Lawar Nawi Ibrahim Masarnin naptuye
3
10 Lardu Kan'anayero kǝna dama bawo kǝrgaanniya,
Ibrem Masarro gana tusturo leyeno.
11 Sa Masarro ngasayidǝn kamunjuro:
«Sara,
fane,
nokkǝna ni kamu kuroro shawa.
12 Am Masarre nia njaruiya,
"Adǝ kamunju" cane wua seyese nia roa kolnjai.
13 Tayiro ni kannani wulgǝne,
wua ni nangaro ngǝlaro sada!
Ngainin niramnin roni fuddǝkkiwawo.»
14 Ibrem Masarro kadinniya,
am Masarre Sara jaumaro kamu shawaro kero.
15 Kowonawa Fira'aunaye tia carune,
Fira'aunaro nanshawanju kengorǝnniya,
cakke tia fannjuro keado.
16 Ti nangaro Fira'auna Ibremba ngǝlaro kida.
Ngaiman Ibrem fe so,
dimi so,
koro bin karwudin so,
kaɍimo so,
kaɍea so,
kir so kiwando.
17 Amma Sara kamu Ibrembe nangadǝro Kǝmande Fira'auna-a am fannjuye-aro ajawu kura gǝnayeyeno.
18 Fira'auna Ibremba bowoje:
«Attǝ awi wuro sǝddǝm?
Awiro ti kamunǝm wulsǝgǝmmi?
19 Awiro wuro:
"Adǝ kannani,"
yime tia kamuro ngoyekko?
Ngo kamunǝm,
ngone lene!»
20 Amnjuro wada ce Ibrem-a kamunju-a awowa cadana samma-a lardu Masarren cattuluwo yeno.
21 Daji Ibrem Masarra kolje karaa Negebbero walyeno.
Ti-a kamunju-a kǝndanja-a.
Lutun kundenno walyera.