Lawar bǝlawuro Masarro yeiyawa Nawi Isuwu-a kannanja Biniyamini-aye
6
15 Cijane jiye-a wuɍi kawak yindi-a Biniyamini-a ngojane Masarro isane na Isuwuyero kasargawo.
16 Isuwu Biniyamini-a tayi-a kallo isana kirunniya,
wolodinjuro:
«Am ania fanniro yade,
lǝman duwane bǝri dene!
Wu-a tayi-a ku kausu rokko bǝri buiye.»
17 Wolodinju mana Isuwuye fanje tayia fadoro kiado.
18 Tayia fado Isuwuyero kiadǝnniya,
rijane:
«Kǝla wuɍi kǝnsionde burwoyen buwundero kalakcaanayen andia fado adǝro sewudo.
Andiro sasukkurune basarsane korowande camoye andia kaɍeanjaro sadi.»
19 Daji ci fadodǝyen wolodidǝa karǝnjane:
20 «Ala ngǝwuro,
marne,
burwoman kǝmbo njuworo isiyena.
21 Sa waldiyedǝn,
bune bǝnaro jǝmmiye buwunde kayeiyendea,
wundunde yaye wuɍi kǝmbo njuworo cuwudǝna kalkal taman algama ciwunayea ciwando.
Akko wuɍi cayedǝa kalangiyena,
22 koro akko wuɍi gade kǝmbo njuwoye kudiyena.
Jiremaro kam wuɍidǝa curo buwundeyero cakkǝnaa noniyende!»
23 «Hangalndo bojo,
bare rinuwwi!
Ala nandi-a bawando-a gawidǝ,
tima arsiyi adǝa buwundoro cakko.
Wuɍindo cayedǝa fandǝkkǝna.»
Daji Simiyonna kolyeno.
24 Tayia fado Isuwuyero cakke tayiro ingi si tuldaye ce,
koro korowanjaro kǝmbo keno.
25 Isuwu-a tayi-a rokko bǝri kausuye jawuiro fanjana nangaro,
kawu sa bǝri boye cǝde Isuwu isidǝro jiyenjudǝa dabbaryera.
26 Isuwu fadoro kǝrgaanniya,
jiyenjudǝa tiro cade fuwunjun tungurumjane ngumnja cidin gǝnayera.
27 Nanlewanja-a nanlewa kiari bawanja-a kiworǝnniya,
28 ngujane tiro sujada cadde:
«Barganǝmnin,
bawande kǝlewanju salai ronjua.»
29 Isuwu kǝla sapce kannanju Biniyamini tada yanjuyea kirunniya:
«Adǝma wa kannando mananju sǝdduwwadǝ?
Tadani,
Ala ser njǝddo!»
30 Kannanju curunadǝ karwunju dama bawo kǝjije daunju namde duwan cije na so dioye mayeno.
Curo ngimnjuyero ngaye kiro.
31 Daji fǝkkanju tulje walde ise kanadi cǝdane:
«Bǝridǝa figǝnowo!»
32 Isuwu runjun,
kǝramiyanju runjan,
Masarwu fannjun bǝri jawuidǝ ye runjan bǝri kedo.
Masarwu-a am jiɍinja sǝni-a rokko kǝmbo jawuiwawo,
adin Masarwuye dapcǝgǝna nangaro.
33 Fuwu Isuwuyen kǝramiyanjudǝa ganan kuranno sǝreccane napkera.
Ajapkadaro amanjaa carui duwon,
Isuwu cakke kǝmbo fuwunjuye laa ngojane tayiro dagaryeyera.
34 Dagar Biniyaminiyedǝ yeiyawanju fiye yayea uwuro kawakcǝna.
Bǝri jawune diben ye casane tǝn kulyera.