Lawar kǝnnasar fando yaudiyaye
12
Kǝndawu kǝnmewun yindinne adar caniye kawunju mewun yakkun kido.
Yim adǝma wada Maiyedǝlan kida tǝdi wo,
koro yim adǝma waduwu yaudiyaye kǝnnasar kǝla yaudiyayen fando tǝmajana wo.
Amma awo tǝmajanadǝ gǝni wakkajo,
yaudiyama kǝnnasar cawando.
2 Cidi Mai Ahasarasselan ndaran yaye yaudiya bǝrni dasaanalan captane am tayiro kuttu maduwuro lawala kekkado.
Am jiɍi gadea samma yaudiyaa rijana nangaro,
wunduma tayia rakciwawo.
3 Mordekaia jauro rijana nangaro,
wakkilla Maiye-a gomnawa larduwaye-a fuwuwu jama larduwaye-a kidawu Maiye kura kura-a sammanja yaudiyaa banayeyera.
4 Mordekaidǝ mairin jauro kam kuraro waljǝna,
cunju ye larduwa samman culuwuna,
koro fuwuji nguson kuraro walji.
5 Ngaima yaudiya jiɍi caraanaro waduwunja sammaa kashagarnin roro ceyese sulat baworo kedo.
6 Bǝrni Shushannin kongwa yer uwu keyeso.
7-10 Koro tadawa mewu Haman tada Hammedataye kǝlado yaudiyayedǝa keyeso.
Tadawadǝ,
tayima Farshandata,
Dalfona,
Asfata,
Forata,
Adaliya,
Aridata,
Farmasha,
Arisai,
Aridai,
Waijata.
Amma lǝman wundunjayema lejanni.
11 Yimdǝma nanngǝwu am Bǝrni Shushanlan ceyesǝnayedǝa Mairo wulyeyeranniya,
12 tiye Gǝmsuro:
«Esta,
Bǝrni Shushanlaman yaudiyadǝ kongwa yer uwu-a tadawa mewu Hamanne-a ceyeso.
Larduwani gadedǝn am ndawu gǝle ceyeso?
Kǝrma awi koronǝm wo?
Kasaddǝkkǝna.
Awi koro raam?
Fandǝmi.»
13 «Barganǝmnin,
kasaddǝmmaa,
yaudiya Bǝrni Shushanlan dasaanadǝ jiɍi ku wadanǝm jaane cadǝnadǝ gairo kolle baɍi ye cado,
koro kamin tadawa mewu Hamannedǝa kǝskaro rojaa.»
14 Daji Mai kasacce wadadǝa Bǝrni Shushannin jamaro kurukcagane kamin tadawa mewu Hamannedǝa kǝskaro royeyera.
15 Kǝndawu adarre kawu mewu deria yaudiya Bǝrni Shushanne koro waldane captane bǝrnidǝlan kongwa yer yakku ceyeso,
amma lǝmannja lejanni.
16 Yaudiya larduwa Maiye gadeyedǝ,
tayi ye ronja kalduro capkadara.
Am tayia wul wajana dǝwu fitulur wuri ceyese ngaima kǝladowanjaa baworo kedo,
amma lǝmannja lejanni.
17 Awo ani curo kǝndawu adarre kawu mewun yakkunna wakkayera.
Wajǝnanjua yimbe mewu deria yaudiya tussane yimdǝa yim masǝna kǝji boye-a karwukǝji fǝledaaye-aro kedo.
18 Amma yaudiya Bǝrni Shushannin dasaana yim mewun yakkun-a mewu deri-a lawalaro captanadǝ,
yimbe mewu wuria tussane,
yim adǝmaa yim masǝna kǝji boye-a karwukǝji fǝledaaye-aro kedo.
19 Adǝma nangaro yaudiya bǝladeyawudǝ kǝndawu adarre kawu mewu deriyedǝa ngǝmǝri masǝna kǝji boye-a karwukǝji fǝledaaye-aro ngoyera.
Yim adǝ wundu yaye kamanjuro masǝna juwajiyi.