Lawar ngǝmǝri kǝnnasar taktuwurambe
13
20 Mordekai lamarra wakkajana sammaa ruwuyeno.
Daji yaudiya cidi Mai Ahasarasse larduwa karǝnnin kal,
kuruwunin kal,
dasaana sammaro kakkadu juwajiye:
21 «Jama,
saa nguson kǝndawu adarre kawu mewu deria-a wuria-a ngǝmǝri waljaa.
22 Dalilnjudǝ yim anima andi yaudiya na kǝladowandeyen kǝlande kimoyiye.
Kǝndawu adǝn karwukuttande karwukǝjiro walsǝne,
koro lagarannde ye ngǝmǝriro walsera.
Adǝ nangaro saanduri yim aniye isiya,
ngǝmǝri masǝna kǝji boye-a karwukǝji fǝledaaye-aro dewo,
amanjaro masǝna juwanowo,
koro am duno ganaaro sadaa dewo!»
23 Daji yaudiya mana Mordekaiye ngojane ngǝmǝri fallo cadǝnadǝa adaro ngojane saa nguson cadiro walyeno.
24 Curo kakkaduyen Mordekaiye yeno:
Haman tada Hammedataye koro kaduwu Agagayedǝ kǝlado jama yaudiyaye.
Nanga laa tayi sammaa yejǝme sulat baworo dioye cǝdi cǝne,
yim awo niajǝnadǝro ngǝla wo noduro koro Furim canidǝa kido.
25 Amma Mai lawar adǝa fangenniya,
cakke kakkadu ruwujane niadiwi Haman yaudiyaro njǝddo cǝraanadǝ kǝlanjuro cukkure ti-a tadawanju-a kǝskaro royeyera.
26 Adǝma nangaro cu koroye Furimdǝa ngojane ngǝmǝri aniro kesakko.
Awowa Mordekai kakkadunjun tayiro ruwujǝgǝna-a awowa simnjan carune tayia cawandǝna-ayen kǝlan
27 yaudiya yim yindi anilan,
sanja kalkallo isiya,
ngǝmǝri jiɍi wuldǝnadǝ gairo dio kǝlaro ngoyera.
Adǝ ada kaanja duwon,
kaduwuwanja-a am yaudiyaro waljana-ayero walyeno.
28 Yaudiya fado falle,
bǝla fiye yaye,
lardu fiye yaye,
jaman fiye yaye,
lamar ania takturo yim anilan ngǝmǝri cadi.
Adǝ nangaro yim Furimbe ani tǝmmaro curo yaudiyayen facciyiwawo,
kaduwuwanja ye abadaro lamar adǝa ngessaiwawo.
29 Mordekai yaudidǝ tia banajiyiaro Gǝmsu Esta,
fero Abihayille,
kǝnduwonju fǝlejiye kakkadu gade kǝla Furimbe todǝyero duno njoro ruwuyera.
30 Yaudiya lardu mian findin tuluri cidi Mai Ahasarasselan dasaana sammaro kakkadu adǝ curonjun mana nanlewaye-a naptu nanlewaye-a dǝganaa juwayeyera.
31 Yaudiya kasacca yim ngǝmǝri Furimbedǝa sanju kalkalnin cado,
jiɍi Mordekai yaudi-a Gǝmsu Esta-a kǝlanjaro cadǝnadǝ gai,
koro jiɍi tayi kǝlanja-a kaduwuwanja-aro yim so dioye-a asem taye-asoro cadǝnadǝ gai.
32 Adǝgai wada Estaye ngǝmǝri Furimbe tabbacciye,
koro curo kitawuyen ruwuyera.