Lawar wadu ngodu Alaye Nawi Ibrahimbo
2
Kǝmande:
«Ibrem,
lardunǝm-a kǝramiyanǝm-a am fado bawanǝmbe-a kolle,
cine lardu niro fǝlenjǝgǝkkidǝro lene.
Yakkǝkke kaduwunǝm jama kadaro walji.
2 Niro barga dǝmnjǝgǝkke,
cunǝm ndaran yaye darajaaro dikke,
am nilan barga cawandi.
Am niro barga dǝmnjaanadǝro wu ye barga dǝpkǝgǝkki.
3 Kam duwon nia baskunjǝnadǝa wu ye baskukki.
Niramnin am jiɍiya dunia sammaye barga cawandi.»
4 Kǝmande tiro wuljǝgǝnadǝ gai,
Ibrem ciyeno.
Lutu ye tia giya.
Sa Ibrem bǝrni Harrannea koljǝnadǝ kǝrwunju fitulur wuri.
5 Kamunju Sara-a tada awanjugǝna Aranne Lutu-a arsiyi jagandǝna-a am Harranne laa tayia jaana-a sammaa ngoje,
lardu Kan'anayero leyera.
6 Kadiranniya,
Ibrem lardudǝa reje koje,
har na kǝska kura Moreye karǝn bǝla Sikembero leyeno.
Jaman adǝn am Kan'anawu canidǝ lardu adǝlan kasarga.
7 Kǝmande Ibrembo fǝlediye:
«Kaduwunǝmbo diye lardu adǝa yikki.»
Daji nadǝn Ibrem kau capce Kǝmande tiro fǝledǝgǝnadǝro na laya duwaduram kittando.
8 Na adǝlan leimanju wuije cije curo kauwa kurayero adinnam bǝla Baitellero leyeno.
Bǝla Baitelle fǝden bǝla Aiye adinnamnin yindi kattenjan leimanju tuje,
Kǝmande nangaro na laya duwaduram cǝdande,
jama capce tayiro Kǝmandedǝma Ala wo cǝne ambǝtkeyera.
9 Daji napci bǝrdi ngai duwon,
Ibrem karaa kura Negeb canidǝro leyeno.