Lawar karwu Nawi Ibrahimbe rijaptuye
12
Sa Isaku wurajǝnadǝn,
Ala Ibrahimba rijapturo bowoje:
«Ibrahim!»
«Naam.»
2 «Isaku ti tadanǝm tilo lok koro jauro raammadǝa ngone cine cidi Moriyayero lene.
Kau kuruwu laa mbeji,
lenǝme nadǝa wulnjǝgǝkkiya,
kǝladǝn wu nangaro tadanǝmdǝa lǝman duwaye gai duwane kannun warne!»
3 Wajǝnanjua Ibrahim tawaje kǝska wardaye calje koronju kaskenniya,
wolodiyanjuye yindi-a tadanju Isaku-a ngoje na Ala wuljǝgǝnadǝa kaduyeno.
4 Kawunju yakkua kǝla sapkenniya,
na Ala tiro wuljǝgǝnadǝa kuruwun cure
5 wolodiyanjuro:
«Nandi-a korodǝ-a na adǝn danowo duwon,
wu-a tadani-a na todǝro leniye Alaro ambǝtkǝiye isiye.»
6 Ibrahim kǝska wardayedǝa ngoje tadanju Isakuro gǝnajiye kannu-a jena-adǝa ti kǝlanju royenniya,
daji tayi yindi kallo leyera.
7 Lejai duwon,
Isakuye:
«Bawa?»
«Naam.»
«Akko kǝska,
akko kannu.
Nda ngǝlaro wardayedǝ?»
8 «Tadani,
Alama diye ngǝlaro duwayedǝa cuwudi wo.»
Daji tayi yindi kallo kǝla fuwunna leyera.
9 Na Ala tiro wuljǝgǝnadǝro kadiranniya,
Ibrahim kau capce na laya duwaduram cǝdande kǝskadǝa kǝladǝro sǝretkeyeno.
Tadanju Isakua cikkere kǝla kǝska sǝretkadadǝyero sǝnayeyeno.
10 Daji tadanjua duwaduro jena fitkeno.
11 Amma malaiya Kǝmandeyedǝ samen Ibrahimba bowoje:
«Ibrahim!
Ibrahim!»
«Naam.»
12 «Dane,
bare tadanǝmbo mukko gǝnagǝmmi,
bare tiro awima yiddǝmmi!
Tadanǝm tilo lokka wu Kǝmanǝmbo damsǝgǝmmidǝ,
wotte kǝrma jiremaro nia alaridamaro nonjǝkkǝna.»
13 Ibrahim kǝla sapce ngawo meyenniya,
ngǝlaro curo coccoɍi lǝrǝmbero ngaye kangadiyen dap tǝdana kiro.
Daji leje cǝdane cuwude cuju tadanjuyero ngǝlarodǝa duwaje Ala nangaro kannun rǝmǝs warje buwuro kido.
14 Adǝ nangaro Ibrahim nadǝro Kǝmandema kudoma wo cu kekko.
Kun kundenno am karaulan kau kura Kǝmandeyeman tuwandi cani.
15 Koro gademinno malaiya Kǝmandeyedǝ walde samen Ibrahimba bowoje:
16 «Manani ngonǝme tadanǝm tilo lokdǝa wuro damsǝgǝmmidǝ,
wadu ngokke kansi bukke
17 fagatto niro barga dǝmnjǝgǝkke kaduwunǝmba ngǝwugǝkki,
har nanngǝwunja sillowuso gai,
bi sim cidi kesaye gairo waljai.
Koro kǝladowanjaa kǝriwun jawune tayia canodi.
18 Adǝ nangaro am jiɍiya dunia sammaye,
kaduwunǝmbo barga dǝpkǝkkǝnadǝ gai,
tayi yero barga dǝpkǝkkoro wua sawori.
Ani nga wakkaji,
manani ngonǝmma nangaro.»
19 Ibrahim na wolodiyanjuyero walladanniya,
cijane kallo Bir-Shebaro kadira.
Nadǝn Ibrahim napkeno.