Lawar Yahuda-a kǝsainju Tamar-aye
2
Jaman adǝn Yahuda kǝramiyanjua kolje bǝla Addullambero na kam laa Hira caniyero leyeno.
2 Na adǝn fero Kan'anama laayea cure kamuro ngoyeno.
3 Ti-a bojane curo ngoje tada kongwa cambe Yahuda tia Yernin bowoyeno.
4 Gademinno curo ngoje tada kongwa cambe tia Wonanalan bowoyeno.
5 Koro tada kongwa cambe tia Shelalan bowoyeno.
6 Yahuda tadanju karuye Yerro fero laa cu Tamarra kamuro ngoyeyeno.
7 Amma Yerdǝ jaumaro hal diwiadǝ,
Kǝmande tia wul waje roro kejo.
8 Daji Yahudaye:
«Wonana,
nima yeiyanǝm faccǝgǝnaye kǝraminju karǝnne wo.
Awo niro wajimnjǝgǝnadǝa de.
Kamunjua niyane tiro kasuni magǝne!»
9 Amma Wonana tadawa Tamar tiro cǝkkambidǝ kaduwunjuro waljaiwaworo nojǝna.
Sa kamu yeiyanjuye-a bojaiya,
maninjudǝa kolje cidiro fidiyi,
bare yeiyanjuro kaduwu cinni nangaro.
10 Awo diwi cǝdi adǝa Ala wul waje ti yea roro kejo.
11 Yahuda kǝsainju Tamarro:
«Lene fado bawanǝmben kwa bawoa namme,
har tadani Shela wurajo!»
Amma karwunjun:
«Lejo mana,
bare Shela ye yeiyawanjudǝ gai nunni!»
Daji Tamar leje fado bawanjuyen napkeno.
12 Ngawo kawu kadayen kamu Yahudaye bawoyeno.
Lagaran koyenniya,
Yahuda-a sawanju Hira-a bǝla Timnayero na am kanduɍi dimiyanjuye gǝrǝpcairo leyera.
13 Tamar lawar kǝsainju Timnaro kanduɍi dimiyanjuye gǝrǝpturo lejiye fangenniya,
14 kajǝmunju kamu kwa faccǝgǝnaye cuttuluwe kǝlanju acca gawaran jakce asudiwaworo walyeno.
Shela wurajǝna curui duwon bawanju tia kamuro cinnidǝ,
Tamar dawarinju cǝdi cǝne,
daji leje Yahudaa burwoje jawal Timnayen ci bǝla Yenayimben napkeno.
15 Fǝkkanju jakcǝna nangaro Yahuda tia kirunniya,
jawarro tǝmayeno.
16 Kǝsainjuro nojǝnnidǝ,
jawalnin yesse ise:
«Are boniye!»
«Awi simi,
wu-a ni-a boniyea?»
17 «Niro kǝlawo bǝrinin juwanjǝgǝkki.»
«Kasaddǝkkǝna,
kawu juwasǝgǝmidǝro ran se!»
18 «Awi niro ranno njikki?»
«Su lambanǝm gǝnaadaa jenju tuwada-a koro ka mukkonǝmbe-a se!»
Tiro ce bojane curo ngoyeno.
19 Daji cije fado bawanjuyero walde acca gawaranju cuttuluwe kajǝmunju kamu kwa faccǝgǝnaye luyeno.
20 Yahuda sawanju Hiraa cunode kamudǝro kǝlawoa cǝkkado ran tiro cinadǝa cǝmowo tiro cuwudo cǝne leyenniya,
kamudǝa najǝgǝnni.
21 Am bǝla Yenayimbea cuwore:
«Nda jawar ci jawallen gǝre bǝlayen napcǝnadǝ?»
«Ngaltema na adǝn jawar napcǝnni.»
22 Daji walde Yahudaro ise:
«Tia nagǝkkǝni,
koro am bǝladǝye ngaltema na adǝn jawar napcǝnni yera.»
23 «Kareni nanjuyedǝa rojo,
bare andiro kaasu ngosaganni.
Akko kǝlawodǝa juwagǝkkǝna,
amma ni tia nagǝmmi.»
24 Kǝndawu yakku gai kidǝnniya,
am laa na Yahudayero isane:
«Ngo kǝsainǝm kǝnjǝna cǝde curo ngojǝna!»
«Fadon tuluwowo tia kannun warnowo!»
25 Sa tia taɍiaro cattuluwidǝn,
na kǝsainjuyero kam laa cunode:
«Lene Yakubaro wulgǝne kam kari ani kaanjudǝ tilaman curo ngoyekko.
Curo ngǝlaro asujo,
su lambaa jenju tuwada-a koro ka adǝ-aye kǝmanjudǝa nodo!»
26 Yahuda asuje:
«Ca tia tadani Shelaro kamuro yikki duwon yikkǝnidǝ,
kǝrma wua jiren kosǝna.»
Ngawo adǝyen Yahuda tia niyaje amma tia kamuro curunni.
27 Sa Tamar cambidǝn,
kawuwaro asuyera.
28 Falnja mukko kittuluwunniya,
ngosomadǝ cǝdane garasan kime fit mukkodǝro cikkere:
«Ti adǝma burwon culuwo.»
29 Amma mukkonju kalakce kawuwanjudǝ burwon kiluwo.
Ngosomaye:
«Luworam jiɍi fi kanǝm!»
Daji tadadǝa Feresnin bowoyera.
30 Ngawo adǝyen ti mukkon garasan kime fittadǝ kiluwo.
Tia Jeralan bowoyera,
maananjudǝ luwo kǝngalle.