Lawar tambo Ismayilaye
7
Sara kamu Ibrembe tiro tada cǝkkambǝnni.
Kirnju laa Masarre mbeji,
cunju Hajaratu.
2 Saraye:
«Kwani,
Kǝmande yal njambo damsǝgǝna,
lene ni-a kirni-a bonowo,
waneye tiramnin tada yaye fandǝkki.»
Ibrem mana kamunjuyea ngoyeno.
3 Ngawo Ibrem saa mewuro lardu Kan'anayen napcǝnayen,
Sara kirnju Masarre Hajaratua kamuro kwanju Ibrembo ce,
4 Ibrem-a Hajaratu-a bojane curo ngoyeno.
Curo ngojǝnaro asuyenniya,
kǝmanju Saraa kamu bowuyero ngoyeno.
5 Sara Ibrembo:
«Kǝla niyen wua rusǝna.
Wuma kirnia niro njikko,
amma ti curoaro asuyenniyama,
wua kamu bowuyero ngoseno.
Kǝmande sharande kamjo!»
6 «Ngo kirnǝm mukkonǝmnin,
awo ronǝm cǝraana tiro yidde!»
Daji Sara Hajaratua nanguro cakke Hajaratu kiyaso.
7 Malaiya Kǝmandeyedǝ tia karaan karǝn na ingi runjuma culuwi laayen nayeyeno.
Na ingia adǝ kǝla jawal Masarren.
8 Malaiya Kǝmandeyedǝye:
«Hajaratu kir Saraye,
ndaran kadim?
Ndara lenǝmi?»
«Na kǝmani Saraa kuruwuro lekki,»
9 «Walle na kǝmanǝmbero,
tia gai!
10 Wu Kǝmando kaduwunǝmba jauro isangǝwugǝkke har komdiwaworo dikki.»
11 «Ngo ni curoa,
tada kongwa yambǝmi.
Wu Kǝmando sonǝm karwukuttaye fakkǝnadǝro,
tia Ismayilalan bowone!
12 Ti kongwa jiɍi fǝr karaaye gairo walji.
Ti-a wundu-ama hangalnja tilojiwawo.
Na kǝramiyanju sammayea kuruwunin dǝgai.»
Maana Ismayilayedǝ Ala fanji.
13 Hajaratu kǝlanju cuwoye:
«Waiyo!
Ala Kuromani adǝa rukkǝna wa?»
Daji Kǝmande tiro manajǝgǝnadǝro Hajaratu cu adǝa keno:
«Nima Ala Wua Kuroma wo.»