Lawar tambo tadawa Nawi Isakuye
1
20 Isaku tada Ibrahimbe kǝrwunju fidewua duwon,
Rabeka fero Betuwelle koro kanna Labannea kamuro ngoyeno.
Rabeka cambiwawodǝ,
21 kamunju tada cuwandoro Isaku Kǝmandea kiworo.
Kǝmande sonju fanje,
Rabeka curo ngoyeno.
22 Curonjun moji alama kambǝɍi gai fanjidǝ:
«Awo attǝ awiro wua suwando?»
23 Daji leje Kǝmandea kiworo.
Kǝmandeye:
«Curonǝmnin jama yindi.
Jama ani faidai.
Fal kamanjua dunon koji.
Kuradǝ tǝngǝɍidǝa jǝgai.»
24 Sa njamboye kidǝnniya,
akko kawuwa yindi!
25 Burwoye culuwunadǝ kime,
tiyinju nga kanduɍia.
Tia Yesawulan bowoyera,
maananju kanduɍiami.
26 Kawuwanjudǝ mukkon gudugudu Yesawuyea cǝdana kiluwo.
Tia Yakuban bowoyera,
maananju gudugudu tama.
Sa tasambunadǝ,
bawanja Isakuye kǝrwunju firakku.
27 Tadawadǝ wurayera.
Yesawu kam karaaye,
kandira maskuro walyeno.
Yakuba hangal bowadaa,
kam leiman naptumaro walyeno.
28 Bawanja Isaku Yesawua cǝrawo,
da lǝman karaaye cǝraana nangaro.
Yanja Rabeka ye Yakubaa cǝrawo.
29 Yim laa Yakuba kalu laa karji duwon,
Yesawu tǝlǝs cǝmbarǝna karaan ise:
30: «Yimbarǝkkǝna,
kolsǝne kalunǝm kime adǝa yakke!»
Adǝ nangaro tia koro Yedomnin bowoyera,
maananju "Kime."
31 Yakubaye:
«Warasanǝm nankaruyedǝa se,
wu ye niro kaludǝa njikki.»
32 «Akko wumaa kǝna njejo cǝdidǝ,
warasani nankaruyedǝ awiro wuro faidasiyi?»
33 «Kansi wuro sǝbbui duwon,
njikki.»
Daji kansi juwe tiro warasanju nankaruye keno.
34 Yakuba ye tiro burodi-a kalu kime-a keno.
Yesawu juwe ingi cane sapkadan.
Ngainin Yesawu warasanju nankaruyero daraja falma njo wayeno.