Lawar kaso Nawi Musaye cidi Madiyannero
3
11 Musa wurayenniya,
yim laa cije na amnju Israyilawuyero leje kida jau fit cadidǝa lawaryeno.
Masarma laa Israyilawuye falnjaa kowoji kiro.
12 Musa memeje wunduma baworo kirunniya,
daji Masarmadǝa roro ceje katti kesaro jǝmurjiye kolyeno.
13 Wajǝnanjua kiluwunniya,
Israyilawu yindi lawala cadi kiro.
Kam yeskadamadǝro:
«Awiro kamanǝmba adǝgairo kowonǝmi?»
14 «Wundu nia maindero galanjo duwon,
sharande kammǝmidǝ?
Kam Masarredǝa yejǝmmadǝ gai,
wu yea njejoro wa mansǝmi?»
Musaye karwunjun:
«Ase,
awoni dikkǝnadǝa nojana,
diye!»
Daji riyeno.
15 Fira'auna lawar adǝa fangenniya,
Musaa njejoro mayeno.
Daji Musa lardu Fira'aunaye kolje cǝgase cidi Madiyannero leje ci baram laayen napkeno.
16 Adinma kura laa Madiyanwuye ferowanju tulurra mbeji,
cunju Shi'itu.
Ferowadǝ dimiya-a kaniya-a bawanjaye njattoro baramdǝro kadira.
17 Ingi jawudǝne dǝɍyiya kesǝmbǝɍǝnniya,
sǝniya laa isane tayia duyera.
Amma Musa karnonjaro ngaye tayia banajiye lǝmannadǝa ketto.
18 Ferowadǝ na bawanjayero walladaranniya,
bawanja Shi'ituyeye:
«Ku duwama kaduw,
nda?»
19 «Kam Masarre laa karnondero ngaye mukko sǝniyadǝyen samoye,
har ingi juwude lǝmannandea ketto.»
20 «Nda kamdǝ?
Awiro tia na todǝn kolyew?
Bowonowo,
iso kǝmbo juwo!»