6 Adǝgaima curo kun baɍinnen Isuwu-a kǝramiyanju-a am kǝlamanjuso-a samma bawoyera.

7 Amma kaduwu Yakuba Israyila canidǝye yalla cacasambǝne jauro ngǝwujane dama baworo waljane tatardane cidi Goshenne ngaa kemowo.

8 Adǝgaima kam laa Isuwua wundumaro nojǝnni duwon kǝrmai Masarre kiwandǝnniya,

9 amnjuro:

«Ngo Israyilawudǝ jauro ngǝwujane dunondea kojana.

10 Arowo dawari laa diyo,

bare ngǝwujanni!

Ngai gǝnia,

kǝriwu laa ciyenoa,

kǝladowandero kǝldagane andia lawalasane lardunden cotto caluwi.»

11 Daji nanngǝwunjadǝa fuluduro Masarwu Israyilawua jǝkcagane tayiro kida dunoye gǝnayeyera.

Amanja laa kǝla Israyilawuyero gǝnajagane casakke bǝla Fitom-a Ramasas-a na ajaram nema larduye Fira'aunaro kettando.

12 Jiɍi firo Masarwu Israyilawua jǝkcagaiya yaye,

tayi ye tai dajane ngǝwujane tatardane,

har Masarwudǝ tayia riyera.

13 Ngaima Masarwudǝ alama kaɍeanja gairo tayia basaryera.

14 Tayia kida jau jauro casakke,

tulo dida so,

jalap kamda so,

kida jǝrwuye samma soa cade leiya casai kasarga.

Kida dunoye jiɍi fi isiya yaye,

Masarwu tayia gǝrǝgǝrǝpcaiaro cadi.

15 Daji Mai Masarre ngosowu Israyilawuye Sifǝra-a Fuwa-aa bowoje:

16 «Kamuwa Israyilawu casambe dǝla mowuwiya,

ngǝlaro ruiwo!

Tada kongwaro walyenoa,

roro yejowo!

Feroa,

kollowo!»

17 Amma ngosowudǝ Alaa rijana,

adǝ nangaro mana maiyedǝa fanduro wajane dǝladǝ kongwaa,

ronjua koljai.

18 Maidǝ ngosowudǝa walde:

«Awiro tadawadǝa yejuwwi roa kolyew?»

19 «Barganǝmnin,

kamuwa Israyilawudǝ Masarwu gai gǝni diye,

jauro bu kamboia.

Kawu ngosoma nanjaro isimaro,

bawo casambǝna!»

20 Ala ngosowudǝa ngurnoyeno.

Israyilawu cacasambe cayea kojǝnaro kaduwunja ngǝwujane duno kedo.

21 Ngosowudǝ Alaa rijanadǝro,

Ala tayi yea kaduwu ngǝwuaro kido.

22 Daji Fira'auna amnju sammaro wada ce:

«Israyilawu casambiya,

feroa,

kollowo!

Tada kongwaro walyenoa,

bǝrǝm Niluyero gǝpkǝgǝnowo!»