Lawar kǝna kǝrwuwa daryeyedǝye
9
13 Kǝnadǝye nanjauro cidi ngalan awima kǝmboye bawo.
Lardu Masarre-a Kan'anaye-a sammaa kǝnaye cǝmowona.
14 Isuwu wuɍi algama nanjun casuwunaye lardu Masarre-a Kan'anaye-a sammaa cade fado Fira'aunayen gǝnayeno.
15 Wuɍi larduwa aniye kerǝnniya,
Masarwu na Isuwuyero isane:
«Kǝmbo sadǝne!
Wuɍi nanden bawo nangaro sarumi ngai wa nuiye?»
16 «Wuɍi tawwia,
lǝmannando kudowo nayiro awo kǝmboye njadǝkki!»
17 Fǝrranja so,
dimiyanja so,
kaniyanja so,
feyanja so,
korowanja so tiro cakkude tayiro cuju lǝmannanjayero awo kǝmboye keno.
18 Saa adǝ koyenniya,
saa fuwuyen Isuwuyero isane:
«Barganǝmnin,
niro gǝranjiyewawo,
wuɍinde cerǝna,
koro lǝmannande ngaa niro njukkudiyena.
Awima niro njoye taiyende,
kulowande-a andi kǝlande-aro kajia.
19 Sarumi ngai wa nuiye kulowande faccagai?
Kǝla kǝmboyero kulowande-a andi-a ngosane kaɍea Fira'aunayero walliyo!
Kasuni sadǝne roa dǝgaiyoro,
bare andi ye nuiyende,
koro kulowande ye bowu napcanni!»
20 Ngainin Isuwu kulowa Masarre sammaa Fira'aunayero kido.
Nanjau kǝnadǝyero Masarma fi yaye kulonju kilado.
Ngainin cidi nga Fira'aunayero walyeno.
21 Masar ngalan am bǝladeyayedǝa cuttuluwe bǝrni bǝrniro juwayeyeno.
22 Amma kulowa malǝmba sǝnǝmbe ciwunni,
katte tayi-a Fira'auna-ayen wada laa mbejǝna nangaro.
Fira'auna tayiro kǝmbo ci jawui nangaro,
kulowanja caladǝnni.
23 Isuwu jamaro:
«Ku nayi-a kulowando-a sammaa Fira'aunayero dikkǝna.
Akko kasuni kulondon nadoye.
24 Sa kalayen fal curo uwuyen Fira'aunaye,
dewudǝ kaando.
Laaa kasuniro gǝnanowo,
gapcǝnadǝa nayi-a yallando-a am fanndon dasaana-a buiwo!»
25 «Andia karmon samowomma.
Andia kasansane kaɍea Fira'aunayero walliyo!»
26 Ngaima Isuwu wowom ngojǝnadǝ ku kundenno mbeji:
Masarnin sa kalayen fal curo uwuyen Fira'aunaye.
Kulowa malǝmba sǝnǝmbe tayi runjama Fira'aunaye gǝni wo.