Lawar jiyara Kǝmandeye
9
Yim laa kausu dawu,
Ibrahim ci leimanjuyen gǝre kǝskawa kura Mamǝreyen napkada duwon,
Kǝmande tiro fǝleyaada.
2 Ibrahim kǝla sapkenniya,
ngo am yakku gǝrenjulan daada.
Tayia kirunniyama,
wup ci leimanjuyen cije dǝgalje tayia kapciye fuwunjan tungurumje ngumnju cidin gǝnaje
3 kuranjaro:
«Barganǝmnin,
marne fannin danowo.
4 Ingi sindo tuldaye njakkudǝkke,
fǝrdu kǝska adǝyen tussowo.
5 Kolle masǝna nayiro manjagakke duno fandowo,
kawu lenuwidǝro.
Ngai gǝnia,
awi fannin jǝptundoye faidanju wo!»
«Yo ngǝla!
Wullǝmmadǝ gai de!»
6 Sadǝlan Ibrahim dǝgalje na Saratuyero curo leimadǝyero leje:
«Kamuni,
duwan jakka yakku fǝlawaye ngone,
fankasu kane!»
7 Ngawo adǝa wuljǝnayen,
dǝgalje leje curo lǝmannayen kǝnna kǝna bawoa cǝdane wolodinju laaro ce gangadaro kǝnnaa deyeno.
8 Daji Ibrahim kǝnna deyada-a kǝndǝrmu-a kiam kǝɍi-a ngoje cade fuwu kusottowayen gǝnaje,
leje karǝnnjan fǝrdu kǝskadǝyen daada duwon masǝna kedo.
9 Kusottowadǝ:
«Nda kamunǝm Saratu?»
«Akkonju curo leimayen.»
10 Daji kuranjaye:
«Fagat,
minna kua gai fannǝmbo isǝkkiya,
Saratu tada cuwandi.»
Saratu ci leimadǝyen ngawonjun tia kǝrǝnji.
11 Ibrahim ye kiarijǝna,
Saratu ye kǝmurjoje salanambu koljǝna.
12 Daji Saratu kaasu curonjuro cǝdde:
«Wu kǝmurjonǝkkǝna koro fadomani ye kiarijǝnadǝ,
awo kǝji adǝa fandǝkki wa?»
13 Daji Kǝmandeye:
«Ibrahim,
awiro Saratu kaasu cǝdidǝ?
Awiro "Wu jauro kǝmurjo adǝ,
jiremaro rangǝkke tada fandǝkki wa?"
cǝnidǝ?
14 A!
Awo jauro ajabba kǝrmai Alayea kojǝna menna wa?
Minna kua gai isǝkkiya,
Saratu tada cuwandi.»
15 Saratu rije awo cǝdǝnaa cǝdǝnni cǝne:
«La!
La!
La!
Wu kaasu dikkǝni!»
«Jire kaasu dimma.»
16 Kusottowa yakkudǝ na adǝlan ciyeranniya,
kanji bǝla Sodombe kero.
Ibrahim tayia cadduwi duwon,
17 Kǝmandeye karwunjun:
«Awo dikkidǝa Ibrahimbo gǝrakki wa?
18 Jiremaro kaari jama kura ye dunoa yero walji,
koro tiramnin am jiɍiya dunia sammaye barga cawandi.
19 Tia amanmaniro ngokkǝna,
tadawanju-a kaduwunju-a cakko,
jirewuro walja,
jawalni jaaro.
Ngainin awo tiro waduro ngokkǝnadǝa yiddǝkki.»
20 Daji Kǝmandeye:
«Ibrahim,
so kǝla am Sodombe-a Gomorraye-ayen jauro ngǝwu,
koro biwunja ye jauro kura.
21 Adǝ nangaro nanjaro lekke rukke kibbunju fakki.
Jire bi jire gǝniro nokki.»
22 Sa kusottowadǝye yindinja na adǝa koljane jawal Sodombe jagaidǝn,
Kǝmande na Ibrahimben dayeno.
23 Ibrahim karǝnnjuro ise:
«Kǝmande,
jire wa kam jirea-a jirebawoa-a kǝla tilonna yejǝmidǝ?
24 Waneye Sodomnin jirewu fiwu mbeji.
Jirewu fiwu curo bǝla adǝyen dasaana yaye,
bǝlanja gawurnǝmbawo sanagǝmi wa?
25 Ǝn!
Ǝn!
Rangǝme ngai dimbawo.
Jirema-a jirenambuma-a karnǝmbaworo njejodǝ,
halnǝm gǝni.
Ni sharama dunia sammayedǝ,
jire ganambu kai yonjiyiwawo!»
26 «Sodomnin jirewu fiwu kiwandǝkkoa,
tayi nangaro bǝlanja sammaa gawurnǝkki.»
27 «Kǝmande,
wudǝ kam cidi-a buwu-alan tǝdǝna yaye,
niro mana njǝddoro nianǝkkǝna.
28 Waneye curo jirewu fiwu aniyen uwu mauyenoa,
nda?
Am uwu ani nangaro bǝladǝa sanagǝmi wa?»
«Jirewu fidewu wuri nayeyekkoa,
tia sanagǝkkiwawo.»
29 «Waneye jirewu fidewuma nagǝmi.»
«Tayi fidewu ani nangaro dikkiwawo.»
30 «Kǝmande,
marne bare gǝrganǝmmi,
kolsǝne koro yaye mananjǝgǝkke.
Waneye fiakkuma fandǝmi.»
«Fiakku kiwandǝkkoa,
dikkiwawo.»
31 «Kǝmande,
koro yaye niro manaduro niakkǝna.
Jirewudǝ findima wa,
nda?»
«Bǝladǝa sanagǝkkiwawo,
tayi findi ani nangaro.»
32 «Kǝmande,
marne bare gǝrganǝmmi,
daryerambo niro mananjǝgǝkki.
Waneye jǝrewu mewuma nagǝmi,»
yeno.
«Bǝladǝa sanagǝkkiwawo,
tayi mewu ani nangaro.»
33 Ibrahimbe mananju kerǝnniya,
Kǝmande leyeno.
Ibrahim ye fannjuro wallada.
41 Sodombo malaiya yindidǝ kajiri kadira.
Lutu ngaworam bǝladǝyen napkada duwon tayia kirunniyama,
cije tayia kapciye fuwunjan tungurumje ngum cidin gǝnaje:
42 «Ala ngǝwuro,
marnowo arowo fannin jǝmmowo.
Sindo tulluwe bonuwiya,
baɍi suwa lǝpnin jawalndo gaiwo!»
«Ǝn!
Ǝn!
Farsamnin boniye waniye.»
43 Adǝ yaye Lutu kido kido nga tayia cakke fannjuro leyera.
Tayiro bǝri salaye dejiye burodi yis bawoa cǝde gewo.
44 Tayi kǝnǝmbo bojanni duwon am Sodombe jairon kiarin kam falma gapcǝnniro isane fadodǝa dirijane kǝlyera.
45 Lutua bowojane:
«Nda kongwawa ku bune fannǝmnin jǝpcanadǝ?
Tuluwe tandia,
nandero isa,
tayia kamuro kuroro maniye.»
46 Lutu ci fannjuyen culuwe cinna jakciye tayia najiye:
47 «Ǝn!
Ǝn!
Sawawani,
bare awo diwi diwwi!
48 Fanowo,
ferowani yindi bikir mbeji.
Kolsǝnowo tayia nandoro kudǝkke,
awo tayiro rawuwwa yiddowo.
Amma bare awima kongwawa aniro yidduwwi!
Dalilnjudǝ fannilan isane jǝpcanadǝro,
wuma sǝɍiwomanja wo.»
49 «Walle na adǝn!
To fanowo!
Ti adǝ sikudo duwon,
wai sharama bǝlayero waldu maji.
Daji tiro kuttu kusottowanjuyea kojǝnaro yiddiye!»
Daji Lutua gǝgǝrǝpcagane,
cinnadǝa dunon kaduro fuwuyera.
50 Kusottowa yindidǝ Luturo mukko sajagane nanjaro curo fadoyero cawude cinnaa jakkera.
51 Am ci fadoyen captana kuran ganan sammaa fǝdǝm isakambujagane na cinnadǝ dǝganama tayiro fando tiyero.
52 Kusottowa yindidǝ:
«Lutu,
wundunǝmsoa na adǝn?
Kǝsai,
tadawa,
bi ferowa,
amnǝm curo bǝla adǝyen sammaa tuluwe,
53 bǝla adǝa sanagǝiye nangaro.
Kǝmande so kǝla am bǝla adǝyen jauro ngǝwuro fanje,
bǝladǝa sanaduwuro andia juwaseyera.»
54 Daji Lutu kǝsaiyanju kwawa ferowanjuyero manaduwuro culuwe nayeyenniya:
«Cinowo na adǝn luwowo,
Kǝmande bǝladǝa sanajiyi nangaro,»
tayi tǝmanjan kǝlanga cǝdiro ngoyera.
55 Sa dunia wadu badiyenniya,
malaiya yindidǝ Lutua jǝkcagane:
«Cine kamunǝm-a ferowanǝm nanǝmnin dasaana-a ngone luwe,
bare wowom bǝla batti adǝye ni yea lenjǝnni!»
56 Luworo ganjǝnni,
amma Kǝmande tia njunojǝnadǝro,
malaiyawa ti-a kamunju-a ferowanju yindi-a mukkoyen cadane tayia ngawo bǝlayero kettuluwo.
57 Kettuluwunniya,
malaiya falle:
«Lutu,
kasowo rondo kanowo!
Bare ngawo menuwe ruwwi!
Bare ndaraman curo ngor Jordaniyen danuwwi!
Kasowo kǝla kau kurasoyero taddowo,
masiwaro kanowo!
58 «Wai!
A!
A!
Malǝm,
marne,
59 wuro kissǝgǝmma,
ser kura sǝddǝme roni yikkaakkǝna,
amma rangǝkke masiwa wua suwandǝnnin kasǝkke har na kau todǝyero rǝpkǝkkiwawo duwon nukki.
60 Rui,
akko bǝla laa jaumaro karǝnnin rangǝkke kasǝkke lekki.
Ti tǝngǝɍima.
Kolsǝne kasǝkke lekke roni yikkaakke.
Tidǝ bǝla tǝngǝɍima,
diye!»
61 «Yo ngǝla,
koro yaye ser gade njǝddǝkki,
bǝla manasǝgǝmmadǝa sanagǝkkiwawo.
62 Duwan kase lene na todǝro.
Awima rangǝkke dikkiwawo,
kawu nadǝro lenǝmiro.»
Mana Lutuye adǝ nangaro bǝla adǝa Sowarnin bowojai.
Sowarre maananju tǝngǝɍi.
63 Kǝngal luwo cǝdi sa Lutu Sowarro isǝnadǝ.
64-65 Daji Kǝmande kannu samen kolyeno.
Dǝlawu gai Kǝmande samenin kǝla Sodom-a Gomorra-ayero kannu fijiye bǝlawa yindi ani-a ngor samma-a siyeyeno.
Am curo bǝlawaye-a kajimso-a kǝskaso-a sammaa kannu giwo.
66 Kamu Lutuye ngawo meje kirunniyama,
ngatkǝm mandayero walyeno.
67 Suwa lǝpnin Ibrahim cije na yimmaye fuwu Kǝmandeyen dajǝnaro leyeno.
68 Kanji Sodom-a Gomorra-a ngor Jordaniye samma-ayea kirunniya,
cidi samman kange tǝɍǝn cǝlǝm pǝt ciji kiro.
69 Sa Ala bǝlawa cidi adǝyea sanajiyidǝn,
Ibrahimba takcǝna.
Lutua kittuluwunniya duwon,
bǝlawa na dǝganadǝa sanayeyeno.
70 Lutu Sowarnin naptu rijǝnadǝ,
ti-a ferowanju yindi-a bǝladǝa koljane kau kuraro kallo lejane curo kullen napkera.
71 Yim laa fero kuradǝ kannanjuro:
«Bawande kiari,
koro cidi adǝn kongwa falma andia madama bawo,
jiɍi dunian ndaran yaye tǝdidǝ.
72 Are bawandero diben yiyo,
sagarando hangalnin culuwo.
Ti-a boniyo,
kasuni cuwando!»
73 Bune adǝ bawanjaro diben cadǝne cane fero kuradǝ-a ti-a boyera.
Ti bǝna-a cidu-a feronjuye nojǝnni.
74 Wayenniya,
fero kura kannanjuro:
«Bikka bune ngawo bawandeyen bokkǝna.
75 Bune adǝ ye tiro diben yiyo,
ca!
Caiya,
lene ni-a ti-a bonowo,
tiro kasuni njoro!»
Bune adǝ ye bawanjaro diben cadǝne kianniya,
fero ganadǝ ise ti-a boyera.
Bǝnanju-a cidunju-a nojǝnni.