Lawar dawari Mordekai-a Gǝmsu Esta-aye
11
Yim adǝman Mai Ahasaras awo Haman kǝlado yaudiyaye jǝgandǝna sammaa Gǝmsu Estaro keno.
Esta tiro Mordekai kǝraminju cǝne wulyeyenniya,
kasacce Morkedai na Maiyero isiro walyeno.
2 Daji Mai kulumnju na Hamannen cǝmowonadǝa ngulondon cuttuluwe Mordekairo keno.
Esta ye lǝman Hamanne cuwandǝnadǝa Mordekai kissuworo mukkonjuro kekko.
3 Koro Esta walde Mairo mana kiddo.
Fuwunjun tungurumje nguyenniya,
cire:
«Barganǝmnin,
lowonjǝkkǝna.
Nankǝlado Haman kaduwu Agagaye yaudiyaro njǝddo niajǝnadǝa bare tǝmmaro kasaddǝmmi.»
4 Mai kanju kǝrmaiye dinarredǝa tiro sajiye Esta cije fuwunjun daje:
5 «Barganǝmnin,
kasaddǝmmaa,
koro wua ardisǝmmaa,
marne,
wada tuluwe ruwuja,
kakkadu Haman niadiwiro yaudiya curo cidinǝmbe ndaran yaye dasaana sammaa njejoro ruwujǝnadǝa baworo cǝdo.
6 Masiwa jamani cuwandi adǝa jiɍi fin rangǝkki?
Jiɍi fin karwuni kasacce jiɍini baworo cadi?»
7 Mai Esta-a Mordekai yaudi-aro:
«Akko wu Haman yaudiyaa njejoro niajǝnadǝa yakkǝkke kǝskaro rojagane nuna,
koro lǝmannju sammaa Estaro yikkǝna.
8 Amma kakkadu wowombe cu Maiyen ruwuwada kǝlanjun lamba Maiyeadǝ abadaro cindiwaworo nonuwwa.
Nayidǝ,
jiɍi rondo cǝraanaro kakkadu yaudiyaro kǝji cunilan ruwunowo,
lambani kǝlanjuro bakkǝgǝnowo.»
9 Yimdǝman kǝndawu kǝnyakkuye kǝndawu siwan canidǝye kawunju findin yakkunna,
Mordekai kakkadu ruwuduwu Maiye sammaa bowoyenniya,
mana wowombe wuljiye ruwuyera.
Larduwa mian findin tulurin Indiyalan tamiya Abasharo yadedǝye wakkilla Maiye-a gomnawa-a fuwuwu jama sammaye-a,
koro yaudiya yero ruwujane juwayeyera.
Kakkadu adǝ lardu fi yayero jiɍi ruwunjuyen,
koro jama fi yayero tǝlamnjulan,
yaudiya yero jiɍi ruwunjayen koro tǝlamnjalan ruwuyeyera.
10 Kakkadudǝro cu Mai Ahasarassen mukko casakke lambanju bakcagane kǝngayamba casange ngojane fǝrra doi doi fǝrdi mairiyero jawane leyera.
11 «Wada Mai Ahasarassen:
Kollowo yaudiya bǝrni dasaana fin yaye samma ronja kaljaro capta.
Curo lardu fin yaye,
curo jama fin yaye,
am baɍimia tayiro lawala cakkudiya,
yaudiya tayia roro ceyeso.
Kamuwanja-a yallanja-a yea ceyeso,
lǝmannjadǝa camowo.
12 Cidi Mai Ahasarasse ndaranjun yaye awo adǝ yim falma tǝdo.
Ngo yimdǝ,
kǝndawu kǝnmewun yindinne adar canidǝye kawunju mewun yakkunna.
13 Lardu fi yayen kakkadu adǝ naptu wowombe cǝdo,
yaudiya dabbarda,
yim adǝ isiya,
koronja kǝla waduwunjayen carǝmboro jama sammasoro kurukca.»
14 Mai cakke kǝngayamba fǝrra fǝrdinjuyero jawane ngǝrǝmbaro lejane,
wormaduwu ye wadadǝa Bǝrni Shushannin kurukkera.
15 Mordekai kalwu maila bul ye ɍiwulla ye-a barmus darajaa kime cit-a luje jawa kura dinarre kǝlaro gǝnajiye na Maiyen kiluwo.
Bǝrniwu burwu karwukǝjiye kekesakko.
16 Yaudiya karwunja bul fokko walje,
karwunja ye kǝjije,
daraja ye kewando.
17 Lardu fin yaye,
bǝrni fin yaye,
na duwon wada adǝa nojanadǝlan yaudiyaye karwu tai daje kǝjije,
masǝnaro am dojane ngǝmǝri kedo.
Yaudiyaa rijana nangaro,
am jiɍi gadea kada yaudiro walyera.