4 «Ǝn!

Ǝn!

Ti gǝni warasamanǝm wo,

tada kongwa yambǝmidǝ nia warasanji.»

5 Daji Ibrembo curo leimanjuyen culuwo cǝne,

culuwe:

«Same rui!

Rangǝmia,

sillowuwa komme!

Kaduwunǝm tayi gairo komdiwaworo walji.»

6 Ibrem Kǝmandea curotilon cǝdane,

adǝ nangaro Kǝmande tia jiremaro ngoyeno.

7 Ala koro Ibrembo:

«Wuma Kǝmanǝm nia curo bǝrni kura Ur Babilayen njuttuluwukke lardu Kan'anayero njuwudǝkke,

kaanǝmbo waljoro.»

8 «Ala Kǝmani,

ndayilan lardu adǝa tabbat fandǝkkiro nokki?»

9 «Wuro fe-a kani-a ngǝlaro-a finja yaye saa yakku yakkua koro bullam-a tattawar-a sukkude!»

10 Ibrem tiro lǝmanna sammaa cukkude duwayenniya,

ngudowadǝro kajia,

lǝmanna yakkudǝa dawuyen dagarje reda fi yayea fuwu reda kamanjuyen gǝnaje jeɍe yindi kido.

11 Kausu ngudowa da kǝmbomaso kǝla lǝmanna duwaadadǝyero fiyaadaranniya,

tayia duyeno.

12 Dunia lǝmgenniya,

Ibremba kǝnǝm dama baworo ngoyeno.

Duwu cǝlǝm fǝt jauro ridua tia jakkeno.

13 Kǝmandeye:

«Ibrem,

ngǝlaro none,

kaduwuwanǝm lardu gadero lejane sikudoro waljai.

Lardudǝn kaɍeawaro waljane,

tayia kǝrwu yer dewuro basarjai.

14 Amma wudǝ,

am lardu na kaduwunǝm nankaɍea cadidǝyero sharanja yiddǝkki.

Ngawo adǝyen kaduwuwanǝmdǝ arsiyi ngǝwu cawande lardudǝa koljai.

15 Ni ye curo karwukǝjiyen kiarinǝme,

kǝlewa salainin bawonǝme nia sittǝranjai.

16 Kaduwuwanǝm sai ngawo kǝrwu yer dewuyen lardu Kan'anaye adǝro waldai.

Awoa am lardu adǝye biwunja ngǝwujǝna yaye,

kǝrma na tayia duduyedǝa najaganni.»

17 Kǝngal baworo walje dunia cǝlǝm fǝtto walyenniya,

ngada kura kanduwolla tǝlam kannuye gǝpciaro,

kange cǝsangiaro,

katte jeɍe lǝmanna duwaadadǝyen koyeno.

18-21 Adǝgailan yim adǝ Kǝmande Ibrembo aman ce:

«Kaduwunǝmbo diye lardu adǝa yikki,

tǝn bǝrǝm Masarren tai,

har bǝrǝm kura Yufarat canidǝro yade.

Tayiro lardu kǝrma am jiɍi jiɍi mewu dasaana adǝa yikki.»