29 Yakuba Israyila caniye kawunju njero karǝngenniya,

tadanju Isuwua bowoje:

«Wua sǝgammaa,

sernǝm-a karwutilonǝm-a fǝlesǝgǝne!

Marne,

mukkonǝm dunonin gǝnane wuro kansi sǝbbui,

wua Masarnin sittǝrasǝmbaworo!

30 Sa roni culuwiya,

wua Masarnin suttuluwe sade kauri bawani-a kaani-ayen sittǝrasǝne!»

«Wudǝ,

awo wulsǝgǝmma bas dikki.»

31 «Kansi bui!»

«Bukkǝna.»

Daji Yakuba kǝlakaji dǝgǝlnjuyen Alaro sujada kiddo.

41 Ngawo awo adǝ tǝdǝnayen,

Isuwuro bawanju dondi yera.

Tadawanju Manase-a Ifǝrayim-a ngoje leyera.

42 Yakubaro tadanju Isuwu kǝnde cǝdi cane fangenniya,

kowoɍije cije kǝla dǝgǝllen napce:

43 «Isuwu,

Ala martawama Baitelnin lardu Kan'anayen wuro fǝlediye wuro barga dǝmsiye yeno:

44 "Niro yalla kada njikki,

kaduwuwanǝm ngǝwugǝkke tayia kǝwu jama ngǝwuyero dikki.

Lardu adǝa kaduwuwanǝmbo tǝgǝmbo yikki,"

yeno.

45 Kǝrma tadawa yindi Masarnin kawu nanǝmbo isǝkkiro fandǝmmadǝ kakke!

Ifǝrayim-a Manase-a kakkejane alama Ruben tadani karuye-a Simiyon tadani yindiye-a gairo waljai.

46 Amma yalla tayi aniye ngawon fandǝmma samma kaanǝm.

Curo cidi yeiyawanjayen nuwanja warasaye cawandi.

Yanǝm Rahila nangaro tadawanǝm yindi ania nanin rokki.

47 Sa lardu yalayen waldǝkkidǝn,

lardu Kan'anayero ngaakke bǝla Ifǝrataye karǝnnǝkkǝna duwon,

Rahila kǝla jawallen bawoyeno.

Tia nadǝn ci jawal Ifǝrata Baitalami caniyen sittǝrayekko.»

48 Yakuba tadawa Isuwuye kirunniya:

«Wundu ani?»

49 «Tadawa Ala wuro lardu adǝn sinadǝ.»

«Tayia karǝnniro kude tayiro barga dǝpkǝgǝkke!»

50 Nankiarinjuro,

simnju awima ngǝlaro curuiwawo.

Isuwu tadawanju karǝn Yakubayero cuwude Yakuba tayiro kamdiye lewa kǝrawoye cǝde:

51 «Isuwu,

wu kuren nia kuromaro tǝmanjǝkkǝni duwon,

akko ku Ala cakke har kaduwuwanǝm kirukko.»

52 Ada Ifǝrayim-a Manase-a nanjun rodaye kerǝnniya,

Isuwu tayia kǝla duno bawanjuyen ngoje nguje ngumnju cidin gǝnayeno.

53 Koro walde cije tadawanju yindia ngoje Ifǝrayimba waila Yakubayen isadajiye,

Manasea kǝmboramnjun isadayeyenniya,

tayia fuwujiye karǝn Yakubayero kiwudo.

54 Amma Yakuba mukkowanjuye na falyeno.

Mukkonju kǝmboramba sajiye kǝla Ifǝrayimbero tima tǝngǝɍi wo yaye gǝnayeno.

Mukkonju wailaa sajiye kǝla Manaseye ti tada karuyen gǝnayeno.

55 Daji Isuwuro barga dǝpciye:

«Ala kaani Ibrahim-a bawani Isaku-a jaanadǝ jairowa aniro barga dǝpcuwo!

Ala tǝn tambǝkkǝnaman wuye sǝnidǝ tayiro barga dǝpcuwo!

56 Ala wua curo nandiwiyen suttuluwunadǝ tayiro barga dǝpcuwo!

Tayiramnin cuni-a bawani Isakuye-a kaani Ibrahimbe-a faccagaiwaworo walja!

Yalla kada cawando,

koro kaduwuwanja lardulan ngǝwuja!»

57 Isuwu Yakuba mukkonju kǝmboramba kǝla Ifǝrayimbero gǝnajǝgǝnaa kirunniya,

karwunju kuttayeno.

Mukko kǝmboram bawanjuyea kǝla Ifǝrayimben cǝdane kǝla Manaseyero njadoro maje:

58 «Bawani,

ngai gǝni,

ti adǝma diye karu wo!

Mukkonǝm kǝmboramdǝa kǝlanjun gǝnane!»

59 Yakuba waje:

«Nokkǝna tadani,

nokkǝna.

Tiye ye kaduwuwanju jamaro walji,

kuraji.

Amma kannanju tia nankuran koje koro kaduwuwanju lardu tǝrǝm garjai.»

60 Yim adǝ Yakuba tayiro barga dǝpciye:

«Jama Israyilaye ambo barga dǝpcagaiya,

cundo bowojai.

Ngai wuljai:

"Ala nia Ifǝrayim-a Manase-a gairo njǝdo!"

cani.»

Ngainin Yakuba Ifǝrayimba fuwu Manaseyen kuraro kido.

61 «Isuwu,

wuye karmoni karǝnjǝna,

amma Ala nguwundon culuwiwawo.

Nayia lardu kaarinde Isaku-a Ibrahim-ayero kalannjai.

62 Ngawo dagarndo warasaye ni-a kǝramiyanǝm-a fanduwwa adǝyen,

niro cidi mukko Amoriwuyen dunon mowokkǝnadǝa njikkǝna.»

71 Ngawo adǝyen tadawanjua bowoje:

«Captǝnowo,

awo fuwulan wakkaji wulnjagakki.

72 Captǝnowo,

kǝrnowo!

Nayi tadawa Yakubaye bawando Israyilaa kǝrnowo!

73 «Ruben,

nima tadani karuye wo,

dunoni koro ngǝsturammi nankwaye,

kannawanǝmba daraja-a martawa-an konǝmma.

74 Amma fuwumanjaro wallǝmbawo,

hangalnambunǝm bǝrǝm isi gai njakke kamuwaniye falnja-a bonuwe wua nanguro sakkǝmma nangaro.

75 «Simiyon-a Lewi-a yaanawa hal tiloa,

galanja baɍimin baktu.

76 Ala bare galanja fakkǝni!

Karwunja cije amba ceyesǝna,

curo raamdenjayen kurudu daloye kamjana.

Ala karwujaunja-a nankǝladonja-a baskujo!

77 Kaduwuwanjaa curo jama Israyilayero targǝkki,

tayia curo lardu Israyilaye ngaro tatargǝkki.

78 «Yahuda,

nimaa kǝramiyanǝm njangori wo.

Dolero waduwunǝmsoa yakkǝme fuwunǝmnin ngujai.

Tadawa bawanǝmbe ye fuwunǝmnin ngujai.

79 Yahuda tadani,

ni ngam lǝman ceje jǝgǝre bǝnaramnjuro waldǝna gai.

Ngam bojǝnadǝa,

wundu gǝle tia sangoma wo?

80 «Kǝrmai fado Yahudayen dǝgai.

Kaduwuwanju kǝla kuris kǝrmaiyen napcai,

ka kǝrmaiye nanjanna duwon,

har mai nanlewa kudoma ise jama duniaye samma tia jagai.

81 «Curo lardunjuyen kǝska inabbe nanngǝwunjuro har koronju cikkeri.

Kajǝmunju ingi kime inabbe diben canidǝn tulji.

Inginin gǝni,

amma dibennin kareyanju tulji.

82 Diben fǝkkanju federo cǝdi,

koro kiam timinju bul fakko cǝdi.

82 «Isuwu,

ti kǝska inabbe tada ngǝwu cakki gai,

sinju sawi yaye ingilan,

dǝlambanju toɍi garuyen kojai.

83 «Waduwunju Isuwua lawalaro dama baworo cadai,

tiro kǝniwu gǝgǝpcagai,

hangalnju casangi.

84-85 Amma barga Ala martawama Yakubayelan,

barga Ala Sǝni Israyilayelan,

barga Ala Sǝɍiwoma Israyilayelan,

barga Ala bawa Isuwuyelan,

ti kabbinju mukkon ngǝlaro cǝdai,

koro masku yero walji.

«Isuwu,

Ala martawama nia bananjuwo,

niro barga dǝmnjuwo!

Niro barga ingi sameye-a ingi cidin culuwi-aye njo!

Kaduwuwanǝmbe kamuwanja-a lǝmannanja-aro barga kǝnjambiye co!

86 «Barga Ala wu bawanǝmbo dǝmsǝgǝnadǝ,

amwurawandero dǝpcǝgǝnaa kojǝna.

Barga aniye nanngǝwunja sim cidi kesaye gai.

Isuwu,

ni curo kǝramiyanǝmben Ala njǝraanadǝro,

barga ani sammaa fande!»

88 Sa Israyila tadawanju fuwun jama mewun yindinno waljaidǝro barga dǝpciyidǝn,

adǝma mana wuljǝgǝnadǝ wo.

Wundunja yayero barga jiɍi gadegade dǝpkeyeno.