Lawar naptu Nawi Yakubaye lardu yalayen
5
Yakuba kǝndawu fallo Labannen napkenniya, 15 Labanne:
«Ni durni nangaro kida bowu fatto wuro sǝddǝmi wa?
Awi njǝddǝkki raam?»
16 Labanne ferowanju yindi.
Kuradǝye cunju Leha,
ganadǝye Rahila.
17 Leha shawa gǝni,
amma Rahila jauro shawa.
18 Yakuba Rahilaa cǝraanadǝ,
Labanno:
«Bawa,
niro kida kǝrwu tulurro njǝddǝkki,
feronǝm gana Rahila kamuro ngokkoro.»
19 «Kam gademaro yikkidǝa,
niro njikkǝna ngalwo.
Namme fannin!»
20 Yakuba Rahila nangaro kǝrwu tulurro kida kido.
Tia jauro cǝraana nangaro,
kǝrwu tulur ani kawu tulur gairo curui.
21 Daji Yakuba Labanno:
«Kidani cerǝnadǝ,
tǝmajini se,
larusa dio makki.»
22 Laban am bǝlayea doje larusa kedo.
23-24 Kǝngal kikkurunniya,
Laban feronju Leharo kirnju laa Jilfatu canidǝa kǝljiye Yakubayero cade,
ti-a Leha-a boyera.
25 Wajǝna suwa Yakuba kamunjua kirunniya,
ashe Leha!
Daji Labanniro leje:
«Attǝ awi wuro sǝddǝm?
Rahila nangaro gǝni wa kida ngiddǝkko?
Awiro jambasem?»
26 «Ada lardundeye gǝni yeiya larusa cǝdǝnni duwon kannaye diodǝ.
27 Mawu larusaye ti adǝyea yere duwon,
koro kasaddǝme kida kǝrwu tulurro sǝddǝmia,
niro kannadǝa njikki.»
28-29 Yakuba kasacce Lehaye mawunju larusayedǝa kido.
Laban feronju ganadǝa ngoje tiro kirnju laa Bilhatu canidǝa kǝljiye Rahilaa Yakubaro kamuro keno.
30 Yakuba-a Rahila-a ye bojane,
Lehamaa kojǝnaro tia kirawo.
Kida kǝrwu tulurro koro Labanno kiddo.
31 Kǝmande Yakuba Lehaa cǝraanniro kirunniya,
tia kǝnjambimaro cǝde,
Rahilaa cambiwaworo kido.
32 Leha curo ngoje tada cambe:
«Kǝmande kuttuni curuna adǝ,
kǝrma kwani wua sǝrayi,»
daji tadanjuro cu Ruben kekko.
33 Koro curo ngoje tada cambe:
«Ala wu waadaro fanjǝnadǝ,
ti adǝ yea saino,»
daji tiro cu Simiyon kekko.
34 Koro curo ngoje tada gade kembǝnniya:
«Kǝrma adǝ kwani wuro tudiyi,
tiro tada yakku yikkambǝkkǝna adǝ.»
Adǝ nangaro tadadǝro cu Lewi kekko.
35 Curo gade ngoje tada cambe:
«Kua Kǝmandea yungorǝkki.»
Adǝ nangaro tiro cu Yahuda kekko.
Daji njambo kolyeno.
41 Rahila ti Yakubaro tada cǝkkambiwaworo kirunniya,
yeiyanjua nankemin cǝdane kwanjuro:
«Tadawa se,
adǝ gǝnia,
nukki.»
42 Yakuba tiro gǝrgajiye:
«Ha!
Wu Ala niro curo ngodu damnjǝgǝnadǝ wa?»
43 «Akko kirni Bilhatu,
ti-a bone wuro tada sǝkkambo,
tiramnin wu ye tadawa fandǝkko!»
Daji
44 kirnju Bilhatua kamuro keno.
Yakuba-a Bilhatu-a bojane,
45 Bilhatu curo ngoje tada kembo.
46 Rahilaye:
«Na Alayen dallǝkkǝna!
Soni fanje tada sina.»
Adǝ nangaro tadadǝro cu Dan kekko.
47 Bilhatu curo koro ngoje tada yindiye Yakubaro kikkambo.
48 Rahilaye:
«Yeiyania mǝllǝkke kǝnnasar fandǝkkǝna!»
Daji tadadǝro cu Naptali kekko.
49 Leha njambo koljǝnaro kirunniya,
kirnju Jilfatua Yakubaro kamuro keno.
50 Jilfatu Yakubaro tada kikkambo.
51 Lehaye:
«Sa kura isǝna!»
Daji tadadǝro cu Gad kekko.
52 Jilfatu tada yindiye Yakubaro kikkambǝnniya,
53 Lehaye:
«Wai!
Karwuni kǝji,
ferowa wua karwu kǝjimaro galasai!»
Daji tadadǝro cu Asher kekko.
54 Yim laa sa kala algamayen Ruben karaaro leje tadawa kǝska laa kǝnjambi cakki canidǝyea cuwande,
yanju Leharo kikkudo.
Daji Rahilaye:
«Leha,
tadawa kǝskaye tadanǝm cuwandǝnadǝn gana se!»
55 «Kwani mowommadǝma njǝdǝnni wa,
koro tadawa kǝskaye tadani sukkudǝnadǝa mowomi?»
«Tadawa kǝskaye ania simia,
ku adǝ Yakuba nanǝmnin boji.»
56 Kajiri kwanja karaan kadinniya,
Leha culuwe tia kapciye:
«Ku nanin bonǝmi,
ni-a tadawa kǝskaye tadani sukkudǝna-a falnjakkǝna nangaro.»
Bune adǝ ti-a Leha-a boyera.
57 Daji Ala so Lehaye fanje,
Leha curo ngoje tada uwuye Yakubaro kikkambo.
58 Lehaye:
«Kirni kamuro kwaniro yikkǝna nangaro,
Ala alwasuni sina.»
Daji tadadǝro cu Issakar kekko.
59 Koro Leha curo ngoje tada arakkuye Yakubaro kikkambǝnniya:
60 «Ala awo ngǝla sina!
Kǝrma adǝ kwani wuro daraja si,
tiro tada arakkuye yikkambǝkkǝnadǝro.»
Daji tadadǝro cu Jebulon kekko.
61 Ngawo adǝyen fero cambe Dinatulan bowoyeno.
62 Daji Ala Rahilaa njunoje sonju fanje tia cambiro kido.
63 Curo ngoje tada cambe:
«Ala nangun suttuluwi!»
64 Tadaro cu Isuwu cakke:
«Kǝmande tada gade sǝrga!»
65 Rahila Isuwua kembǝnniya,
Yakuba Labanno:
«Kolle larduniro waldǝkki.
66 Kamuwani-a yallani-a tayi nangaro nanǝmnin kidanǝkkǝnadǝa wuro kolsǝgǝne kallo leniyo!
Nonǝmma kida niro njǝddǝkkǝna ngaa.»
67 «Marne,
kasadde namme!
Curo kuroni bokabokayen,
Kǝmando ni nangaro wuro barga dǝmsǝgǝnadǝa rukkǝna.
68 Wuro alwasunǝm wulsǝgǝne,
niro njikki.»
69 «Nima jiɍi kida niro njǝddǝkkǝnaa nonǝmma,
wuramnin jiɍi lǝmannanǝm waljanaa rumma.
Lǝmannanǝm gana burwoyedǝ ku jauro ngǝwujana.
70 Tǝn nanǝmnin kida ngǝssǝkkǝnaman,
Kǝmande niro barga dǝmnjǝgǝna.
Kǝrma sawi awo laa ammiro yiddǝkki?»
71 «Awi niro njikki?»
«Awima simbawo.
Awo wulnjǝgǝkkidǝa kasaddǝmmaa,
nammǝkke lǝmannanǝm negǝkki.
72 Kolsǝne ku curo lǝmannanǝmbe sammaa gakke,
dimi yen kal,
kani yen kal,
korkorra bi bolebolea,
koro tama cǝlǝm fi yayea karnǝkke sǝgǝriro tuluwukki.
73 Ani tayima alwasuni wo.
Baɍi alwasuni kuroro isǝmiya,
curotiloni nonǝmi.
Curo kakkeyen kani duwon korkorra bi bolebolea gǝni,
koro tama duwon cǝlǝm gǝni mennaa,
wu nambarwu njǝddǝkkǝna.»
74 «Kasaddǝkkǝna,
wullǝmmadǝ gairo waljo!»
75 Amma yimdǝma Laban Yakubaa jambaje,
burwoje lǝmanna korkorra bi bolebolea dalnin kal kanin kal,
dimi cǝlǝm samma-a runjaro karyeno.
76 Tayia mukko tadawanjuyero cakke,
na ledu kawu yakkua Yakubayenno juwayeyeno.
77 Yakuba lǝmanna Labanne gapcǝnaa kinewo.
Dǝlam kǝɍi kǝskawa laaye ngoje,
ngawasinjaye na laa laa cuttuluwe na bul bul turuiro kido.
78 Dǝlam janejanea curo dǝɍyi lǝman njattoramben na lǝmanna caruilan laskeyeno.
Isane ingi kesanniya,
79 fuwu dǝlam aniyen kaniya-a dalla-a fafardane,
kaniya tadawa janejanea bi korkorra bi bolebolea kesambo.
80 Yakuba dimiyaa runjaro karje cakke kanji kaniso cǝlǝm-a cǝlǝmcǝlǝm janejanea-a curo lǝmanna Labannea kero,
tadawa cǝlǝm casamboro.
Ngainin lǝmanna kaanju cuwande,
koro Labannero kǝlduwu dapkeno.
81 Lǝmanna dunoaye sanja nanbǝlanne cǝdiya,
Yakuba dǝlam janejanea na caruinin curo dǝɍyidǝyen lassiyi,
fuwu dǝlamdǝyen fafardaro.
82 Amma lǝmanna faida bawoye sanja nanbǝlanne cǝdiya,
lassiyiwawo.
Adǝgainin lǝmanna faida bawo samma Labanne,
dunoa samma Yakubaye.
83 Ngainin Yakuba jaumaro arsiyimaro walyeno.
Dimi so,
kani so,
kaɍimo so,
koro so,
kaɍea so,
kir so ngǝwu kiwando.