3 Yakuba Isuwua curo nankiarinjuyen kembo nangaro,

tia tadawanju gadedǝmaa kojǝnaro cǝraye tiro kalwu gari keno.

4 Yeiyawa Isuwuye bawanja tayimaa kojǝnaro tia cǝraanaro asuyeranniya,

ngukcane mana serre njǝddo wayera.

5 Isuwu kǝnnasim cǝde yeiyawanjuro wulyeyenniya,

tia caye baworo ngukkera.

6 Isuwuye:

«Yeiyani,

kǝnnasim dikkǝnadǝa fanowo!

7 Andi dawu kuloyen algama kǝla kǝlaro geriye duwon,

kǝla kakkedǝ cije cǝk dayeno.

Kǝlawa kaandodǝ isane kakkedǝa dirijane kǝljane fuwunjun nguyera.»

8 «A!

Maindero wa waldu manǝmi?

Andia sanodǝmi wa?»

Kǝla kǝnnasimnjudǝ-a mananju adǝ-ayen tia cayemaa kojǝnaro ngukkera.

9 Koro Isuwu kǝnnasim gade cǝde yeiyawanjuro:

«Koro kǝnnasim gade dikkǝna.

Ngo kǝngal-a kumbal-a sillowu mewun tilon-a fuwunin ngujai rukko!»

10 Bawanju-a yeiyawanju-aro wulyeyenniya,

bawanju tiro jǝkkadiye:

«Attǝ kǝnnasim jiɍi fi dim?

A!

Wu-a yanǝm kinda-a awaanawanǝm-a samma isiye niro sujada njǝddiye wa?»

11 Daji yeiyawanju tia nankemin keda,

amma bawanju kǝnnasimdǝa karwunjun kida.

12 Yim laa yeiyawanju karaa Sikembero lǝmanna bawanjaye neworo lejana duwon,

13 Yakubaye:

«Isuwu,

yeiyawanǝm Sikemnin lǝman caneyi.

Are,

nanjaro njunodǝkke!»

«Yo.»

14 «Lene yeiyawanǝm-a lǝmannadǝ-a kǝlewanja salaia,

rui wuro lawar sukkude!»

Ngor Heburonnea kolje Sikembo leyeno.

15 Kadinniya,

kam laa Isuwua curo karaayen fofomji cure:

«Awi manǝmi?»

16 «Yeiyawania makki,

wuro na nansǝni cadidǝa wulsǝgǝne.»

17 «Na adǝa koljana,

tayia kanji Dotannero lejai cani fakkǝna.»

Daji Isuwu yeiyawanjua Dotanno kaduje nayeyeno.

18 Tia kuruwun kerunniyama,

kawu tayia karǝnjidǝro kǝla kǝljane tia ceyesi cǝne,

19 amanjaro:

«Akko kam kǝnnasimma kǝnde cǝdi.

20 Arowo tia yejiye baram ngurworo kolgǝiyeya,

bundi karaaye tia jǝgǝro wulliyo!

Nda awo kǝnnasimnjudǝ waljidǝa ruiye!»

21 Ruben kuranjadǝ mananja adǝa fangenniya,

tia mukkonjan cǝmoye mukko bawanjayero cakki cǝne:

«Kai!

Bare ronju tuluwuwwi!

22 Bare kamcejiro walluwwi!

Na adǝ karaa bowu,

mare?

Bare tiro mukko gǝnagǝwwi,

biya baram adǝro gǝpkǝnowo!»

23-24 Isuwu na yeiyawanjuyero kadinniya,

tia dap cadane kalwunju garidǝa ɍinjane caade tia baramdǝro kolyeyera.

Baramdǝlan ingi bawo.

25 Daji kǝmbo boro napkera.

Masǝna dio cadi duwon kǝla sapkeranniya,

garwawa laa Ismayilawu lardu Galadden cijana kǝnde cadi kero.

Kaɍimowanja kango so,

kaaji sonin lapkada Masarro lejai.

26 Daji Yahuda kǝramiyanjuro:

«Isuwua yejiye kaminnju gǝraniya,

awi riwande?

Ti kannande diye,

bunde tilo.

27 Bare tia leniyende,

arowo Ismayilawuro yikkǝladiyo!»

Daji kasaccane mananjua ngoyera.

28 Garwawa Ismayilawu kojaidǝn,

Isuwua curo baramdǝyen cattuluwe cungu findiro tayiro cakkalade,

daji Masarro tia keado.

29 Sa Isuwua caladidǝn,

Ruben bawo.

Baramdǝro walde kadinniya,

Isuwu bawo.

Karwunju waje kajǝmunju karje

30 kǝramiyanjuyero ise:

«Kannande bawo!

Kǝrma awi dikki?»

31 Daji dal duwajane kalwu gari Isuwuyedǝa curo buyero ngojane

32 kesakkǝnniya,

bawanjaro juwajagane:

«Ngo,

adǝa kiwandiye.

Rui ngǝlaro asune,

kalwu tadanǝmbe ra tadanǝmbe gǝni?»

33 «Fagat,

adǝ kalwu tadaniye.

Assha,

bundi karaaye laa Isuwua njanjakce gigǝro!»

34 Yakuba karwukuttaro kajǝmunju karje,

kalwu lagaranne buwulan caajanaa luje kawu kadaro tadanju nangaro kiro.

35 Tadawanju-a ferowanju-a samma tia tajiduro kadira,

amma tajinja moworo waje:

«Curo lagarannen yirǝkkiaro,

tadania na am bawojanayen nagǝkki.»

Daji soro boyeno.

36 Adǝgai duwon garwawadǝ Isuwua Masarro caade kam laa Fotifar cani kowona Fira'aunaye,

koro kura askǝrranjuyero kekkalado.