Lawar kǝrmai fando Nawi Isuwuye Masarnin
4
Kǝrwu yindi koyenniya,
Fira'auna kǝnnasim kido.
Ti ci bǝrǝm kura Niluyen daada duwon,
2 curui ngai feya tulur ngǝla lai kǝna bawoa ingidǝn caluwe ci bǝrǝmbedǝn newo badiyera.
3 Koro feya tulur deri ye kuroro diwi ye tayia jaane ingidǝn caluwe gǝrenjan dayera.
4 Daji feya tulur deri ye diwi yedǝ tulur ngǝla kǝna bawoadǝa gegǝro.
Adǝa kirunniyama,
Fira'auna kǝnǝmnin fayeno.
5 Walde koro kǝnǝm tia ngoje kǝnnasim gade kido.
Kǝla algamaye tulur ngǝla jauro simba kajim algamaye falnin keluwo.
6 Ngawo aniyen kǝla tulur gade lumbu kausu bakcǝna keluwo.
7 Daji kǝla tulur lumbu kausu bakcǝnadǝ tulur ngǝla simbadǝa kesundo.
Sadǝn Fira'auna kǝnǝmnin fayeno.
Ase,
kǝnnasim!
8 Dunia wayenniya,
Fira'auna hangal caa cijǝnaa cakke bokawa-a ilmuwu-a Masarre sammaa capkera.
Kǝnnasimbanjudǝa wulyeyenniya,
wundunjamaro fisardu katkero.
9 Daji kura dibennjuro kistuwuwuye Fira'aunaro:
«Barganǝmnin,
ku biwuni cayedǝa tangǝkkǝna.
10 Kowonawanǝmbo gǝrgagǝme yakkǝme wu-a kura burodiwunǝmbe-a kosoro fado kura askǝrrayen rosera.
11 Andi yindi samma bune fal kǝnnasim kidiye.
Wundunde yaye kǝnnasim maana gadegadea kido.
12 Nanden kaɍea laa lardu gadeye wolodi kura askǝrraye mbeji.
Kǝnnasimnde tiro wulgǝiyendeya,
wundunde yayero kǝnnasimnju fisaryeyeno.
13 Awo wulsaana samma wakkayeno.
Wua kidaniro kalansǝgǝme kowonanǝm todǝa kǝskaro royeyem.»
14 Fira'auna cakke Isuwua bowoyera.
Curo kosoyen tia gangadaro cattuluwe fǝkkanju-a kǝlanju-a calare kajǝmunju falje na Fira'aunayero kadio.
15 Fira'aunaye:
«Kǝnnasim dikkǝna,
fisardumanju fandǝkkǝni.
Amma ni biya kǝnnasim kambe wulnjagane fanǝmiyama,
rangǝme fisarnǝmi cani fakkǝna.»
16 «Barganǝmnin,
wu gǝni,
Ala diye niro maananju kalkal nji.»
17 «Kǝnnasimnilan wu ci bǝrǝm Niluyen daada duwon,
ngai rukko:
18 feya tulur ngǝla lai kǝna bawoa ingidǝn caluwe ci bǝrǝmben newo badiyera.
19 Koro feya gade tulur kuroro diwi ngamdu car keluwo.
Ngaltema feya ngamdu tayi gai lardu Masarre samman rukkǝni.
20 Feya ngamdudǝ feya kǝna bawoadǝa gegǝro.
21 Jagǝrǝnaman,
awima jawunni gai kuljanni.
Adǝ samma yaye,
cayedǝ gai ngamgera.
Adǝa kirukkǝniya,
fayekko.
22 «Koro kǝnnasim gade kidǝkko.
Kǝla algamaye tulur rus basawuna kajim algamaye falnin keluwo.
23 Koro kǝla algamaye tulur sim bawoa kausu bakcǝna fǝkcai kirukko.
24 Daji kǝla algamaye kausu bakcǝnadǝ kǝla rus basawunadǝa kesundo.
Bokawaro wulyeyekkǝniya,
wunduma maananja nojǝnni.»
25 «Barganǝmnin,
kǝnnasim yindi samma awo falma.
Awo Ala fuwun cǝdidǝa niro fǝlenjuwo.
26 Feya kǝna bawoa tulurdǝ-a kǝla algamaye simba tulurdǝ-a naptu kǝrwu tulurre cadi.
Kǝnnasim yindidǝ samma tilo.
27 Feya ngamdu tulurdǝ-a kǝla algamaye tulur kausu bakcǝnadǝ-a tayi ye naptu kǝrwu tulurre cadi,
amma kǝrwu tulur kǝnaye.
28 «Barganǝmnin,
awo wulnjǝgǝkkǝnadǝma!
Ala awo fuwun cǝdidǝa fǝlenjuwo.
29 Kǝrwu tulur burwoyedǝ lardu Masarre samman nema ngǝwu tǝdi.
30 Koro ngawo adǝye kaldǝn kǝrwu tulur kǝnaye tǝdi.
Nema sammaa baworo cǝde,
har nema tǝdǝnama nodǝnniro walji.
Kǝnadǝ lardu Masarrero dama bawo ngayi.
31 Jauro jauje ngaltema larasu tǝdǝnni gairo walji.
32 Kǝnnasimdǝa yindiro dimmaye dalilnjudǝ Ala awo wulnjǝgǝkkǝnadǝa tabbat dioro niajǝna,
koro dionju tussiwawo.
33 «Barganǝmnin,
kam hangalla ye,
ilmua ye mane,
Masarra mukkonjuro yakke.
34 Am galane Masarnin curo kǝrwu tulur nemayedǝn biyila nguson nema fal curo uwuyen capca.
35 Nema algamaye kǝrwu tulurre sammaa yekkinnǝmbaro capca bǝla bǝlan ajaja.
36 Tayima aja kǝmboye Masarre kǝrwu tulur kǝnayedǝro waljai wo.
Daji adǝgailan kǝnadǝ jama larduye cejiwawo.»
37 Fira'auna-a kowonawanju-a mana Isuwuye faidaaro ngojane,
38 Fira'aunaye:
«Kam Ruhu Alaye nanjun adǝ gaia fandiye wa?
39 To,
Isuwu,
Ala awowa ania niro isanonjǝgǝnadǝ,
kam gade hangalla-a ilmua-anin ni gai cǝdǝna bawo.
40 Nima kura fanniyero wallǝmi,
koro jamani sammaa nodǝmi.
Wu ye kaala nanmaiyen basnin nia konjǝkki.»
41 «Akko Masar samma mukkonǝmnin!»
42 Daji kulum kǝrmaiye ngulondonjuyedǝa cuttuluwe ngulondo Isuwuyero cakke kajǝmu masariya lujiye lema dinarre daunjuro kekko.
43 Daji kǝla amalanke wakkilnjuyero gǝnajiye am fuwunjun cagasiaro kowo sapcane jamaro:
«Tungurummowo!»
cani.
Adǝgailan Fira'auna tiro kǝrmai Masarre keno.
44 Fira'aunaye:
«Isuwu,
wu mai,
amma kasatkem gǝnia,
Masarnin kam rakce awo laa cǝdi bawo!»
45 Isuwuro cu masarmasar ce kamuro Asena fero kura sǝnǝmgu kǝngalledǝa keno.
Daji Isuwu lardu Masarrea jiyaraduro kiluwo.
46 Isuwu kǝrwunju fiakku duwon,
Fira'auna tia wakkillo galayeno.
Daji na Fira'aunayen sapte cidi Masarre ngaa giya.
47 Kǝrwu tulur nemayedǝn Masarnin nema dama baworo cakke Isuwu nema kada bǝla bǝlan capkeno.
Nema bǝladeyayedǝa bǝla kura karǝnnen capce ajayeno.
49 Algama tǝrǝm sim cidi kesayedǝ gai cacapce,
har komdiwaworo walyeno.
50 Kawu kǝna isidǝro,
Asena kamu Isuwuye tadawa kongwa yindi kembo.
51 Kuradǝa Isuwu Manaselan bowoje:
«Ala cakke kuttu caye yakkǝnadǝ-a am fado bawaniye samma-a ngessǝkkǝna.»
52 Ganamadǝa Ifǝrayimnin bowoje:
«Lardu bone yakkǝna adǝn Ala wua kǝndambimaro sǝdǝna.»
53 Isuwu wuljǝnadǝ gai,
kǝrwu tulur nemayedǝ cesere tulur kǝnayedǝ badiyera.
Larduwa samman kǝnaa,
amma Masarnin awo kǝmboye menna.
55 Am Masarre sammaa kǝna bakce Fira'aunayero sonja caade awo kǝmboye mayeranniya:
«Isuwuyero lenowo,
awo wulnjagaidǝa dewo!»