman fi yayeye sonja fakki.

46 «Lene amwurawa Israyilawuyea camme tayiro wulle:

"Kǝmande Ala amwurawande cayesoye,

Ala Ibrahimbe-a Isakuye-a Yakubaye-a wuro fǝledǝgǝna.

Alaye yeno,

ajawu Masarwu nayiro gǝnanjaanadǝa curunadǝro,

banandoro kadio.

47 Lardu bone yawi adǝlan nayia njattuluwe lardu jaumaro larasuaro njaadi.

Lardudǝ lardu jama jiɍi gadegade arakkuye,"

wulle tayiro.

48 «Amwurawa Israyilawuye nia kasannjai.

Ngawo adǝyen ni-a amwurawando-a na mai Masarrero lenowo.

Tiro:

"Kǝmande Ala Israyilawuye andiro fǝledǝgǝna,

kasadde karaaro ledu kawu yakkuye diyo,

Ala Kǝmandero ibadande bu fidaye yiddiyo!"

wullowo.

49 Amma Fira'aunadǝ jiɍi firo jǝktǝnaman,

nandia kolnjane lenuwwaworo nokkǝna.

50 Adǝ nangaro kǝrmaini ajabba ajabba sammaa Masarwuro lardunjan fǝlegǝkke tayiro ajawu gǝnagǝkki.

Fira'auna adǝa curuiya,

daji nayia kolnjane lenuwi.

51 «Koro yakkǝkke Masarwu nayia ngurnonjai,

adǝgaima cinuwiya mukko dea luwuwwawo.

52 Kamundo nguso lejo,

kamu Masarma kǝmaskinju so,

fannjun dǝgana soa cuworo tiro kare ɍiwullaye-a dinarre-a kajǝmu-a cado.

Ania yallandoro lugǝnowo.

Adǝgainin daji arsiyi Masarwuye mowuwi.»

61 «Amwurawa Israyilawuye wua kasansane manani ngojaiwawo,

koro "Kǝmande niro fǝledǝgǝnni!"

cane wulsagai.»

62 «Awi mukkonǝmbedǝ?»

«Ka.»

63 «Cidiro gǝmme!»

Kadǝa cidiro gǝpkenniya,

kadiro walje Musa rije ngawoyeno.

64 Kǝmandeye:

«Mukkonǝm sagǝne ngawareyen tai!»

Musa mukkonju sajiye ngawareyen warje ngoyenniya,

kanju cayero walyeno.

65 Daji Kǝmandeye:

«Barga adǝyen Israyilawu wu Kǝmando Ala amwurawandoye,

Ala Ibrahimbe-a Isakuye-a Yakubaye-a,

niro fǝledǝgǝkkǝnaro kasaccai.»

66 «Karawi nganjinǝmbe lene!»

Musa nganjinju fakce mukkonju ngoyenniya,

mukkodǝ barasua bul fokko walyeno.

67 Koro Kǝmandeye:

«Walle nganjinǝm fange!»

Daji Musa walde nganjinju fakce ngoyenniya,

mukkonju kǝlewa salai canju cayero walyeno.

68 Daji Kǝmandeye:

«Amwurawa Israyilawuye nia kasatturo wajane,

sheda burwoye ni kǝngayammiro fǝlejidǝro ngissaganni yaye,

yindiyedǝn nia kasannjai.

69 Yindi ania kasatturo wajane mananǝmbo ngissagannia,

bǝrǝm Niluyen ingi ngone cidi ngamdulan fine.

Ingi duwon bǝrǝmnin ngonǝme cidiro figǝmmadǝ buro walji.»

70 «Kǝmande,

wu manaro goni gǝni,

bikka ye gǝni,

bikkando ye gǝni,

kawu wuro jandesǝgǝmiro waljǝnaman koroma manamaro wallǝkkǝni.

Wu ci kurwowua,

diye!»

71 «Wundu kambo ci alakcuwo?

Wundu tia bebe bi muwaro,

simba bi kamburo cǝdo?

Wu Kǝmandodǝ gǝnia,

wundu?

72 Adǝ nangaro lene,

wu ngawonǝmnin.

Cinǝmba simogǝkke,

awo wulduye sammaa niro njǝkkǝrakki.»

73 «Kǝmande,

kanadi tai,

kam gade node.»

74 Adǝn Kǝmande Musaro gǝrgajiye:

«Yeiyanǝm Harunadǝ,

nda?

Manamaro tia nokkǝna,

koro nia kaptuwuro jawal cǝdana.

Nia njuruiya,

karwunju jauro kǝjiji.

75 Awo wulduyedǝa tiro wulle.

Wu ngawondon.

Cindoa simogǝkke mananuwi.

Awo dioyedǝa nayiro njakkarakki.

76 Ti cujunǝmbo jamadǝro manajiyi,

alama wu-a ni-a gai,

ni Ala ti nawi.

77 Ngaima koro,

ka adǝa ngone,

tima ka sheda kǝrmainiyeso fǝlegǝmidǝ wo!»

78 Musa nansǝnin walde kadinniya,

Shi'ituro:

«Ba kesaini,

marne,

nia lowonjǝkkǝna,

wua kolsǝne na ammisoyero Masarro lekke,

waneye kuason ronjaaa,

tayia rukke.»

«Lene kǝlewan jǝmme!»

79 Cidi Madiyanwuyelan Kǝmandeye:

«Musa,

cine Masarro lene,

am duwon nia njejoro manjaisodǝ samma bawo bawojana.»

80 Daji Musa koronju kasse kamunju-a tadawanju-a gǝnajiye jawal Masarre kida.

Ka Alaye mukkonna leyeno.

81 Kǝmandeye:

«Musa,

Masarro lenǝmiya,

kasadde diye awo ajabba ajabbaso niro amarnjǝgǝkkǝna sammaa fuwu Fira'aunayen de!

Amma wudǝ tia kǝlakibbuaro dikke,

jamania kolje lejaiwawo.

82 Ngawo adǝyen Fira'aunaro:

"Kǝmandeye yeno,

Israyilawua jamanju,

naptu alama tada karuye gai cadi.

83 Tadanjua kolle lejo tiro ambǝccuwo yenoson,

tia kolduro wayem.

Adǝ nangaro ti ye tadanǝm karuyea ceji,"

wulle.»

87 Kǝmandeye:

«Haruna,

lene Musaa karaan kapkǝgǝne!»

Daji leje Musaa kǝla kau kuruwu Alayedǝn cuwande tiro kamdiye lewayeno.

88 Adǝgaima Musa kawuɍi wulduyeso Kǝmande tiro cina-a awo ajabbaso shedaro fǝledaaye tiro amarjǝgǝna-a sammaa Harunaro wulyeyeno.

89 Musa-a Haruna-a amwurawa Israyilawuye sammaa capkera.

90 Haruna awowa Kǝmande Musaro wuljǝgǝna sammaa tayiro wuljiye,

koro awo ajabba ajabbaso shedaye fuwu jamayen fǝleyenniya,

91 daji Israyilawudǝ kasatkera.

Kǝmande leiyanja curuna koro bananjaro isǝnaro noyeranniya,

tayi samma tungurumjane ngujane tiro ambǝtkeyera.