3 Musa mana Kǝmandeye ngoje am mewun yindin sammanja wurawa jama Israyilawuyea tǝn karaa Farannen cǝsange lardu Kan'anayero juwayeyeno.

4 Ngo cunja:

Curo jiɍi Rubennen Shammuwa,

5 jiɍi Simiyonnen Shafat,

6 jiɍi Yahudayen Kaleb,

7 Issakarren Yigal,

8 Ifǝrayimben Yushawu,

9 Biniyaminiyen Falti,

10 Jebulonnen Gaddiyel,

11 Manaseyen Gaddi,

12 Dannen Ammiyel,

13 Asherren Sǝtur,

14 Naptaliyen Naabi,

15 Gad yeyen Guwel.

17 Sa Musa tayia lardu Kan'anaye kuroro cunodidǝn:

«Karaa Negebbeyen konowo,

cidi kauwa kura kurayero lenowo

18 lardudǝye alamanju ngǝlaro ruiwo.

Jama nadǝn dasaanadǝ kongwawa ra kwaiwuwa?

Gana ra ngǝwu?

19 Lardunjadǝ kǝji ra kuttu?

Bǝlawadǝ gargada ra gardanni?

20 Cididǝ bargaa ra kamboi?

Kǝska menna ra bawo?

Kowoɍi dewo,

tadawa kǝskaye lardudǝye kudowo.»

(Sa adǝ sa bafo bǝɍinmi inabbe.)

21 Am ani anǝmnin cadane har yalaro lejane lardudǝ sammaa kero.

22 Karaa Negebbeyen kojane bǝla Heburonnero kadira.

23 Ngor laaro kadiranniya,

dǝlam inabbe tadawa rǝssaa kamgera.

Nankurwowunjuro kǝskaro lassagane am yindi tia ngoyera.

Koro tada tarmuye-a rumanne-a ye ngoyera.

25 Curo kawu fidewuyen lardudǝa carune walladara.

26 Isane Musa-a Haruna-a jama Israyilawuye samma-a karaa Farannen na Kades canidǝn nayeyera.

Tayiro awo caruna sammaa wuljagane tadawa kǝskaye lardudǝyea fǝleyeyeranniya:

27 «Nawi Musa,

lardu juwasammadǝro leniyena.

Jiremaro lardudǝ jaumaro larasua.

Akko tadawa kǝskawa laaye.

28 Amma am larduyedǝ jauro dunoa,

koro bǝlawadǝ jaumaro kura ye,

ngǝlaro gargada ye.

Kaduwu gurjam gǝdǝdǝk Anak caniyedǝmaa ruiyena.

29 Amalakwu karaa Negebben,

Hittiwu-a Yibusiwu-a Amoriwu-a ye cidi kauwa kura kurayen,

Kan'anawu ye ci bǝrǝm kuradǝyen-a ci ingi Jordaniyen-a kasarga.»

30 Adǝa fangeranniya,

jama samma hangal Musaye sango badiyera.

Daji Kaleb hangalnja isaboduwuro maje:

«Leniyo,

leniyo,

lardudǝa moyiyo!

Jiremaro rangiye moyiye!»

31 Amma am tia casadduwunadǝye:

«Kai,

diye!

Rangiye am aniro gǝmdiyiyewawo,

dunonde kojana.»

32 Fuwu Israyilawuyen lardu lejane carunaye diwinju wuldu badiyera:

«Lardu leniye ruiyenadǝ jamanjumaa koljiwawo.

Amdǝ ye jauro dadua.

33 Am gurjam gǝdǝdǝk kaduwu Anakkemaa ruiyena.

Gǝrenjan andi naptu kawiye gai,

diye!

Koro tayima andia adǝgairo sarui.»

41 Bune farai jama Israyilawuye samma cijane burwu casakkiaro kesiro.

42 Musa-a Haruna-anin casire:

«Masarnin bi karaa adǝn nuiyenama ngalwo.

43 Awiro Kǝmande andia lardu todǝro saadǝne kǝriwunin seyesi?

Kamuwande-a yallande-a cadane kaɍeanjaro cadi.

Masarro waldiyenama gǝna ngalwo?»

44 Jamadǝ kattenjan:

«Kam laa kurandero galaniyo,

Masarro waldiyo!»

45 Musa-a Haruna-a adǝa fangeranniya,

fuwu jama Israyilawuyen tungurumjane ngumnja cidin gǝnajane Alaa lowoyera.

46 Yushawu-a Kaleb-a tayi curo am lardudǝa kuroro lejanayen mennadǝ karwukuttaro kajǝmunja kakarjane:

47 «Jama,

lardu leniye ruiyena adǝ jauro kǝji.

48 Kǝmande andia saraanaa,

lardu jaumaro larasua adǝro saadǝne andiro sadi.

49 Amma bare Kǝmandero nan'ansi yidduwwi.

Bare am lardudǝyea rinuwwi.

Tayi ci falma kojanni.

Sǝnǝmbanja rakcane tayia camoyiwawo.

Kǝmande dawunden dǝgana banasagai.

Bare tayia rinuwwi.»

50 Jamadǝ Yushawu-a Kaleb-aa kaunin gǝpcane ceyesi cani duwon,

kǝrmai Kǝmandeye fuwunjan kǝla leima Ala-a tadoramben fǝleyaada.

51 Kǝmandeye:

«Musa,

yimbi gǝle jama adǝ wua saane daraja sadi?

Dawunjan kǝrmaini dama baworo fǝlegǝkkǝna ngama,

yimbi gǝle wua mǝrsasai?

52 Adǝ nangaro masiwa tayiro juwagǝkke tayi sammaa baworo dikke,

kaduwunǝm jama adǝa kojǝnaro dikki.»

53 «Masarwu lawar jama adǝa lardunjan kǝrmainǝmnin tuluwumbaye fanjane

54 am lardu Kan'anayero wuljaana.

Am ani awo ania nojana:

ni curo jama adǝyen dǝgamma,

tayiro fǝledǝgǝme sim dewu diwi.

Fofounǝm samenjan duwon,

dunia kausua,

ni sawi yaye fuwunjan curo fofou cǝk daadayen,

bunea,

curo kannu cǝk daadayen.

55 Kǝrma pat falnin jamanǝm adǝ sammaa kejǝmba,

jama gadegade lardu Kan'anaye lawarnǝm fanjanadǝ mananǝm cade ngai cani:

56 "Kǝmanja jamanjudǝa lardu tayiro ci cǝne wadu ngojǝnadǝro rakce cakkiwaworo kirunniya,

dawu karaayen tayi sammaa kejo."

57 Adǝ nangaro Kǝmande lowonjǝkkǝna,

wullǝmmadǝ gai darajanǝm fǝlegǝne.

58 Niye:

"Wuma Kǝmando jauro kanadia ye,

amanma ye,

biwu-a nan'ansi-a gawurduma.

Amma jirenambumaa jiremaro ngokkiwawo.

Wowommi tayi-a kaduwuwanja-aro diwun diwurinno gǝnagǝkki,"

yem.

59 Kǝmande,

jamanǝmba rawonǝm duno kojǝna nangaro lowonjǝkkǝna,

tayia tǝn Masarnin caluwunalan gawurnǝmmadǝ gai,

biwunja koro gawurne!»

60 «Suworǝmmadǝ gai,

tayia gawurnǝkkǝna.

61-63 Adǝ yaye am kǝrmaini dama baworo Masarnin-a dawu karaayen-a fǝlegǝkke carunaman wua kǝrǝndu wajane,

koro mewuro wua rijamsanadǝye wundunjama lardu kaariyanjaro yikki nǝkke wadu ngokkǝnadǝa curuiwawo.

Wu mbeji koro kǝrmaini dunia ngaa cǝmowonamaa,

kansi bukkǝna,

kam wua wasǝnadǝ lardu adǝa curuiwawo.

64 Amma Kalebbe karwunju tayi toniye-a gadegade.

Wua shekku baworo sǝgana nangaro,

tia lardu leje curunaro yadǝkke kaduwuwanju ye lardudǝa cawandi.

65 Baɍi kǝla ngawonna waldǝnowo,

karaadǝa gaiwo kanji bǝrǝm Maliayero lenowo!»

67 «Musa-a Haruna-a,

yimbi jama batti ani wulan sonja koljai?

Israyilawu dama bawo wun casiri fakkǝna.

68 Tayiro ngai wulgǝne:

Wu Kǝmando kansi bukkǝna,

wu mbejia,

tayia jiɍi wuljane fakkǝnadǝ gainin takki.

Wun casirǝnadǝ nangaro,

curo karaa adǝyen sanune canadi.

69 Kam duwon kǝrwu findin tamiya kǝla samennaro yade ruwuwadadǝ,

falma karmoro kajiwawo.

Tayi samma sanui.

70 «Kansi bukkǝna,

Kaleb-a Yushawu-aro kajia,

wundunjama lardu kansi bukke yadǝkke dasayi nǝkkǝnadǝro si cakkiwawo.

71 Adǝ yaye yallanja cadane kaɍearo cadi cannadǝa yadǝkke lardu tayi noduro wajanadǝa yallanjadǝ nojai.

72 Amma curo karaa adǝyen tayi sanui ye,

73 yallanja kǝrwu fidewuro nansǝni cadi ye.

Adǝgai aman jawunadǝye ajawu yallanja casai duwon,

har wundunja yaye karaa adǝn nune canadi.

74 Lardudǝa noduro kawu fidewu casakkǝnadǝ gai,

yim faldǝ naptu saa falle cǝdi ngai,

biwu cadǝnaye ajawu saa fidewuro casai.

Ngainin wuro nan'ansi njǝddodǝ diwiro nojai.

75 Wu Kǝmando wullǝkkǝna,

kansi bukkǝna,

ngainin jama batti ci kǝljane wua ga wajana adǝa takki.

Tayi samma curo karaa adǝyen sanui.»

76-77 Am Musa lardudǝro juwajiye waldane lardudǝye diwinju wuljane jamaa casakke Musan casirǝna ani samma kasuno.

Lardudǝye diwi wuljana nangaro Kǝmande tayia kejo.

78 Curo am lardudǝa lejane carunadǝyen Yushawu-a Kaleb-a runjamaa roa kolyeno.

79 Musa Israyilawuro mana Alaye adǝa wulyeyenniya,

so dama bawo kedo.

80 Wayenniya,

suwa lǝp Israyilawu cijane jawal cidi kauwa kura kurayedǝa cǝdane:

«Akkonde,

na Kǝmande wuljǝnaro ledu diye.

Ngǝlamaro biwu ngoniyena.»

81 Amma Musaye:

«Jama,

attǝ awi diwi?

Mana Kǝmandeye ngoduro wanuwwadǝ nangaro,

nasarduwwawo.

82 Bare lenuwwi,

Kǝmande curondon gǝni.

Bare lenuwe kǝladowande nayia kǝriwunin njawunni.

83 Amalakwu-a Kan'anawu-a fuwundon,

nayia kashagarlan njeyesi.

Jawal Kǝmandeyen luwuwwa nangaro,

ti curo ledundoyen bawo.»

84 Israyilawu kǝlakibbu cade Ala tayia banajiyi cane cidi kauwa kura kuradǝyero leyera.

Amma sanduwu bam amannea naptu kuris Kǝmandeye cǝdidǝ-a Musa-a nadǝa koljanni.

85 Amalakwu-a Kan'anawu-a curo kauwa kura kuradǝyen dasaanadǝ jǝpcane tayia kǝriwun jawune,

ngǝrǝmbo casakke kadujane ceyesi ngai Formaro leyera.