Lawar aman katte Ala-a Nawi Ibrahim-ayen tabbattuwuye
8
Ibrembe kǝrwunju filǝgar lǝgari kidǝnniya,
Kǝmande tiro fǝlediye:
«Wu Ala Mai Kura.
Sawi yaye wua karwunǝmbo sakke,
biwunǝm baworo dǝgai!
2 Aman kattendeyedǝa ngǝlaro takke kaduwunǝm jauro isangǝwugǝkki.»
3 Ibrem ngumnju cidin gǝnayenniya,
4 koro Alaye:
«Akko aman kattendeye nangaro awo dikkidǝ:
Kaari jama gadegade ngǝwuyero wallǝmi.
5 Ibremnin kua adǝn fuwun bowonjaiwawo,
amma cunǝm Ibrahimbo walji.
Ibrahimbe maananjudǝ bawa jama gadegade kadaye.
Nia njakkǝkke kaari am cinjama bawoyero wallǝmi.
Yakkǝkke kaduwu kada kadami fandǝmi.
6 Yakkǝkke kaduwunǝm larduwa garji.
Curonjan maiyasoma caluwi.
7 Aman kattendeye tǝmmaro kollǝkkiwawo,
koro katte wu-a kaduwunǝm-ayen har abadaro rokki.
Barga aman adǝye nangaro wu Ala kaanǝmdǝ,
koro kaanjaro kasaddǝkkǝna wallǝkki.
8 Lardu Kan'anaye na ni naptu nansikudoye dimi adǝa ni-a kaduwunǝm-aro tǝgǝmbo njadǝkke,
wu Ala kaduwunǝmbero wallǝkki.»
9 «Ni-a kaduwunǝm diwun diwurinne-a aman adǝa ngǝlaro taiwo!
10 Ngo aman kattendeye nangaro awo dolero nayiro wajimnjaanadǝ:
Kongwa fi yaye curondoye kajaadaro waljo!
11 Kongwa ramdo kamgaradadǝ?
Tima sheda aman kattendeye wo.
12-13 Jaman fi yaye ye tadawando tasambǝna samma kawu wuskua kajaadaro walja!
Adǝgai kaɍeawa fannǝmnin tasambǝna-a jiɍi gadegade yuwumma-a tayi samma kajaadaro walja!
Ngaima sheda amanndeye curo tiyindoyen sawisoro dǝgai.
14 Amma kongwa kajadǝnni jǝmbulu dǝganamadǝ curo jamandoyen tuluwowo!
Wu-a ti-aye katten aman baworo cǝdǝna!»
15 «Bare kamunǝmba Saran bowonǝmmi.
Kua adǝn fuwun cunju Saratu,
maananjudǝ Mairam.
16 Tiro barga dǝpkǝkke niro tada kongwa njǝkkambiyi.
Saraturo barga dǝpkǝkke ya jama gadegade kadayero walji.
Curo kaduwunjuyen maiya jama jiɍi jiɍiye caluwi.»
17 Ibrahim ngumnju cidin gǝnaje kaasu cǝde karwunjun:
«Kwa kǝrwu miaa tada cambi wa?
Saratu ye kǝrwu filǝgarra tada cambi wa?»
18 Daji Alaro:
«Ala,
Ismayilaa warasama aman kattendeyero kasadde!»
19 «Ǝn!
Ǝn!
Kamunǝm Saratu tada cambi,
diye!
Tia Isakun bowonǝmi.
Aman katte wu-a ti-a kaduwunju-aye tǝmmaro kollǝkkiwawo.
Aman sawisoyero walji,
maana Isakuyedǝ Kaasuma.
20 «Koronǝm kǝla Ismayilayen fakkǝna.
Tiro barga dǝpkǝkke kaduwu ngǝwu yikke isangǝwugǝkki.
Mainawa mewun yindin cambi,
yakkǝkke kaduwunju ye lardu kura garji.
21 Amma amanniye warasamanjudǝ Isaku tada Saratu niro minna kua gai njǝkkambiyidǝma!»
22 Ala-a Ibrahim-a mananja keserǝnniya,
Ala sapkada.