Lawar Nawi Ibrahim-a Nawi Lutu-a faiduye
4
2 Ibrem lǝman-a ɍiwulla-a koro dinar-a samman jaumaro gaɍiwu.
3 Napci ciji ngailan Negebnin bǝla Baitellero har napturamnju burwoye katte Baitel-a Ai-a na laya duwaduram cǝdandǝnadǝro leyeno.
4 Nadǝn jama capce tayiro Kǝmandedǝma Ala wo cǝne ambǝtkeyera.
5 Lutu Ibremba jǝganadǝ ti ye fe so,
dimi so,
leima so cǝdana.
6 Am-a lǝmanna-aye nanngǝwunjaro cididǝ rakce tayi sammaa ngojiwawo.
Adǝ nangaro rakcane na tilon dasayiwawo.
7 Katte sǝniya Ibrembe-a Lutuye-ayen rowada wakkayeno.
8 Daji Ibrembe:
«Lutu,
bare katte wu-a ni-ayero,
katte sǝniya kakke-a kaanǝm-ayero rowada ngaanni.
Andi yindidǝ kǝramiya.
9 Ngo lardu samma fuwunǝmnin,
na raamma kǝrene,
wu-a ni-a faidiyo!
Yalayen leyemba,
wu anǝmben lekki.
Anǝmben leyemba,
wu yalayen lekki.»
10 Lutu kǝla sapkenniya,
adinnamnin cidi bǝrǝm Jordaniye sammaa kiro.
Cidi adǝye ingidǝ ndara yayea cattǝna.
Kawu Kǝmande bǝla Sodom-a Gomorra-a sanajiyiro,
cidi adǝn tamiya har bǝla Sowarrero yade samma kǝɍi jǝrǝt jiɍi jǝrwu Kǝmandeye gai,
jiɍi lardu Masarre ye gai.
11 Daji Lutu kǝlanjuro cidi Jordaniye kǝreje,
kǝla adinnamninna leyeno.
Ngailan tayi yindi faiyadara.
12 Ibrem lardu Kan'anayen napkeno,
Lutu ye leje dawu bǝlawa cidi Jordaniyen napce,
har ci bǝla Sodombero leimawanju kokkeno.
13 Am Sodombe jaumaro am diwi,
tayi danauwu kura.
14 Ngawo Lutu-a Ibrem-a faidanayen,
Kǝmandeye:
«Ibrahim,
na dǝgammadǝn kǝla samme,
yala-a anǝm-a adinnam-a fǝde-a rui.
15 Lardu rumi sammaa ni-a kaduwunǝm-aro tǝgǝmbo njadǝkkǝna.
16 Kaduwunǝmba sim cidi kesaye gairo isangǝwugǝkki.
Sim cidiye komdia,
kaduwunǝm ye komdi.
17 Cine lardu adǝa gǝdifǝden anǝmyalanno dirine kǝlle,
tia njikkǝna.»
18 Daji Ibrem bǝrde leje karǝn kǝskawa Mamǝreye gǝre bǝla Heburonnen napkeno.
Na adǝn Kǝmande nangaro na laya duwaduram kidando.