Lawar bǝlawuro Nawi Yakubaye lardu yalayero
4
41 Yesawu Yakubaro duwun kiddo kǝla bawanju tiro barga dǝpcǝgǝnayen.
Karwunjun:
«Kawu bawaniye njero cǝdi.
Nuiyama,
Yakubaa roro yejǝkki.»
42 Awo Yesawu niajǝnadǝa Rabekaro wulyeyera.
Daji Yakubaa bowoje:
«Yeiyanǝm ngayenju ngodaro nia njejoro manji.
43 Kǝrma tadani,
wua kǝrǝnsǝne.
Cine kase lene bǝla Harrannero na yanigǝna Labannero.
44 Nanjun namme duwon har yeiyanǝm fasso.
45 Karwunju fasse awo tiro yiddǝmmaa ngessiya,
kam nodǝkke manjai.
Na adǝn nammǝme Yesawu nia ngejoa,
tiye ye ronju cattuluwi.
Nayi yindi sammaa yim falnin njuwatko raakkǝni.»
46 Rabeka na Isakuyero leje :
«Kamuwa Hittiwu Yesawuye nangaro dunian naptudǝmaa raakkǝni.
Yakuba ye fero lardu adǝye tayi gai ngoyenoa,
awi naptu duniaye kǝjinju wo?»
51 Isaku Yakubaa bowoje alakǝlewaje:
«Bare kamuro fero lardu Kan'anaye ngonǝmmi!
52 Cine lardu yalayero na kaanǝm Betuwellero lene,
na todǝn kamuro ferowa rawanǝm Labanne falnja ngone!
53 Ala Martawama nia barganjo!
Yalla kada njo!
Kaduwuwanǝm ye ngǝwuja,
kǝwu jama ngǝwuyero walja!
54 Ni-a kaduwuwanǝm-aro barga jiɍi Ibrahimbo dǝpcǝgǝnadǝ gai dǝmnjaa!
Lardu Ala Ibrahimbo ci cǝnna,
lardu na nankusotto dimi adǝa kaanǝmbo cǝdo!»
55 Ngainin Isaku Yakubaa cakke lardu yalayero na rawanju Labannero leyeno.
56 Yesawu lawar Isaku Yakubaa alakǝlewaje tiro bare fero lardu Kan'anayen kamuro ngojǝnni cǝne tia lardu yalayero fero ngodaro cunodǝnadǝa fanjǝna.
57 Koro ti ye bawanju-a yanju-aye mana fanje lejǝnaro nojǝna.
58 Ngainin Yesawu bawanju ferowa lardu Kan'anayea cǝraanniro asuyeno.
59 Daji na bawanju kura Ismayila tada Ibrahimbero kamu gade maduro leyeno.
Mahalatu fero Ismayilayea kamuro ngoyeno.
60 Yakuba cije Bir-Shebaa kolje jawal bǝla Harranne lardu yalayero lejidǝa kida.
61 Leji duwon,
na kǝngal cukkurunalan jǝpkeno.
Nadǝn kau birro ngoje kǝlanju gǝnajiye kǝnǝmbo boyenniya,
62 kǝnnasim kido.
Akko kǝmbaram cidin kokkada har samero lejǝna tiyen malaiyawa taccai jǝpcai kiro.
63 Daji Kǝmande fuwu Yakubayen daje:
«Wuma Kǝmando,
Ala bawanǝm Isakuye-a kaanǝm Ibrahimbe-a wo.
Cidi bonǝmmadǝa ni-a kaduwuwanǝm-aro njadǝkki.
64 Nanngǝwu kaduwuwanǝmbe sim cidi kesaye gairo waljane,
fǝde-a adinnam-a yala-a anǝm-a sammaro tatardagane napcai.
Ni-a kaduwuwanǝm-aramnin am jiɍiya dunia sammaye barga cawandi.
65 Wu-a ni-a rokko,
na lenǝmi samman nia njǝɍiwukki,
koro nia cidi adǝro kalannjǝgǝkki.
Kolnjǝkkiwawo,
awo wulnjǝgǝkkǝna sammaa dikki,
diye!»
66 Yakuba kǝnǝmnin fayenniya:
«Ase,
Kǝmande na adǝn duwon,
wu nokkǝnidǝ!»
67 Daji rije:
«Wai!
Na adǝ riduramba,
Fado Alayema diye,
koro ngaworam sameye!»
68 Suwa lǝp cije kau kǝlanju gǝnajiye bojǝnadǝa ngoje kokce kǝladǝro kǝndawu jaitunne fijiye kau Alaa taktuwurambo kido.
69 Nadǝa Baitelnin bowoyeno,
maananju Fado Alaye.
70 Yakuba Kǝmandero wadu ngojiye:
«Ala,
ni-a wu-a rokkoa,
koro curo bǝlawuro dikki adǝyen wua sǝɍiwume,
kǝmbo-a kajǝmu-a sime
71 kǝlewa salainin bawaniyero waldǝkkia,
daji Kǝmande,
ni Alaniro wallǝmi.
72 Na kau taganasso kongǝkkǝnadǝa na niro ambǝttuwuyero dikki,
koro niro awo simi samman curo mewuyen fal sadaaro njikki.»
81 Yakuba jawallo ngaye lardu yalayero leji duwon,
82 yim laa baram curo karaayen kiro.
Baramdǝ lǝmanna njattoye nangaro,
karǝnnjun kǝwu yakku dimi-a kani-aye bowada.
Kau kura laa ci baramdǝyea jakcǝna.
83 Lǝmanna samma captaiya duwon,
sǝniyanja kallo kaudǝa tǝmbaljane lǝmannanja casatte kalakcane jakcagai.
84 Yakuba sǝniyaa cuwore:
«Sawawani,
nayi am ndaraye?»
«Andi Harranne.»
85 «Laban diwu Nahorrea nonuwwa wa?»
«Noniyena.»
86 «Nganju wa?»
«Nganju salai.
Akko feronju Rahila dimiyanjua kǝnde cǝdi.»
87 «Dunia kausu cir adǝ,
sa lǝmanna captuye gǝni.
Tayia yattowo,
neworo yadowo!»
88 «Lǝmanna samma captannia,
rangiye diyewawo.
Sa adǝn duwon kau baram jakturam tǝmballiye lǝmanna yattiye.»
89 Yakuba-a tayi-a jandejai duwon,
Rahila dimiya bawanjuyea kadio.
Ti ye sǝni.
90 Yakuba ti-a dimiya rawanju Labanne-a kirunniya,
barambo ise ti runjuma kaudǝa tǝmbalje lǝmanna rawanjuye ketto.
91 Rahilaa ngǝlaro lewaje koro karwukǝjiro cire:
92 «Wu dur bawanǝmbe,
koro tada yanǝm gana Rabekaye.»
Rahila ngǝrǝmje bawanjuro lawar kiado.
93 Laban lawar kǝnde Yakuba tada kannanjuye fangenniyama,
wup cije cǝgase najiye tiro kamdiye lewaje fannjuro kiwudo.
Yakuba tiro awo tia cuwudǝna sammaa wulyenniya,
94 Labanne:
«Yakuba,
ni jiremaro durni karǝnne.»