Lawar kǝndambi Nawi Musaye
2
Kam laa leje fero ngoyeno.
Tayi yindi samma kaduwu Lewi tada Yakubaye.
2 Kamudǝ curo ngoje tada kongwa kembo.
Tadadǝa jauro shawaro kirunniya,
ngoje kǝndawu yakkuro gǝrayeno.
3 Yadǝ kǝndawu yakku kojǝnaro tadanjua rakce gǝrajiwaworo kirunniya,
sanduwu kayelan cǝdandǝnaa ngoje cuwuɍi sammaa koltalan lunje tadadǝa curodǝro cakke cade ci Niluyen curo kayeyero kǝla ingiyen gǝnaje walyeno.
4 Amma awo timaldǝa cuwandia kuroro,
fero yaananjudǝ kuruwun dayeno.
5 Fero Fira'aunaye bǝrǝm Niluyero kadio.
Ferowa ngawonjuye ci bǝrǝmbedǝn dadajai duwon,
mairamdǝ kasalaro ingiro jǝpkeyeno.
6 Sanduwu curo kayeyen cure kirnju cunode leje tiro kikkudo.
Sanduwudǝa fǝrǝmgenniya,
akko timal kongwa ciri.
Daji timaldǝa njunoje:
«Adǝ tada Israyilawuye,
diye!»
7 Yanjugǝna timaldǝye karǝnje fero Fira'aunayero:
«Lekke kamu kǝndewu Israyilawuye bowokke niro tadadǝa cǝɍiwi wa?»
8 «Aaa,
lene bowone!»
Daji ferodǝ leje yanjaa bowoyeno.
9 Ya kadinniya,
mairamdǝye:
«Tada adǝa ngone wuro ɍiwe,
ngǝnǝwuramnǝm njikki.»
Ngaima ya tadanjua cade kiɍiwo.
10 Tadadǝ wuraje dapkenniya,
yanju tia ngoje na fero Fira'aunayero kiado.
Daji mairamdǝ tia tadanjuro ngoje karwunjun:
«Tia ingilan tuluwukkǝnadǝro,
cunju Musa.»
Musaye maananju tuluwo.