Lawar waldu Nawi Yakubaye lardu Kan'anayero
6
Tadawa Labanne:
«Yakuba awo bawande cǝdana sammaa cǝmowona.
Bawandeyen arsiyi ani sammaa kiwando.»
2 Yakuba fangeno.
Koro Laban tiro kure gairo kissǝgǝnniro asuyeno.
3 Daji Kǝmandeye:
«Yakuba,
waldǝne lardu bawanǝmbe-a kaanǝmbe-aro na kǝramiyanǝmbero.
Nia njǝɍiwukki.»
4 Yakuba kam juwajiye Rahila-a Leha-a bowoje,
karaaro na lǝmanna cǝneyiro kadiranniya:
5 «Bawando wuro kure gairo kinsiyiwaworo rukkǝna,
amma Ala bawaniye wua sǝɍiwuna.
6 Nayi nonuwwa bawandoro ngǝnǝptǝgǝkke kida yiddǝkkǝnaro.
7 Ani ngama jirenambu wuro sǝdde gadegade mewuro alwasuni falyeno.
Amma Ala tia kolje wuro kuttu sǝddǝnni.
8 Labanne:
"Lǝmanna korkorra alwasunǝmbo waljai,"
cǝniya,
lǝmanna samma tada korkorra casambi.
Koro "Lǝmanna janejanea alwasunǝmbo waljai,"
cǝniya,
lǝmanna samma tada janejanea casambi.
9 Ngainin Ala bawandoyen lǝmannanju cǝmoye wuro seno.
10 «Sa lǝmanna nanbǝlan cadidǝn,
akko awo curo kǝnnasimben rukkǝnadǝ:
Ngǝlarowa-a dalla-a tayi dimiya-a kaniya-aro nanbǝlan caddidǝ samma bi janejanea,
bi korkorra,
bi bolebolea.
11 Curo kǝnnasim adǝyen malaiya Alayedǝ bowose:
"Yakuba!"
yenniya:
"Naam,"
yekko.
12 Wuro:
"Rui!
Ngǝlarowa-a dalla-a tayi dimiya-a kaniya-aro nanbǝlan caddidǝ samma bi janejanea,
bi korkorra,
bi bolebolea.
Awo Laban njǝddǝna sammaa rukkǝna nangaro,
ngairo walyeno.
13 Wuma Ala niro Baitelnin,
na duwon wuro kau taktuwuram konsǝgǝme koro wadu wuro ngosǝgǝmmadǝn fǝledǝgǝkkǝnadǝ wo.
Kǝrma cine kolle lardu adǝa,
waldǝne lardu tambǝmmaro!"»
14 Rahila-a Leha-aye:
«Na bawandeyen tǝmande warasaye bawo.
15 Andia kusottowa gairo sadane andia salade,
har wuɍidǝmaa juwuna,
gǝna?»
16 «Arsiyi Ala bawandeyen cǝmowona samma andi-a yallande-aye.
Kua awo Ala wulnjǝgǝna sammaa de!»
17 Daji Yakuba cije tadawanju-a kamuwanju-a kǝla kaɍimowayero ngoyeyeno.
18 Lǝmanna-a kareya-a lardu yalayen cuwandǝna sammaa ngoje bawanju Isakuyero walduro jawal lardu Kan'anaye kida.
19 Sa saptanadǝn Laban bawo,
dimiyanjuye kanduɍi gǝrǝptaro lejǝna.
Rahila ye sǝnǝmba bawanjuye ndaljǝna.
20 Daji Yakuba Labanna jambaje tiro leji cǝnni kiyaso.
Karenju falma koljǝnniro kiyaso.
21 Bǝrǝm Yufaratte reje,
jawal kanji Galadde cidi kauwa kura kuraye adinnam bǝrǝm Jordaniye kida.
22 Yimbe yakkua duwon Labanno Yakuba ngǝrǝmjǝnadǝa wulyeyera.
23 Durranju laaa ngoje kawu tulurro tia kadujane curo kauwa cidi Galadden nayeyera.
24 Amma bune adǝ Ala curo kǝnnasimben Labanno fǝlediye:
«Hangal gǝnane,
bare Yakubaro awima yiddǝmmi!»
25 Laban Yakuba leimanju curo kauwadǝyen kokcǝnaa nayeyeno.
Laban-a durranju-a tayi ye leimanja kokkerenniya.
26 Labanne:
«Yakuba,
attǝ awi dim?
Wua jambasǝme ferowania kirra kǝriwuye gai ngonǝme saptǝmidǝ!
27 Awiro gǝradǝme ngǝrǝmgem?
Awiro wua ngainin jambasǝme wuro wulduwuro wayem?
Kango wulsǝgǝmmaa,
kolnjǝkke curo karwukǝji-a bikke gangaa-ayen lenǝmma.
28 Wua kolsǝme ferowani-a diwuwani-a alakǝlewanǝkkǝni.
Jiremaro hangalnambu dimma.
29 Nayiro awo diwi njǝddo rangǝkkǝna,
amma Ala bawanǝmsoye bikka bune wuro:
"Hangal gǝnane,
bare Yakubaro awima yiddǝmmi!"
cǝnna.
30 Jaumaro bawanǝmbero waldu raamma nangaro saptǝmmadǝ,
awima gǝni.
Amma awiro sǝnǝmbanidǝa ndalyem?»
31 «Rinjǝkke,
bare ferowanǝm mowommi nǝkke kiyasǝkko.
32 Amma na kamnde laayen sǝnǝmbanǝm kiwandǝmba,
ti adǝ roa napciwawo.
Fuwu durrandeyen kareni ngaa fǝsanne rui!
Awo kaanǝm kirumba,
ngone!»
Yakuba Rahila tayia ndaljoro nojǝnni.
33 Laban curo leima Yakubaye-a Lehaye-a kirra yindiye-aro ngaye fǝfǝsangeno ngama,
awima cuwandǝnni.
Leima Lehayen kiluwunniya,
Rahilayero kǝrgawo.
34 Rahila sǝnǝmbadǝa ngoje curo sǝrdu kaɍimoyero cakke kǝladǝn napcǝna duwon,
Laban leimaa tǝgǝmbo fǝsangeno,
awima cuwandǝnni.
35 Rahilaye:
«Bawani,
bare gǝrganǝmmi!
Rangǝkke fuwunǝmnin cikkiwawo,
salanambu dikki.»
Cijǝnnidǝ,
mayeno mayeno ngama,
sǝnǝmbanjua cuwandǝnni.
36 Yakuba Labanno gǝragajiye:
«Awi diwi njǝddǝkkoro,
wua ngai ngaro sǝgamidǝ?
37 Kareyani sammaa fǝsannǝmmadǝ,
karenǝm fal yaye fandǝmma wa?
Fuwu durrandeyen tia tuluwe,
andiro shara saddo!
38 «Akko ku kǝrwu findi wu nanǝmnindǝ,
ngaltema dimi bi kani curo fijǝnni.
Ngaltema ngǝlarowa curo lǝmannǝmbeye da ngǝrǝkkǝni.
39 Ngaltema lǝman bundi karaaye cejǝnaa niro njukkudǝkkǝni,
wuma asardǝa kǝlaro ngokko.
Lǝman bune bi kausu ndaljanadǝa wuro tia rǝmbǝkko nǝmi.
40 Kausu kǝmuwu yakkǝna,
bune ye kawu yakkǝna,
koro rangǝkke kǝnǝm kǝji dikkǝnni.
41 «Nanǝmnin kǝrwu findi samma ngai kǝrgakko.
Ferowanǝm yindi nangaro kǝrwu mewu deriro niro kida ngiddǝkko.
Koro kǝrwu arakkuro lǝmanna fandǝkkoro niro kida ngiddǝkko.
Gadegade mewuro alwasuni falyem.
42 Ala kaani Ibrahimbe ti duwon bawani Isaku rijǝnadǝ wua banasǝgǝnnia,
kango wua mukko bowua kolsǝme lekkǝna.
Amma Ala kuttuni-a leiya kǝla kidanǝmben yakkǝna-a curuna.
Bikka bune sharande kamjǝna.»
43 «Kamuwanǝm ani ferowani,
yallanja ye yallani,
koro lǝmanna ani kakke.
Awo rumi ani samma kakke.
Ferowani aniro bi yalla casambǝnaro awi rangǝkke ku yiddǝkki?
44 Kǝrma are,
wu-a ni-a wadu ngoniyo,
kattendero sheda yakkiyo!»
45 Yakuba kau ngoje kokkeno.
46 Durranjuro kauwa capca cǝne kauwa capcane na tilon gǝnayera.
Kǝla kau capkadayen tayi samma masǝna wadu tabbattuwuye gewo.
48 Labanne Yakubaro:
«Kau capkada ani ku tayima shedande wo.
49 Andi faiyadaiye yaye,
Kǝmando kǝlande curo!
50 Ferowani basarnǝme,
bi ferowanin ngawon kamuwa gade ngoyemba,
wunduma nanden bawo yaye,
Ala tima shedande wo!»
51 «Akko kauwa capkada ani,
koro akko kau katte andi yindiyen gǝnakkǝnadǝ.
52 Kauwa capkada ani sheda,
kau gǝnakkǝna adǝ ye sheda,
jawalnǝmnin kauwa capkada ania kammǝkke kokkiwawo,
ni ye kauwa capkada ani-a kau gǝnakkǝna adǝ-a jawalnin niadiwi dioro kammǝme konǝmbawo.
53 Ala kaanǝm Ibrahimbe-a sǝnǝm kaani Nahorre-a sharawu kattendeyero walja!»
Daji Yakuba Ala bawanju Isaku rijǝnadǝyen kansi giwo.
54 Kǝla kau kuruwu napcanadǝyen Kǝmande nangaro lǝman duwaje durranjua bowoje masǝna wadu tabbattuwuye gewo.
Masǝna cade buneyenniya,
kǝla kau kuruwu adǝyen boyera.
55 Laban suwa lǝp cije ferowanju-a diwuwanju-a alakǝlewaje fannjuro wallada.
61 Yakuba ye jawalnju giya.
Malaiyawa tia nayeyera.
62 Yakuba tayia kirunniyama,
kǝwu Alaye cǝne na adǝa Mahanayimnin bowoyeno,
maananjudǝ kǝwu yindi.
63 Daji Yakuba amnju laa lardu Seyir koro Yedom canidǝro na yeiyanju Yesawuyero cunode,
64 tayiro:
«Yeiyaniro ngai wulgǝnowo:
"Kannanǝm Yakubaye:
Labannen napce ngai ngaro dǝgana
65 fe so,
koro so,
dimi so,
kani so,
kir so,
kaɍea so sammaa kiwando.
Kasadde nanǝmnin kǝlewan jǝpcoro,
andia sakkanodǝna."»
66 Amdǝ na Yakubayero waldane:
«Yeiyanǝm Yesawuyero leniyena.
Kaptuwunǝmbo kǝnde cǝdi,
ti-a am yer dewu-a.»
67 Yakubaye karwunju kamde jauro riyeno.
Am tia jagai-a dimiya-a kaniya-a feya-a kaɍimowa-aa ci yindiro yakce,
68 kǝlanjuro:
«Yesawu kǝwu faldǝro kikkuroa,
faldǝ ye rakce ngǝrǝmji.»
69 Daji Yakubaye:
«Kǝmande Ala bawani Isakuye-a kaani Ibrahimbe-a,
wuro:
"Waldǝne lardunǝm-a amnǝm-aro,
awo ngǝla njǝddǝkki!"
nǝmma.
70 Kǝmande,
ser ngǝwu wuro sǝddǝmma-a aman kura wuro simma-a fandoro tikkǝni.
Sa bǝrǝm Jordaniye fallǝkkǝnadǝ,
ka gǝnia,
awima takkǝni.
Kǝrma akko kǝwu yindia kadikko.
71 Nia lowonjǝkkǝna,
wua mukko yeiyani Yesawuyen sǝmoye!
Ise wu-a kamuwani-a yallani-a andi sammaa seyesiro rikkǝna.
72 Wuro:
"Fagat,
niro awo ngǝla njǝddǝkki.
Nanngǝwu kaduwuwanǝmbe sim cidi kesaye gairo komdumaro yojiwaworo dikki,"
nǝmma.»
73 Buneyenniya,
na adǝn napce wadu gureyeno.
Yesawuro njoro curo lǝmannanjuyen laaa karje:
74 kani yer yindi-a dal findi-a,
dimi yer yindi-a ngǝlaro findi-a,
75 kaɍimo kiamba fiakku-a tadawanja-a,
fe fidewu-a dalo mewu-a,
koro bi mewu-a karwudi findi-a.
76 Lǝmannadǝa kǝwu kǝwuro yakce wolodiyanjuro ce:
«Fuwuniro konowo,
katte kǝwu kǝwu fi yayen na kollowo!»
77 Daji wolodi fuwuyero:
«Sa yeiyani Yesawu nia kamnjiye niro:
"Ni wunduye?
Ndara lenǝmi?
Lǝmanna ani wunduye?"
cǝniya,
78 tiro:
"Kannanǝm Yakubaye.
Tima niro juwanjuwo.
Ngawon kǝnde cǝdi,"
wulle!»
79 Wolodi yindiye-a yakkuye-a am ngawo lǝmannaye jagai samma-aro awo kam burwoyedǝro wuljǝgǝnadǝ gai wuljiye:
«Yesawua nawuwiya,
ngai tiro wulgǝwi,
80 koro tiro:
"Kannanǝm Yakuba ngawon kǝnde cǝdi,"
wulgǝnowo!»
Tiye karwunjun:
«Awowa tiro juwagǝkkǝnadǝn karwunju isasamgǝgǝkke nanjuro lekkiya,
waneye kolse kǝlewan nammǝkki.»
81 Lǝmanna kǝwu kǝwuro fuwunjuro koyera,
ti nadǝn waduro napkeno.
82-83 Bune adǝma cije cakke kamuwanju yindi-a kirranja yindi-a tadawanju mewun tilon-a kǝndanju sammaa ngojane bǝrǝm Yabbukaa rejane koyera.
84 Runju napkenniya,
kam laa-a ti-a fajarro kambǝɍi kedo.
85 Yakubaa yapciwaworo kirunniya,
tandoram silla canjayen leje tia loruyeno.
Silla canja Yakubaye kiluwo,
sa kambǝɍi cadidǝn.
86 Kamdǝye Yakubaro:
«Kolsǝne lekke,
dunia wadu cǝdi.»
«Wuro barga dǝmsǝgǝmmia,
nia kolnjǝkke lenǝmbawo!»
87 «To,
wundu cunǝm?»
«Yakuba.»
88 «Kua adǝ fuwun nia Yakuba maananju jambaman bowonjaiwawo,
amma Israyila maananju Alaa mǝlduman bowonjai.
Dalilnjudǝ Ala-a am-a mǝllǝme nasardǝmma!»
89 «Cunǝm wulsǝgǝne!»
«Awiro cuni korǝmi?»
Daji tiro nadǝn barga dǝpkeyeno.
90 Yakuba ti fǝkka Alaye curunama,
nunni cǝne nadǝa Feniyelnin bowoyeno,
maananjudǝ fǝkka Alaye.
91 Kǝngal luwo cǝdi duwon,
bǝrǝm Feniyel canidǝa reje koyeno.
92 Canjanju nangaro dǝgǝnji.
Kun kundenno Israyilawu da canjaro tangaadadǝa jagariwawo,
Ala Yakubaye na adǝa lejǝna nangaro.
101 Yakuba kǝla sapkenniya,
akko Yesawu-a amnju yer dewu-a kǝnde cadi kiro.
Yallanjua Leha-a Rahila-a kirranja yindi-aro dagaryeyeno.
102 Kirra yindi yallanjaa fuwun,
Leha yallanjua dawun,
Rahila-a Isuwu-a ngawodajin.
103 Ti kǝlanju fuwuro koje tulurro ngǝlaro nguji ciji ngai duwon,
har na yeiyanjuyero leyeno.
104 Daji Yesawu ngǝrǝmje Yakubaa kapciye daunjuro kamdiye tiro lewa nankambe kiddo.
Tayi yindi samma kesiro.
105 Daji Yesawu kǝla sapce kamuwa-a yalla-a kirunniya:
«Ani wundusoa kudǝm?»
«Yalla Ala sermani wuro sinamadǝ.»
106 Kirradǝ-a yallanja-a isane fuwunjun ngǝlaro nguyera.
107 Leha-a yallanju-a fuwujane tayi ye nguyera.
Daji Isuwu-a Rahila-a ye fuwujane nguyera.
108 Yesawu Yakubaro:
«Kannani,
kǝwu lǝmannaye-a tadiyena anilan awi dio tǝmanǝm?»
«Kasattunǝm raakko!»
109 «Kannani,
wu curo larasuyen.
Awo kaanǝm sammaa rone!»
110 «Ǝn!
Ǝn!
Marne,
kasansǝmmaa,
awo njikkǝnadǝa ngone.
Fǝkkanǝm rukkiya,
fǝkka Alaye rukko gai,
111 koro wua kasansǝme kamsǝgǝmma adǝ,
awo njikkǝna adǝa marne kasadde!
Ala kǝrawonju ngǝwu fǝlesiye,
awi yaye takkǝna.»
Daji tia jǝkciye kasatkeno.
112 Yesawuye:
«Leniyo jawallo ngayiyo,
wu fuwunǝmbo kokki.»
113 «Nonǝmma yallaye dunonja gana,
koro dimiya-a feya-a cakkambidǝa ɍiwukki.
Yim fallo doidoiro leyeiyea,
lǝmanna samma sanui.
114 Fuwuniro kone,
wu yila yilayen ledu yallaye-a lǝmannaye-a gakke,
har nanǝmbo lardu Seyirrero lekki.»
115 «Adǝ yaye am ngawoniye laanja niro kolduwu raakko,
kallo lenoworo.»
«Awiro faidaa wo?
Wua kasattunǝm bas raakko!»
116 Yim adǝma Yesawu jawal Seyirre kida.
117 Yakuba ye cidi Sokkottero leje fannju cǝdande ngǝrwo lǝmannanjuye kido.
Adǝ nangaro na adǝa Sokkotnin bowoyeno,
maananjudǝ ngǝrwodi.