Lawar Nawi Isuwuye yeiyawanjua rijaptuye
7
Isuwu wolodinjuro:
«Buwu am aniyedǝa algaman cappo yimbǝɍe,
wuɍidǝ yea ci buwunjayero yakke!
2 Koro diben njarammi ɍiwullayedǝa ngone wuɍi algamanjuyea kundenno curo buwu ganamanjayero yakke!»
Daji awo Isuwu wuljǝgǝnadǝa kido.
3 Dunia wayenniya,
suwa awaanawadǝ-a korowanja-a salamjane jawal keda.
4 Bǝladǝn kuruwujanni duwon,
Isuwu wolodinjuro:
«Cine am tonia kadune.
Tayia nagǝmiya,
ngai wulgǝne:
"Awiro awo ngǝlaa diwin kirǝmbuw?
5 Nda diben njaram ndalluwwadǝ?
Timan kǝmani kǝnja cǝdi,
koro timan diye kuro cǝdi.
Awo diwi diwwa."»
6 Leje awaanawadǝa najiye adǝgai wulyeyenniya:
7 «Ala ngǝwuro,
ndayilan andiro awo adǝa kǝrsagami?
Ngaltema awo adǝ gai karwunden wakkajǝnni.
8 Wuɍi curo buwundeyen fandiyenadǝmaa lardu Kan'anayen kalangiyena,
gǝna?
Ndayilan ɍiwulla bi dinar fado kǝmanǝmben ndalliye?
9 Diben njaramnjudǝa curo kare kamnde laayen kiwandǝmba,
tia roro yeje,
andi gammiyenadǝ ye kaɍeanǝmbo walliyo!»
10 «Kasaddǝkkǝna,
wulluwwadǝ gairo dikki.
Kam nanjun diben njaramdǝa fandǝkkǝnadǝ kaɍeaniro waljiya,
nayi gadedǝ lenowo!»
11 Jǝkcagane buwunja casaye wundunja yaye kaanju kayeno.
12 Wolodi kareyanja fǝsandu kuranjan ngǝsse gananjan kerǝnniya,
diben njaramdǝa buwu Biniyaminiyen kiwando.
13 Awaanawadǝ ajapcane karwukuttaro kajǝmunja karjane korowanja lapcane bǝladǝro walladara.
14 Sa Yahuda-a awaanawanju-a fado Isuwuyero isanadǝn,
Isuwu fadon culuwunni duwon tia najagane fuwunjun cidiro tǝmgadara.
15 Isuwuye:
«Attǝ awi diw?
Kam wu gai kuro cǝdiro nonuwwi wa?»
16 Yahudaye:
«Barganǝmnin,
awi wulnjǝgǝiye?
Ndayilan awima diyendero isanonjǝgǝiye?
Ala asǝrnde kajǝna.
Andi ku kaɍeanǝm,
andi-a kam nanjun diben njaramdǝa cawandǝna-a samma.»
17 «Ngaltema awo adǝ gai dikkǝni.
Kam diben njaramdǝ nanjun cawandǝnadǝa kaɍeaniro dikkiya,
nayi gadedǝ kǝlewando salainin na bawandoyero wallowo!»
18 Yahuda tia karǝnje:
«Barganǝmnin,
marne,
ni-a Fira'auna-a samma kallo nokkǝna,
kanadi tai bare gǝrgasǝgǝmmi,
kolle niro mana njǝddǝkke.
Barganǝmnin,
andia bawande bi awaanande gade mbejǝnaro seworǝm.
19 Andiye niro:
"Kiari bawandeye-a tada nankiarinjun tambǝna-a mbejai,"
yeiye.
20 Kannande adǝ ti runju yanjuyen gapco,
yeiyanju nuna.
Bawande ye tia cǝraana.
Andiro tia kudiyo simnǝmlan rumi yem.
Amma andiye niro:
"Barganǝmnin,
rakce bawanjua koljiwawo.
Tia kolyenoa,
bawanju nui,"
yeiye yaye,
21 niye kannandea kudiyendea,
andia fuwunǝmnin kasansambawo yem.
22 Na bawandeyero waldiye tiro awo wulsagammaa wulgǝiye.
Sa bawande waldiyo kǝmbo gana laa yiwiyo cǝnnadǝn,
23-26 tiro:
"Rangiye waldiyewawo,
kannande ye lejǝnnia.
Ti nanden bawoa,
wakkil maiyedǝ andia kasansaiwawo,"
yeiye.
27 Bawandeye:
"Ngǝlamaro nonuwwa,
kamuni Rahila tadawa yindima sǝkkambo.
28 Tadani fal duniaro ngaana.
Fagat,
bundi karaaye laa tia njanjakco,
kuamima tia rukkǝni nangadǝro.
29 Koro faldǝ yea ngoduro manuwi.
Kudǝra laa tia kiwandoa,
wu jauro kiarinǝkkǝnaa sakkuwe karwukutta sesi,"
yeno bawandeye.
30 «Barganǝmnin,
fado bawandeyero kannande bawoa lekkia,
waiyo!
Bawande tadanjua karwun jǝgai nangaro
31 ti bawo curuiyama,
nui.
Tia curo nankiarinjuyen karwukuttan yejiye.
None,
wu tadadǝa fuwu bawanjuyen ɍiwukki nǝkkǝna.
32 Tiro:
"Bawani,
Biniyaminia kalanjǝgǝkkǝnia,
biwu njǝddǝkkǝna adǝa har sawisoro kǝlaniro ngokki,"
yekko.
33 Kǝrma Barganǝmnin,
kolle cuju tadadǝyero wu na adǝn nammǝkke kaɍeanǝmbo wallǝkke.
Ti-a yeiyawanju-a kolle leja.
34 Ndayinin kannani bawo na bawaniyero lekki?
Karwukutta tia cuwandidǝa rangǝkkiwawo!»
41 Daji Isuwu rakce fuwu jama adǝ sammayen karwukǝjinju gǝrajiwawodǝ:
«Am fanniye sammaa tuluwowo!»
Adǝgai sa Isuwu kǝramiyanjuro isanodǝgǝnadǝn,
tayi gǝnia wunduma nadǝn bawo.
42 Dama baworo cire har Masarwu sonju fanjane lawardǝ na Fira'aunayero kadio.
43 Isuwuye:
«Wuma Isuwu!
Bawani koro yaye ronjua wa?»
Amma karwukambo lolojaidǝ rakcane tiro mana kalakcagaiwawo.
44 «Gǝreniro arowo!»
Gǝrenjuro kadiranniya:
«Wuma Isuwu kannando sǝladuwe Masarro saadǝnadǝ wo.
45 Kǝrma bare yakkuwe karwundo kuttajǝnni,
bare kǝlando sariwunuwe sǝladuwe Masarro saado wulluwwi.
Aladǝma nayin burwonno wua na adǝro suwudo,
rondo njǝkkaworo.
46 Ngo ku kǝrwu yindi lardu adǝn kǝnaa,
koro yaye kǝrwu uwuro lardudǝn bare-a kala-a tǝdiwawo.
47 Ala nayin burwonno suwudo,
rondo yikkagǝkke dunian nayi-a kaduwuwando-a nammoworo.
48 «Nayi gǝni,
Alama diye na adǝro suwudo.
Wua amanma Fira'aunayero gǝnase fannjua mukkoniro cakke Masar sammaa nodǝkkiro walyeno.
49 Duwan lenowo bawaniro adǝgai wullowo:
"Tadanǝm Isuwuye yeno:
Ala tia kura Masar ngayero cǝdǝna.
Bare tussǝmmi,
50 are lardu Goshennen karǝnnjulan namme!
Ni-a tadawanǝm-a diwuwanǝm-a feyanǝm-a dimiyanǝm-a kaniyanǝm-a kǝndanǝm-a samma arowo nammowo,
51 nayia ambanja,
dalilnjudǝ koroson kǝna kǝrwu uwuye gapco nangaro.
Adǝgai ni-a tadawanǝm-a kǝndando falma fudduwwawo,"
yeno.
52 «Fanowo yeiyawani,
simndon ruwi,
koro kannani Biniyamini ye simnjun curui,
jiremaro wuma diye nayiro jandenjagakkidǝ.
53 Bawaniro daraja Masarnin takkǝna-a koro awo na adǝn ruwwa-a sammaa wulgǝnowo.
Daji duwaduwan lardu adǝro tia kudowo!»
54 Daji Isuwu dau Biniyaminiyero kamdiye lewaje kiro.
Biniyamini ye tiro kamdiye kiro.
55 Yeiyawanju sammaro kamdiye lewaje cire tayia simalon ciyapko.
Ngawo adǝyen kǝramiyanju-a jandeyera.
56 Mairin lawar awaana Isuwuye isanaye fangeranniya,
Fira'auna-a kowonawanju-a samma karwunja kǝjiyeno.
57 Daji Fira'aunaye:
«Isuwu,
awaanǝmbo korowanja lapca lardu Kan'anayero walda.
58 Bawanja-a yallanja-a cawudo naniro.
Cidi Masarre sammaro na ngǝla wodǝa tayiro yikke nema kǝji kǝji lardudǝye jaworo!
59 «Koro tayiro adǝgai wulle:
Masarnin amalankeya casado tadawanja-a kamuwanja-a cawudoro.
Bawando yea gǝnajaa cawudo!
60 Bare karenja na todǝn koljaidǝa karwun jaanni.
Cidi ngalwo Masarredǝ kaanjaro walji.»
61 Tadawa Yakubaye adǝgai kedo.
Wada Fira'aunayen Isuwu tayiro amalankeya-a kansi-a keno.
62 Ngawo adǝyen tayi sammaro kajǝmu fal fal keno,
amma Biniyaminiro kajǝmu uwu-a cungu yer yakku-a keno.
63 Ngo awo bawanjuro juwajǝgǝnadǝ:
korowa bi mewu awowa ngalwo ngalwo Masarren lapkada-a korowa karwudi mewu algama so,
burodi so,
kansi sonin lapkada-aa.
64 Daji sa awaanawanju salamje saptaidǝn,
«Bare jawalnin gaduwwi!»
65 Masarnin saptane,
lardu Kan'anayero na bawanja Yakubayero isane:
66 «Isuwu ronjua!
Har tima Masar sammaa cunodi!»
Amma Yakuba gǝm napkeno,
tayia casaranni.
67 Mana Isuwuye tiro wuljagane fanje koro amalankeya juwajǝgǝnadǝa kirunniya,
daji bawanja Yakubaye karwunju kǝjije:
68 «Mana cerǝna!
Tadani Isuwu roa,
kawu nukkidǝro lekke tia rukki.»
71 Daji Yakuba Israyila canidǝ kǝndanju sammaa ngoje jawal kida.
Bir-Shebaro kadinniya,
Yakuba Ala bawanju Isakuyero duwa kiddo.
72 Bune adǝ curo kǝnnasimben Ala tia bowoje:
«Yakuba!
Yakuba!»
«Naam?»
73 «Wuma Ala,
Ala bawanǝmbe wo.
Bare Masarro ledu rinǝmmi.
Lardudǝn kaduwunǝm jama kadaro dikki.
74 Wu-a ni-a rokko Masarro leniye,
koro wuma nia kalannjǝkki.
Yim numiya,
Isuwu simnǝm lamjiyi.»
75 Yakuba Bir-Shebaa kolyeno.
Tadawa Yakubaye kǝla amalankeyadǝyero bawanja-a yallanja-a kamuwanja-a ngoyeyera.
76 Lǝmannanja-a arsiyi lardu Kan'anayen jagandǝna-a ngojane leyera.
77 Adǝgai Yakuba tadawanju-a ferowanju-a diwuwanju-a sammaa ngoje kallo Masarro leyera.
86 Kaduwu Yakubaye Masarro lejanadǝ kamuwa tadawanjuye dawun baworo tayi am firakkun arakkun.
87 Isuwu-a tadawanju yindi Masarnin tasambǝna-aro jama Yakubaye Masarnin napcanadǝa kǝldiya,
tayi fitulur.
88 Yakuba Yahudaa na Isuwuyero cunode lejo ti lardu Goshennero kǝnde cǝdi wuljo yeno.
Cidi Goshennero si kesakkǝnniya,
89 Isuwu amalankenju kasse bawanjua kapkeyeno.
Tia kirunniyama,
Isuwu dau bawanjuyero kamdiye jauro kiro.
90 Yakubaye:
«Kǝrma fǝkkanǝm rukke nia roaro nonjǝkkǝnadǝ,
kua karmo yaye kal!»