Lawar nankaɍea Nawi Isuwuye Masarnin
3
Ismayilawu Isuwua Masarro kewudǝranniya,
tia kelado.
Kam tia ciwunadǝ kowona Fira'aunaye ye,
kura askǝrranjuye ye,
cunju Fotifar.
2 Kǝmande Isuwua banajiyi nangaro,
awo cǝdi samma tiro ngǝlajiyi.
Fado kǝmanjuyeman kǝrga.
3 Kǝmanjudǝ Kǝmande Isuwua banajiye awi yaye ngǝssiya tiro ngǝlajiyiro kirunniya,
4 daji Isuwua ngurnoje tia wolodinjuro ngoje fannju ngistuwumaro cǝde arsiyinju sammaa mukkonjuro kekko.
5 Tǝn sa Fotifar tia fannju-a arsiyinju-a ngistuwumaro cakkǝnadǝn,
Kǝmande Isuwu nangaro fannjuro barga dǝpkeyeno.
Fado yen kal,
kulo yen kal,
sammanjaro barga dǝpkeyeno.
6 Ngaima Fotifar kǝndanju falma koljǝnniro mukko Isuwuyero cakke,
kǝmbo juwuiro kajia,
Fotifardǝ awimaro ngissiyiwaworo walyeno.
Isuwu jairo ye,
shawa yedǝ,
7 yim laa kamu Fotifarre tia mangarje:
«Are boniyo!»
8 «Wakkǝna!
Wuramnin kǝmani awimaro fannjun ngissiyiwawo,
arsiyinju sammaa mukkoniro cakkǝna.
9 Fado adǝn kam wua nankuran kosǝna bawo.
Awo wuro damsǝgǝna bawo,
niro kajia,
nidǝma kamunju nangaro.
Kaiya!
Ndayinin awo diwi adǝa dikke Alaro biwu yiddǝkki?»
10 Kullum kamudǝ Isuwuro bojaro bowojiya,
tiro kissiyiwawo.
11 Yim laa Isuwu fadoro kidaro kǝrgaanniya,
am fadoye falma bawodǝ,
12 kamu Fotifarre tia kalwuyen cǝdane:
«Are boniyo!»
Amma kamudǝ kalwunjua kassidǝ,
Isuwu tiro koljiye cǝgase fadodǝn kiluwo.
13 Kamudǝ Isuwu tiro kalwunju koljiye cǝgase taɍiaro culuwunaro kirunniya,
14 am fadodǝyea bowoje:
«Ruiwo,
fadomande kaɍea batti adǝa andiro kǝlangasaaro sekkudo.
Wua masi cǝne kadinniya,
burwu kekkǝkko.
15 Burwu yakkǝkki fangenniya,
kalwunju wuro kolsiye ngǝrǝmje kiluwo.»
16 Daji kalwu Isuwuyedǝa har kǝnde kwanjuyero gǝrenjun gǝnayeno.
Kwanju kadinniya,
17 mana am fadoyero cǝddǝnadǝ gai tiro cǝdde:
«Kaɍea batti andiro sakkudǝmmadǝ wua masi cǝne naniro kadio.
18 Burwu kekkǝkkǝniya,
kalwunju wuro kolsiye ngǝrǝmje kiluwo.»
19 Mana kamunjuye fangenniya,
kǝma Isuwuye fum gǝrgayeno.
20 Isuwua cǝdane na kosowu maiye jakkadadǝro cade kekko.
Isuwu curo kosoyeman,
21 Kǝmande tiro ser njǝddo koljǝnni nangaro,
kura kosorambe tia ngurnoje kosowu sammaa mukkonjuro kekko.
Awo dioye ngaa ti cakke cadi.
23 Kura kosorambe awo mukko Isuwuyero cakkǝna sammaro ngissiyiwawo,
dalilnjudǝ Kǝmande Isuwuro banajiye awo ngǝssǝna samma ngǝlaji nangaro.
31-32 Yim laa ngawo lamar adǝyen kowonawa yindi Mai Masarrero biwu keddo.
Tayima kura diben maiyero kistuwuwuye-a kura burodiwunjuye-a wo.
Fira'auna tayiro gǝrgajiye kosoram fado kura askǝrranjuyen na Isuwu jakkadadǝro kekko.
34 Daji Fotifar Isuwua tayiro nanwolodi cǝddoro nanjaro kiwudo.
35 Kura dibenno kistuwuwuye-a kura burodiwuye-a koson dasaana duwon,
yim laa bune tayi yindi samma kǝnnasim kedo.
Wundu yaye kǝnnasim maanaa kido.
36 Suwa Isuwu nanjaro kadinniya,
tayi samma karwukuttaro fǝkka kǝrgadaa cure:
37 «Awi nangaro ku fǝkkando kǝrgadadǝ?»
38 «Wundunde yaye kǝnnasim cǝdǝna,
amma wunduma kam kǝnnasim ania fisarduma bawo.»
«Fasari Alayen isi,
mare?
Wulsǝgǝnowo kǝnnasimndodǝa!»
39 Daji kura dibenno kistuwuwuye mana ngoje:
«Curo kǝnnasimben kǝska inabbe
40 sǝmo yakkua fuwunin kirukko.
Fǝkkenniyama,
fǝɍenju kaje tadawa basawuna kesakko.
41 Diben njaram Fira'aunaye mukkon takkǝna,
tadawadǝa takke ngiddǝkke inginja diben njaramdǝro fidiye Fira'aunaro kekko.»
42 «Akko maananju!
Sǝmo yakku rumma ani kawu yakku.
43 Curo kawu yakkuyen Fira'auna nia gawurnje kǝlanǝm fandǝme kidanǝm cayero kalannjiyi.
Caye gai diben njaramnju Fira'aunaro yimi.
44 Marne,
sa kǝji fanǝme kidanǝm kalkallo dimiro waljiya,
lowonjǝkkǝna bare wua ngessǝmmi.
Marne,
wuro ser adǝa sǝdde,
Fira'aunaro manani yidde wua koso adǝn suttuluwo.
45 Lardunin wua kaɍearo ngosane settuluwo,
koro na adǝman awima diwi dikkǝni wua janseyera.»
46 Kura burodiwuye Isuwu kamanjuro fasari kǝji cinaro kirunniya:
«Akko awo wu ye curo kǝnnasimben rukkǝnadǝ:
Jowo yakku burodi bul fokka kǝlanin gǝnaadaa.
47 Jowo toɍiyedǝn kǝmbo burodiburodi Fira'aunaye cǝraana samma mbeji,
ngudowa isane curonjun jawui.»
48 «Akko maananju!
Jowo yakkudǝ kawu yakku.
49 Curo kawu yakkuyen Fira'auna kǝlanǝm kamje nia kǝskaro ronjiye ngudowa isane tǝgǝmbo danǝm jawui.»
50 Kawu yakku koyenniya,
yim saandurinjua Fira'auna kowonawanju sammaa bǝri ngǝmǝriye boro doyeno.
Dawunjan kura dibennjuro kistuwuwuye-a kura burodiwunjuye-aro shara kiddo.
51 Kura dibennjuro kistuwuwuyea kidanju cayero kalakciye diben njaramnju Fira'aunaro keno.
52 Kura burodiwunjuyea kǝskaro royeyeno.
Awo Isuwu wuljǝnadǝ gai samma tǝdo,
53 amma kura dibenno kistuwuwuye Isuwua fǝdǝm ngeskeno.