Lawar Dinatu-a yanjugǝnawa Simiyon-a Lewi-aye
7
Yim laa Dinatu fero Leha Yakubaro cǝkkambǝnadǝ culuwe ferowa bǝlayea nayeyeno.
2 Sikem tada Hamor mai larduyedǝye tia cure ngoje cade ferojiye bannayeno.
3 Sikem jauro Dinatu fero Yakubayea cǝraye tiro kǝrawonju fǝleyeyeno.
4 Daji na bawanju Hamorrero leje:
«Bawani,
wuro fero adǝa kamuro ngosǝgǝne!»
5 Yakuba Sikem feronju Dinatua bannajǝna fangeno,
amma tadawanju lǝmannanju karaan caneyi nangaro nǝmje waldunja gureyeno.
6 Hamor bawa Sikembe mana njǝddoro Yakubayero leyeno.
7 Tadawa Yakubaye lawardǝa fangeranniyama,
karaan waldane kadira.
Karwujaro ngasaye fum gǝrgayera,
Sikem awo diwi jama Israyilayero cǝdde fero Yakubaye bannajǝnadǝro.
Adǝ awo kasattuwuye gǝni.
8 Hamor tayiro:
«Tadani ferondoa ronju gairo cǝraana,
tia kamuro yowo!
9 Kollowo niyanin andi-a nayi-a kǝldiyo!
Ferowando sadowo,
ferowande ye ngonowo!
10 Curonden na rawuwwalan dǝgaiwo.
Nammowo,
wusǝrndo dewo lǝman gandowo!»
11 Sikem bawa-a kǝramiya ferodǝye-aro:
«Wua kasansuwia,
awo suworuwidǝa nayiro njadǝkki.
12 Wulan sadawu kura manowo,
koro kare feroye ngǝwu suworowo!
Ani ngaa nayiro njadǝkki.
Biya tia kamuro wuro sewo!»
13 Sikem Dinatua ferojǝgǝnadǝro,
tadawa Yakubaye Sikem-a bawanju Hamor-aro nangalan jandejagane:
14 «Rangiye kannande kam kajadǝnniro yiyewawo.
Adǝ andiro nangua!
15 Sai curondon kongwa fi yaye andi gai kajaadaro waljiya duwon kasaddiye.
16 Daji ferowande nayiro njadiye,
andi ye ferowando ngoniye,
curondon dǝgaiye,
andi samma jama fallo walliye.
17 Amma kasadduwe kajaduwwia,
kannande ngoniye saptiye.»
18 Sikem-a bawanju Hamor-a kǝji mananjadǝye fangera.
19 Sikem ferodǝa cǝraana nangaro sadǝman awo wuljanadǝa kido.
Fado bawanjuyen tima tada darajaa wo.
20 Hamor-a Sikem-a ngaworam bǝlayero lejane am bǝlaye sammaro:
21 «Am ani andia nankǝlewan sadana.
Lardunden napca wusǝrnja cado!
Cidindedǝ jauro kura tayi yero.
Ferowanja kamuro ngoniyo,
andi ye ferowande tayiro kamuro yiyo!
22 Amma am ani kasaccane andi-a tayi-a jama fallo walliyewawo,
sai curonden kongwa fi yaye kajaada tayi gairo waljiya duwon.
23 Daji kasaddiyenaa,
lǝmannanja so,
fandinja so samma kaandero waljai,
gǝna?
Kasaddiyo,
curonden dasaa!»
24 Rashiduwa ngaworam bǝlayen captana samma mana Hamor-a Sikem-aye fanjane kongwawa bǝlaye sammaa kajayera.
25 Yimbe yakkua amdǝ tiyi kuttua duwon,
Simiyon-a Lewi-a yaana Dinatuyedǝ kashagar ngojane bǝla tilan hangalsango bawo tǝmadǝnalan ngasaye kongwawa sammaa keyeso.
26 Hamor-a Sikem-a yea ceyese,
Dinatua fado Sikemben ngojane keluwo.
27 Daji kam bǝlanjaye Dinatua ferojǝgǝna nangaro,
tadawa Yakubaye samma isane am sanunaa ɍinjane kareyanja ngojane bǝla sammaa gewo.
28 Dimi so,
kani so,
fe so,
koro so sammaa ngoyera.
Bǝla yen kal,
karaa yen kal,
awowa sammaa ngoyera.
29 Kare fadoye falmaa koljanniro arsiyi-a yalla-a kamuwa-a sammaa ngojane leyera.