Lawar Nawi Isakuye tadawanjuro barga dǝptuwuye
3
Isaku kiarije sam curuiwaworo walyenniya,
Yesawu tadanju karuyea bowoje:
«Tadani!»
«Naam?»
2 «Wu kiari,
yim nukki nokkǝni.
3 Kǝrmaro kabbinǝm-a jowunǝm-a ngone,
karaaro lene wuro lǝman karaaye masǝgǝne.
4 Kǝmbo kǝji con jiɍi raakkǝnadǝ gai dene wuro sukkude.
Bukkiya,
niro barga dǝmnjǝgǝkki,
kawu nukkiro.»
5 Sa Isaku tadanju karuyero jandejiyidǝ,
Rabeka tayia kǝrǝnjǝna.
Yesawu karaaro lǝman madaro leyenniyama,
6 Rabeka cije na Yakubayero leje:
«Akko awo bawanǝm yeiyanǝmbo wuljiyi fakkǝnadǝ:
7 "Lǝman karaaye sukkude,
wuro kǝmbo kǝji con desǝgǝne.
Bukkiya,
niro fuwu Kǝmandeyen barga dǝmnjǝgǝkki,
kawu nukkiro,"
yeno.
8 Kǝrma tadani,
ngǝlaro fansǝne,
9 cine lene bǝrin kǝlawo ngǝla yindi wuro sukkude.
Bawanǝmbo kǝmbo kǝji con jiɍi cǝraanadǝ gai dekkiya,
10 ngone tiro yikkade,
niro barga dǝmnjuwo,
kawu nuiro.»
11 «Yesawudǝ kanduɍiami,
wu ye kanduɍi bawoa.
12 Bawani wua samsenoa,
nda?
Wua jambamaro ngose,
barga dǝptuwudǝro bargani ngoji.»
13 «Tadani,
barganambudǝ wua suwando!
Manani fane,
lene sukkude!»
14 Yakuba leje ngoje yanjuro cukkude,
Rabeka kǝmbo kǝji con Isaku cǝraanaa deyeno.
15 Kajǝmu Yesawuye ngǝla ngǝla nanjun gǝnaadaa ngoje Yakubaro luyeyeno.
16 Koro karawi kǝlawowadǝye ngoje mukkonju-a daunjuye na kanduɍi bawo-a sammaa jakkeno.
17 Daji kǝmbo kǝji con-a burodi-a dejǝnadǝa mukko tadanjuyero kekko.
18 Yakuba Isakuyero ngaye:
«Bawa?»
«Naam tadani.
Ni wundu?»
19 «Wuma Yesawu,
tadanǝm karuye.
Awo suworǝmmaa dikkǝna.
Cine namme,
da lǝmanniye ngǝre.
Yerǝmiya,
wuro barga dǝmsǝgǝne!»
20 «Ndayilan lǝman adǝa duwaduwan kiwandǝm?»
«Kǝmande Ala tia fuwuniro kiwudo.»
21 «Tadani,
are nia samnjǝkke!
Jiremaro nima tadani Yesawu,
ra kam gade?»
Daji ise tia samgeno.
22 Samgenniya,
Isakuye:
«Kowodǝ Yakubaye,
amma mukkodǝ Yesawuye.»
23 Yakubaa asujǝnni mukkonju kanduɍia jiɍi Yesawuyedǝ gai nangaro,
tiro barga dǝptuwu badiyeno.
24 Isakuye:
«Nima jiremaro tadani Yesawu wo?»
«Aaa,
wuma,
diye!»
25 «Tadani,
kǝmbodǝa fisǝgǝne da lǝmannǝmbe ngǝrǝkke,
niro barga dǝmnjǝgǝkki.»
Yakuba tiro ce giwo.
Diben ye cukkude kia.
26 Daji Isakuye:
«Are karǝnsǝne,
lewa kǝrawoye sǝdde!»
27 Daji tia karǝnje lewayeno.
Isaku kala kajǝmuwa Yakuba cakkǝnaye fangenniya,
tiro barga dǝpciye:
«Kala tadaniye jiɍi kala kulo Kǝmande barga dǝpcǝgǝnaye gai.
28 Ala niro cidi bargaa kǝlanjuro kǝlangu sameyen jǝpciyi njo!
Niro algama so,
diben so ngǝwu njo!
29 Ala jama gadegade kada fuwunǝmnin tungurumja nia njaa!
Ala yanǝmgǝnaso ye fuwunǝmnin tungurumja,
nia nja!
Kam nia baskunjǝnaa Ala baskujo,
kam niro barga dǝmnjǝgǝnaro Ala barga dǝpcuwo!»
30 Isaku Yakubaro barga dǝpciye cere nanjun culuwuna kaldǝn,
Yesawu kadio.
31 Ti ye kǝmbo kǝji con deje Isakuro cukkude:
«Bawa,
cine da lǝmanniye ngǝre.
Yerǝmiya,
wuro barga dǝmsǝgǝne!»
32 «Ni wundu?»
«Wuma Yesawu tadanǝm karuye wo.»
33 Isaku dama baworo loloje:
«To,
wundu kam wuro lǝman karaaye ceje sukkudǝnadǝ?
Kawu isǝmiro kǝmbonju bukke tiro barga dǝpkǝgǝkkǝna.
Fagat,
bargaaro walji.»
34 Yesawu mana Isakuye fangenniya,
karwunju kuttaje yilje:
«Bawa,
wu yero barga dǝmsǝgǝne!»
35 «Kannanǝm ise wua jambase,
barga niro njikkidǝa ti cuwandǝna.»
36 «Maana Yakubayedǝ jiremaro jambama,
gǝna?
Wua yindiro jambaseno.
Warasani nankaruye cǝmowonaye ngawon,
barga wuro dǝmsǝgǝmidǝ yea kiwando.
Bawa,
barga gǝnasǝgǝmma gade bawo wa?»
37 «Tia kuranǝmbo dikkǝna,
yanjugǝnaso sammaa wolodiyanjuro dikkǝna.
Algama-a diben-a tiro yikkǝna.
Awi kua niro rangǝkke njǝddǝkki,
tadani?»
38 «Barga dǝptuwuye falma wa tam,
bawani?
Wu yero barga dǝmsǝgǝne!»
39 Daji so ngǝskeno.
Daji Isakuye:
«Cidi bargaa kǝlanjuro kǝlangu jǝpciyidǝa kuruwunǝme dǝgami.
40 Barga kashagarnǝmben ambadǝmi.
Koro kannanǝm nia njunodi.
Amma sa gǝrganǝmiya,
nankam kǝlaye fandǝmi.»