Lawar Nawi Isakuro barga dǝptuwuye
2
Curo lardudǝyen kǝna jiɍi burwoye jaman Ibrahimben tǝdǝnadǝ gai kadio.
Isaku bǝla Gǝrarrero na Abimalak mai Filisitiwuyero leyeno.
2 Caman Kǝmande tiro fǝlediye:
«Bare Masarro lenǝmmi,
lardu wulnjǝgǝkkidǝn namme!
3 Nadǝn dǝgai,
nia kolnjǝkkiwawo,
niro barga dǝmnjǝgǝkki.
4 Kaduwuwanǝmbe nanngǝwunja sillowu gairo dikke,
tayiro cidi ani ngaa yikki.
Adǝgaima awo bawanǝm Ibrahimbo kansiro yibbukkǝnadǝa dikki.
Am jiɍiya dunia sammaye kaduwunǝmbo barga dǝpkǝgǝkkǝnadǝ gai tayi yero barga dǝpkǝgǝkkoro wua sawori.
5 Ani samma wakkaji,
Ibrahim manani fanje awowa tiro wulgǝkkǝna wowom so,
wada so,
kǝrmai so sammaa jǝganadǝro.»
6 Isaku bǝla Gǝrarren napkeno.
7 Am nadǝye tia kǝla Rabekayen keworǝnniya,
tayiro tia kannanju yeno.
Rabeka jauro kuroro shawa nangadǝro,
tia kamunju wulduro riyeno,
bare kǝlanjun tia ceyesǝnniro.
8 Isaku bǝla adǝn tussǝna duwon,
yim laa Abimalak mai Filisitiwuye tagayen kǝla kittuluwunniya,
Isaku-a Rabeka-a kǝlangajai kiro.
9 Isakua bowoje:
«Ase,
Rabeka kamunǝm!
Awiro tia kannanǝm yem?»
«Bare tiramnin roni fuddǝkkǝni nangaro!»
10 «Attǝ awi andiro saddǝm?
Curo jamaniyen kam laa kamunǝm-a boyeraa,
kango andiro danau gǝnasagamma!»
11 Daji jamanju ngaro wada ce:
«Kam duwon kam adǝ-a kamunju-a lejǝnadǝ ronju shekku baworo fucci.»
12 Sa adǝ Isaku lardudǝn algama cǝnadǝnadǝye kawak mia kalayeno.
Kǝmande tiro barga dǝpciye,
13 kǝndanju dama baworo ngǝwuje jaumaro arsiyimaro walyeno.
14 Dimi so,
kani so,
fe so,
wolodi kada soaro walyeno.
Filisitiwu tia kemiro cadane
15 baramba sa bawanju Ibrahim ronjualan wolodiyanju lajana sammaa canade cidin kesǝmbǝɍo.
16 Daji Abimalakke:
«Isaku,
marne,
andin kuruwunno lene,
andia dunon kosamma!»
17 Isaku nadǝn cije leje ngor bǝla Gǝrarren leimawanju kokce napkeno.
18 Baramba jaman bawanju Ibrahimben lajana duwon ti bawojǝna ngawon Filisitiwu canadǝnadǝa caye baworo layeno.
Baramba sammaa cunja bawanju tayiro cinalan bowoyeno.
19 Yim laa wolodiyanju baram ngornin lajai duwon,
ingi runju culuwi nayeyera.
20 Sǝniya Gǝrarre sǝniya Isakuyea lawalaro cadane:
«Ingi adǝ kaanja!»
yera.
Isaku baram adǝa Kambiwunin bowoyeno,
kǝlanjun kambiwu tǝdǝna nangaro.
21 Wolodiyanju baram gade layeranniya,
kǝlanjun koro kambiwuyera.
Baram adǝa Duwunnin bowoyeno.
22 Na adǝa kolje gǝna kuruwuje,
baram gade layeno.
Ti adǝye kǝlan kambiwu tǝdǝnni.
Isakuye:
«Kǝrma Kǝmande andia na farakko sattuluwuna,
curo lardu adǝyen ngǝwuniyoro!»
Daji baram adǝa Na Faraknin bowoyeno.
23 Na adǝn cije Bir-Shebaro leyeno.
24 Bune adǝ Kǝmande tiro fǝlediye:
«Wu Ala bawanǝm Ibrahimbe,
bare awima rinǝmmi,
nia kolnjǝkkiwawo.
Niro barga dǝmnjǝgǝkke kaduwuwanǝm isangǝwugǝkki,
bawanǝm Ibrahim nangaro.»
25 Daji Isaku kau capce na laya duwaduram cǝdande jama capce Kǝmandedǝma Ala wo cǝne ambǝtkeyera.
Nadǝn leimanjuso tuyeno,
wolodiyanju ye baram layera.
26 Abimalak-a amanmanju-a kajallanju kǝriwuye-a Gǝrarnin cijane na Isakuyero kadira.
27 Isakuye:
«Awiro naniro kaduw?
Wua nandon wasuwe gǝna dusew?»
28 «Kǝmando nia bananjiyidǝ,
simnden ruiyena.
Adǝ nangaro:
"Andi-a ni-a kansi buiyo,
aman ndǝmmiyo!"
yeiye.
Ni kǝrma kam na Kǝmandoyen tǝraana,
andiro awo diwi saddǝmbaworo kansi bui,
29 andi niro awima diwi njǝddiyende nangaro.
Niro awo ngǝla bas njǝddiye kolnjiye kǝlewanǝm salai leyem.»
30 Isaku tayiro kǝmbo ngǝmǝriye cǝdde jawune kesa.
31 Suwa lǝp cijane wundu yaye kamanjuro kansi gibbo.
Daji Isaku tayia cadduwe kǝlewan nanju kolyera.
32 Yim adǝma wolodiya Isakuye isane tiro lawar baram lajaidǝyea cakkude:
«Ingi cawandǝna!»
yera.
Baram adǝa Shebanin bowoyeno,
maananju kansi bo.
33 Adǝ nangaro kun kundenno bǝladǝye cunju Bir-Sheba,
maananju baram kansi boye.